Almaniya rəsmiləri dekabrın 30-da Avropa İttifaqını COVID-19-a qarşı ikinci vaksini tez bir zamanda təsdiqləməyə çağırıblar.
Bundan bir neçə saat əvvəl Britaniya hakimiyyət orqanları Oksford Universiteti və AstraZeneca şirkətinin müştərək əməyinin məhsulu olan ilk Avropa vaksinindən kütləvi istifadəyə icazə verib.
Almaniyanın səhiyyə naziri Yens Span AstraZeneca vaksininin çevik bir şəkidə yoxlanmasına çağırıb.
O deyib ki, koronavirus pandemiyası ilə mübarizədə vaksinlər həlledici rol oynayacaq.
Span habelə ABŞ biotexnoloji şirkəti Modernanın hazırladığı vaksinin təsdiqinə çağırıb.
Bu vaksin artıq yanvarın əvvəllərindən istifadəyə verilə bilər.
Buna da bax: Koronavirus vaksini vergidən azad edildi
İsrail artıq 500 min nəfəri peyvəndləyib
Almaniya naziri deyib ki, onun ölkəsi dekabrın 31-dək Pfizer/BioNTech vaksinindən 1.3 milyon doza almağı planlaşdırır. Bu vaksin artıq bir çox Qərb ölkələrində peyvəndləməyə verilib.
Koronavirusun daha sürətlə yayılan yeni ştammının aşkar olunmasından sonra vaksinlərin istifadəyə verilməsi Avropada ümidlər yaradıb.
Britaniya AstraZeneca vaksinindən 100 milyon doza sifariş etdiyini bildirib. Bu qədər vaksin 50 milyon nəfərin peyvəndlənməsinə imkan yaradacaq.
Avropanın başqa ölkələrində və ABŞ-da vaksinlərdən istifadədə ləngimənin hiss olunduğu bir vaxtda İsrail 500 min nəfəri peyvəndləyib. Bu, ölkə əhalisinin 5 faizidir.
İsrailin Səhiyyə Nazirliyi dekabrın 29-da bildirmişdi ki, 70 yaşdan yuxarı əhalinin 20 faizinə vaksinin iki dozasından biri artıq vurulub.
Buna da bax: AstraZeneca vaksini də təsdiqləndi
Virusun yeni ştammı daha ölümcül deyil, amma...
Koronavirusun ilk dəfə Britaniyada aşkarlanmış daha sürətlə yayılan yeni ştammı Birləşmiş Ştatlar, Hindistan və Latın Amerikasında da qeydə alınıb.
Bütün əlamətlər bu ştammın qlobal miqyasda yayılacağını göstərir.
Dekabrın 29-a olan məlumata görə Avropa, Asiya, Yaxın Şərqdə 20 ölkədə, habelə Kanada və Avstraliyada da yeni ştamm aşkarlanıb.
Virusların mutasiya edərək yeni ştammlar yaratması normal haldır və alimlər deyirlər ki, virusun bu növünün heç də daha ölümcül və qorxulu olduğu düşünülmür.
Bu ştammın mövcud vaksinlərə daha müqavimətli olacağı da gözlənilmir.
Ştammın yeganə qorxulu cəhəti onun daha sürətlə yoluxa bilməsidir.
Daha sürətli yoluxma xəstəxanalarda çarpayı çatışmazlığı yarada bilər.