ABŞ prezidenti Donald Trump onun komandası ilə Rusiya arasında mümkün əlaqələrin təhqiqatını öz prezidentliyinə qarşı “çevriliş cəhdi” adlandırıb.
Trump-ın baş prokuroru isə deyib ki, onun fikrincə ABŞ kəşfiyyat agentlikləri Trump-ın 2016-cı il seçki kampaniyasının əleyhinə casusluq ediblər.
Aprelin 10-da Ağ Evdə danışan Trump deyib ki, onun seçki kampaniyasının fəaliyyətlərinin araşdırılması “cevrilişə və prezidentin devrilməsinə cəhd” olub:
"Onların etdikləri bir xəyanət idi, onların gördüyü iş dəhşətli idi və bizim konstitusiyamıza qarşı yönəlmişdi”.
Trump “xəyanətdə” konkret olaraq kimi ittiham etdiyini bildirməyib.
Bu arada baş prokuror William Barr aprelin 10-da Konqresə bildirib ki, onun təbirincə deyilərsə, Trump-ın prezidentlik kampaniyasına qarşı “casusluq” əməliyyatlarını araşdıracaq:
"Düşünürəm ki, casusluq baş verib.Sual bundan ibarətdir ki, bu, adekvat şəkildə əsaslandırılmışdımı? Mən iddia etmirəm ki, adekvat əsaslandırma olmayıb”.
Buna da bax: Trump rəqiblərinin ‘xəyanətkar hərəkətlərə’ yol verdiklərini deyir
Senatdakı demokratların lideri Chuck Schumer Barrın bəyanatını rədd edib və baş prokuroru ya dediyini dəlillərlə əsaslandırmağa, ya da sözlərini geri götürməyə çağırıb. Schumer Twitter-də yazıb:
"Baş prokuror Barr özü də etiraf etdi ki, onun Trump-ın kampaniyasına qarşı casusluğun olduğuna dair sübutları yoxdur. Baş prokuror Barr ya öz bəyanatını dərhal geri götürməli, ya da buna spesifik dəlil təqdim etməlidir. Qəsd nəzəriyyələri yaratmaq Baş Prokurorluğun səviyyəsinə uyğun hərəkət deyil”.
Barr martın 22-də xüsusi prokuror Robert Mueller-in hesabatı başa çatdıqdan sonra artıq ikinci dəfədir ki, Konqres komitəsi qarşısına çıxmalı olur.
Barr Mueller-in 400 səhifəlik hesabatını hələlik Konqresə təqdim etməyib. O bunun əvəzində millət vəkillərinə Mueller hesabatının onun özü tərəfindən tərtib edilmiş 4 səhifəlik xülasəsini verib.
Buna da bax: Baş prokuror Rusiya hesabatının tam variantını Konqresə vermək niyyətində deyilDemokratlar bu xülasənin kafi olmadığını bildiriblər və bu yaxınlarda vəzifəsinə Trump tərəfindən təyin edilmiş baş prokurorun sənədin prezidentə qarşı olan mühüm hissələrini ört-basdır etməyə çalışacağından narahatlıq ifadə ediblər.
Barr bildirib ki, bəzi yerləri redaktə olunmuş tam hesabat Konqresə gələn həftə veriləcək.