Nazir dövlət müəssisələrində çalışan və özəl müəssisələrlə işbirliyi quran həkimlər haqda danışaraq, onların müəyyən olunaraq, cəzalandırılacağını söyləyib: «Bilirik ki, bəzən dövlət müəssisələrinin həkimləri tərəfindən özəl tibb müəssisəsinə laborator müayinəyə göndərilən analizlərin cavabları dövlət müəssisələrində həmin xəstəyə diaqnozun qoyulması zamanı gərəkli olmur. Təsəvvür edin, özəl müəssisə ilə işbirliyində olan dövlət müəssisəsinin həkiminin göndərdiyi pasiyentdən göndərən həkimə müayinə üçün alınmış vəsaitdən müəyyən məbləğ ödənilir. Özəl müəssisəyə qalan məbləğ həmin müayinəni aparmaq üçün lazım olan reaktivlərin alınmasına da çatmır. Belə olan halda hansı dəqiq laborator müayinədən söz gedə bilər? Özəl tibb müəssislərində hepatit virusunun da yoxlanılmasından danışmağa ehtiyac yoxdur».
Oqtay Şirəliyev özəl tibb müəssisələrinə dövlət müəssisələri tərəfindən laborator tibbi müayinələrin göndərilməsini və onların özəl tibb müəssisələrində müayinəsini qadağan edib. Cənab Şirəliyev eyni zamanda özəl tibb müəssisələrinin çoxunun təsisçilərinin həkim olmadığını və bu səbəbdən də işin pərakəndə şəkildə getdiyini vurğulayıb. «Qısa müddətə özəl tibb müəssisələrinə özüm şəxsən baxış keçirəcəm”, - deyə o, bildirib.
