Qarabağdakı Rusiya sülhməramlılarının fəaliyyəti yeni şəraitə adaptasiya olunacaq.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı deyib.
“Rusiya sülhməramlı kontingentinin regiona yeridildiyi şərait bu ilin 19-20 sentyabrında baş vermiş toqquşmalar nəticəsində ciddi şəkildə dəyişib və əhalinin kütləvi çıxışı fonunda bizim sülhməramlılarımızın fəaliyyəti adaptasiya olunacaq”.
Sözçü deyib ki, Rusiya sülhməramlı kontingenti artıq Qarabağdakı bir sıra stasionar və müvəqqəti müşahidə postlarını yığşışdırıb.
Zaxarovanın sözlərinə görə sülhməramlılarla bağlı prinsipial məsələlər Bakı ilə müzakirə olunacaq.
Buna da bax: Əliyevin 'alternativ danışıqlar' təklifinə Paşinyanın reaksiyası: Azərbaycan platformanı dəyişmək istəyir?Zaxarova deyir ki, ermənilərin bir hissəsi qayıtmaq istəyir
Rusiya Müdafiə Nazirliyi oktyabrın 7-də bildirmişdi ki, Rusiya sülhməramlıları Əsgəran rayonundakı müşahidə postlarını yığışdırıblar.
Nazirlik bu qərarın qanunsuz silahlı birləşmələrin tərksilahı ilə bağlı olduğunu və gözətçi postlarının keçmiş təmas xəttindən uzaqlaşdırıldığını bildirmişdi.
Rusiya sülhməramlıları Qarabağda Vladimir Putin, İlham Əliyev və Nikol Paşinyan arasında imzalanmış 9 noyabr 2020-ci il bəyanatına görə yerləşdiriliblər. Onların missiya müddəti 2025-ci ildə başa çatır.
Sentyabrın sonlarında sülhməramlıların gələcək taleyi barədə suala cavab verən Dmitri Peskov demişdi ki, bu məsələ Azərbaycanla müzakirə olunacaq.
Vedomosti saytının yazdığına görə Mariya Zaxarova deyib ki, Moskvada ermənilərin bir hissəsinin Qarabağa qayıtmaq istədiklərinə dair məlumat var.
Sizin brauzer HTML5-i dəstəkləmir
İlham Əliyev: 'Paşinyan 6 saata Qranadaya uça bilir, amma...'
Paşinyanın bəyanatı
Bu arada Ermənistanın baş naziri Nikol Paşinyan yerli ictimai telekanala müsahibəsində Qarabağdakı Rusiya sülhməramlı kontingentinin Ermənistana gətirilməsinin mümkünlüyü ilə bağlı bəyanat verib.
O deyib ki, bu kontingent Qarabağdan çıxdığı təqdirdə Ermənistana köçürülməli yox, Rusiyaya qayıtmalıdır.
Bundan əvvəl Rusiya Müdafiə Nazirliyi sülhməramlı kontingentin Qarabağdan çıxarılması məsələsini Azərbaycan və ya Ermənistanla müzakirə etmədiyini bildirmişdi.
Nazirliyin mətbuata verdiyi məlumatda deyilirdi:
"Rusiya Müdafiə Nazirliyi nümayəndə heyətinin Bakı və ya Yerevanda Rusiya sülhməramlı kontingentinin Qarabağdan çıxarılmasını müzakirə etdiyinə dair bəzi KİV-lərdə yayılmış məlumat həqiqətə uyğun deyil”.
Nazirlik əlavə etmişdi ki, Müdafiə Nazirliyi xətti ilə Azərbaycan və Ermənistanla aparılan danışıqlar əvvəlcədən planlaşdırılıb və sülhməramlıların cari fəaliyyəti ilə bağlıdır.
Buna da bax: Ekspert: Rusiya hərbi kontingentindən Qarabağda baza formalaşdırmaq istəyə bilərƏrdoğanın da bəyanatı olmuşdu
Hələ ötən iyul ayında Türkiyə prezidenti Rəcəb Tayyib Ərdoğan Rusiya sülhməramlı kontingentinin 2025-ci ilədək Qarabağdan getməli olduğunu demişdi.
O vaxt onun bu bəyanatı Moskvanın narazılığına səbəb olmuş, Rusiya XİN-in sözçüsü Mariya Zaxarova bildirmişdi ki, Türkiyə Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının tərəfi deyil, Rusiya sülhməramlıları isə Qarabağda bu razılaşma əsasında yerləşdirilib. Məhz bu sənəddə sülhməramlıların regionda qalma müddəti və bu müddətin daha beş il uzadılması üçün parametrlər əksini tapıb.
Ərdoğan daha sonra bu məsələyə bir daha qayıtmayıb.
Sizin brauzer HTML5-i dəstəkləmir
Ağdərəyə qayıdışı gözləyən köçkünlər: 'Noolar erməni olanda....'
Tərksilah başa çatmayıb?
Lakin Azərbaycan prezidenti İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 53-cü iclasının iştirakçılarını qəbul edərkən deyib ki, Qarabağda qanunsuz silahlıların tərksilahı prosesi davam edir. Prezidentin vurğulamasına görə, ərazilərin onlardan təmizlənməsi prosesi gedir: "Bizdə olan məlumata görə, hələ bu ərazidə gizlənən qruplar var. Ərazi kifayət qədər böyükdür, buna görə ərazini tamamilə təmizləmək üçün vaxt tələb olunacaq".
Buna da bax: Paşinyan MDB-nin iclasına getməyəcəyini, Qarabağdakı sülhməramlıları qəbul etməyəcəyini deyibXatırlatma
1990-cı illərin əvvəllərində Azərbaycanın Qarabağ vilayəti və ətraf 7 rayonunu işğal edilib. 2020-ci ildə 44 günlük müharibə nəticəsində Bakı həmin ərazilərə, Qarabağın isə bir hissəsinə nəzarətini bərpa edib. Ancaq tərəflər (Ermənistan və Azərbaycan) sülh sazişi imzalamayıb, Laçın dəhlizinə və Qarabağda təmas xəttinə Rusiya hərbçiləri yerləşdirilib.
Son illər Azərbaycanla Ermənistan arasında həm Rusiyanın, həm də Avropa İttifaqının vasitəçiliyi ilə ayrı-ayrılıqda sülh danışıqları aparılıb.
Bu il sentyabrın 19-20-də isə Bakı Qarabağda "lokal antiterror tədbirləri" başlatdığını elan edib. Yerevan bunu "etnik təmizləmə" və "təcavüz" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər, onların silahları təhvil verməyə başladıqları açıqlanıb.
Bundan sonra erməni sakinlərin regiondan Ermənistana axını da başlayıb.