-
ADO nazirliyə müraciət etdi – Teatr 3 yaşını qeyd edəcək
Müstəqil, art-underground ADO teatrı 15 iyul tarixində 3 yaşını qeyd edəcək. Bu barədə teatrın təsisçi və bədii rəhbəri Elmin Bədəlov deyib: “Eyni zamanda 4-cü mövsümümümüzün açılışı olacaq. Biz xüsusən yay aylarında işləmirik. Çünki teatrı yaradanda məqsəd o idi ki, dövlət teatrları 15 iyuldan sonra istirahətə gedəndə biz fəaliyyətə başlayaq. Bu məqsədlə yay aylarında əsas işlərimiz olacaq və iyulun 15-də 3 yaşımızla əlaqədar bir sıra tədbirlər həyata keçirəcəyik”.
Teatr rəhbərinin sözlərinə görə, onlar Mədəniyyət və Turizm Nazirliyinə, Teatr Xadimləri İttifaqına rəsmi müraciət də ediblər: “Gün ərzində 3 tədbir planlayırıq. Səhər saat 12-də mətbuat konfransı edəcəyik. 3 il ərzində gördüyümüz işlər və görüləcək işlər haqda planlarımızı açıqlayacağıq. Saat 19:00-da STOP tamaşasını göstərəcəyik və 21:00-dan gecəyə kimi musiqili konsertimiz baş tutacaq. Konsertdə gənc musiqiçilərin çıxışları olacaq. Tədbirlər sayı çox olduğundan nazir Əbülfəs Qarayevə və Aktyorlar Evinin rəhbəri Azər Paşa Nemətova müraciət etmişik ki, 1 günlük tədbirlər keçirilməsi üçün bizə yer verilsin”.
Qeyd edək ki, 2013-cü il 15 iyul tarixində Oda Teatrı yaradılıb. Bir neçə ay bundan öncə Oda Teatrı, Fraqment Mədəniyyət Portalı, Trash Art Cafe, ADO teatrı kimi bütün fəaliyyətlərini yalnız bir ad altında – “ADO Theatre” adı ilə fəaliyyətlərinə davam edirlər. Onlar müstəqil və alternativ teatr fəaliyyətlərinin 3 yaşını, 4-cü mövsümlərinin açılışına hazırlıq görürlər.
