Aprelin 3-də Rusiya dronları Ukraynanın Xarkov şəhərində yaşayış binalarını vurub, nəticədə azı dörd nəfər ölüb, 32 nəfər yaralanıb. Bu barədə regional qubernator Oleq Sinequbov "Telegram"dakı paylaşımında məlumat verib. O, dron hücumunun yanğınlara səbəb olduğunu və yaralananlar arasında iki uşağın olduğunu bildirib. Onun sözlərinə görə, hücum nəticəsində çoxmərtəbəli yaşayış bloku dağılıb və bir binanın damında yanğın baş verib.
Şəhər meri İqor Terexov isə bildirib ki, Rusiya ordusu 40 dəqiqə ərzində Xarkova azı 14 zərbə endirib. O, hücum nəticəsində yaralı sayının 35 olduğunu bildirib.
Dnepr şəhərinə və Zaporojye vilayətinə də dron hücumları olub, dörd nəfər yaralanıb.
Moskva meri Sergey Sobyanin aprelin 4-ü səhər saatlarında bildirib ki, Rusiya hava hücumundan müdafiə bölmələri Moskvaya doğru uçan pilotsuz uçuş aparatını vurublar.