Facebook hesabında “Sual / nə qazandıq 24 saat 43 dəqiqəyə? Xankəndidə “Bravo” tezliklə tikiləcək, yoxsa yox?” yazandan bir gün sonra həbs edilən ictimai fəal Ruslan Vahabova 4 il həbs cəzası kəsilib. Bakı Ağır Cinayətlər Məhkəməsində onun haqqında çıxarılmış hökmdə iddia olunur ki, R.Vahabovun cibindən 6 qramdan çox narkotik tapılıb.
R.Vahabov deyir ki, narkotik ittihamı yalandır, onu şərləyiblər. Onun sözlərinə görə, tutulanadək heç narkotik görməyibmiş:
“Öz işimlə məşğul olan adam olmuşam, fəhləliklə ailəmi dolandırmışam. Kiməsə pislik eləməmişəm, şər atmamışam, mərdimazarlıq eləməmişəm. Mühafizəçi işləyirdim. 12 saat işdə olurdum. Qalan vaxtlarda da dolanışığa görə “Sədərək”də fəhləlik eləyirdim. İki azyaşlı övladım var. Mən narkotikin üzünü ilk dəfə polis bölməsində qabağıma qoyanda gördüm”.
Sizin brauzer HTML5-i dəstəkləmir
Əliyevə müxalif olanların cibindən narkotik çıxır: 17 ildir davam edən 'trend'
"Ona görə adamı həbs eləməzlər"
R.Vahabovun sözlərinə görə, polislər onu elə fəhləlikdən qayıdanda tutublar. O, məhkəmədə son sözündə vurğulayıb ki, bir gün öncə Facebook hesabındakı paylaşımı tutulmağına səbəb olub:
“Mənim siyasi fəaliyyətim, iddiam yoxdur. Sosial şəbəkədə iki kəlmə söz yazmışam. Ona görə adamı həbs eləməzlər. Mən azərbaycanlıyam...”.
R. Vahabov məhkəmədə bildirib ki, sentyabrın 22-də saxlandıqdan sonra Nizami rayonu, 23-cü polis bölməsinə gətirilib və orada işgəncələrə məruz qalıb: “23-cü bölmədə saçımdan tutub yerdə sürüyürdülər...”.
İctimai fəal işgəncə və təhqirlərə dözməyib, narkotiki 100 manata alması haqda yalan ifadəyə imza atmağa məcbur qaldığını vurğulayıb.
Ona Cinayət Məcəlləsinin 234.4.3 (satış məqsədilə külli miqdarda narkotik əldə etmə, daşıma, saxlama) maddəsilə ittiham verilibmiş. Məhkəmədə də prokuror bu maddə ilə ona 6 il 6 ay həbs cəzası istəyib. Hakimlərsə ittihamı CM-in 234.1-1 maddəsinə dəyişiblər. Bu maddədə satış məqsədi olmadan külli miqdarda narkotikə görə 3 ildən 8 ilədək həbs cəzası nəzərdə tutulub. Məhkəmə də ona 4 il cəza kəsib.
R.Vahabov Azərbaycan Talışlarının İctimai Şurasının (ATİŞ) üzvudür. Təşkilat onun haqqında çıxarılmış hökmün əsassız və qanunsuz olması haqda bəyanat yayıb.
Buna da bax: 'İşçi Masası'nın həbsdəki üzvü: 'Üzümə qadın qoyub zorlama ittihamı ilə hədələyirdilər'Xatırlatma
Ruslan Vahabov sentyabrın 21-də Facebook hesabında “Sual / nə qazandıq 24 saat 43 dəqiqəyə? Xankəndidə “Bravo” tezliklə tikiləcək, yoxsa yox?” məzmunlu status paylaşıb. Sentyabrın 22-də narkotik ittihamıyla saxlanılıb.
Ötən il sentyabrın 19-da Qarabağda “antiterror tədbirləri” başlayandan sonra bir həftə içində Azərbaycanda xeyli ictimai fəal həbs edilib. Onlardan üç nəfərə internetdə yasaqlanmış informasiyanın yayılması ittihamıyla 30 sutka inzibati həbs cəzası verilib. Bir neçəsinin haqqında da müxtəlif ittihamlarla cinayət işi açılıb.
Daxili İşlər Nazirliyinin mətbuat xidməti işgəncə iddialarını rədd edərək həbs olunanların konkret faktlara görə cinayət məsuliyyətinə cəlb edildiyini bildirib.