Ankaranın Amerika keşişini həbsdə saxlaması ilə bağlı diplomatik qarşıdurmanın davam etdiyi bir vaxtda ABŞ prezidenti Donald Trump deyir ki, o, Türkiyədən idxal olunan polad və alüminiuma qoyulan rüsumların ikiqat artırılmasına sərəncam verib.
Avqustun 10-da yazdığı Twitter postunda ABŞ prezidenti Türkiyə valyutası lirənin zəifləməsindən və “bizim çox güclü dollarımızdan” söz açıb.
"Mən elə indicə Türkiyə ilə əlaqədar Polad və Alüminiumun rüsumlarını ikiqat artıran sərəncam verdim. Türkiyə lirəsi bizim çox güclü dollarımıza nisbətdə sürətlə məzənnədən düşür. Alüminiuma rüsum bundan sonra 20, Polada qoyulan rüsum isə 50 faiz olacaq. Bizim Türkiyə ilə münasibətimiz hazırda yaxşı deyil".
I have just authorized a doubling of Tariffs on Steel and Aluminum with respect to Turkey as their currency, the Turkish Lira, slides rapidly downward against our very strong Dollar! Aluminum will now be 20% and Steel 50%. Our relations with Turkey are not good at this time!
— Donald J. Trump (@realDonaldTrump) August 10, 2018
Ötən iyun ayında Birləşmiş Ştatlar əsas qlobal partnyorlardan idxal olunan alüminiuma 10, polada 25 faizlik rüsum qoymuşdu.
Ankaranı hədəfləyən yeni rüsum hədəsi ikitərfli münasibətlərin amerikalı pastor Andrew Brunson-un Türkiyədə həbsi və mühakiməsi ilə eyni vaxta təsadüf edir.
Pastor 2016-cı ildən bəri “terrorçu qrupların üzvü olmadan onların adından cinayətlər törətmək” ittihamı ilə Türkiyə həbsxanasında saxlanır. Onu “kürd terror qrupları” ilə əlaqədə ittiham edirlər.
50 yaşlı Brunson-u 35 il müddətinə azadlıqdan məhrumetmə cəzası gözləyir, lakin o məhkəməsinin davam etdiyi vaxtda, iyulun 25-dən ev məhbusluğuna keçirilib.
İyulun 26-da Donald Trump Brunson-un dərhal azad olunub Türkiyədən buraxılmasını tələb etmiş, əks halda Ankara üzərinə “böyük sanksiyalarla” hədələmişdi.
İndi isə rüsum hədələri Türkiyə lirəsini az qala çökmə nöqtəsinə çatdırıb. Lirə təkcə avqustun 10-da 19 faiz çəki itirib.
Ankara iqtisadiyyatın sabitliyini saxlıamaq üçün xərclərin azaldılması məqsədilə təcili tədbirlərə başlayıb.