Şair narkotik satır?
Şair Tofiq Həsənli qanunsuz olaraq külli mqidarda narkotik satmaqda şübhəli bilindiyinə görə saxlanılıb. Hazırda barəsində Cinayət Məcəlləsinin 234.4.3-cü maddəsi ilə cinayət işi başlanıb, həbs qətimkan tədbiri seçilib. Daxili İşlər Nazirliyi mətbuat xidmətinin şöbə rəisi Orxan Mansurzadə AzadlıqRadiosuna belə deyib.
Tofiq Həsənlinin ailəsi və dostları onun narkotikdən istifadə etməsi və ya satması haqda deyilənləri təkzib edir. Onun dindar olduğunu, Kərbəlanı ziyarət etdiyini etdiyini söyləyirlər.
Orxan Mansurzadə isə bu deyilənlərə belə münasibət bildirir: “Necə narkotikdən istifadə etməyib ki, 10 il bundan qabaq narkotikdən istifadəyə görə 2 il yarım azadlıqdan məhrum edilib. İndisə bu adam satışa görə saxlanılıb. Üzərindən də külli miqdarda tiryək çıxdığı bildirilir”.
500 azərbaycanlı hacı xəstələnib
Bu il Azərbaycandan Həcc ziyarətinə getmiş zəvvarlardan bir çoxunda virus aşkarlanıb. Azərbaycandan olan Həcc missiyasının həkim briqadasının rəhbəri Həci Kitabullah Əkbərov apa-ya bildirib ki, zəvvarlar bu virusa Səudiyyə Ərəbistanında yoluxublar.
Bunun kəskin respiratorlu virus infeksiyası olduğunu deyən K. Əkbərov bildirib ki, xəstəliyin əlamətləri ağır öskürək, asqırma, iştahasızlıq, oynaq-əzələ ağrıları və sairdir: “Həccdən qayıdan 500-dən çox hacı bu virusun daşıyıcısıdır. Buna da səbəb onların orada düzgün pəhriz saxlamamaları, soyuq su içmələri və digər məsələlərdir”.
Bu il Azərbaycanda Həccə 2400 zəvvar gedib, onlardan 3-ü orada vəfat edib.
Putin Leyla Əliyevaya medal verdi
Rusiya Prezidenti Vladimir Putin Heydər Əliyev Fondunun vitse-prezidenti Leyla Əliyevanın “Puşkin” medalı ilə təltif edilməsi haqqında Fərman imzalayıb.Xəbəri AZƏRTAC yayıb.
“Puşkin” medalı mədəniyyət və incəsənət, maarifçilik, humanitar elmlər və ədəbiyyat sahələrində xidmətlərə, mədəni irsin öyrənilməsi və qorunub saxlanmasına, xalqların və millətlərin mədəniyyətlərinin yaxınlaşmasına və qarşılıqlı zənginləşməsinə töhfəyə görə verilir.
Azərbaycan universitetlərinin reytinqi
Böyük Britaniyanın «Quacquarelli Symonds» (QS) şirkəti Avropa və Mərkəzi Asiyanın inkişaf etməkdə olan ölkələrinin ali məktəblərinin yeni reytinqini açıqlayıb. topniversities.com saytının yaydığı reytinq cədvəlində 150 universitet yer alıb.
Reytinqin başında Lomonosov adına Moskva Dövlət Universiteti gəlir. İkinci yerdə Rusiyanın Novosibirsk Dövlət Universiteti, üçüncü yerdə isə Çexiyanın Çarlz Universitetidir. İlk onluqda Estoniyanın Tartu (4-cü yer) və Polşanın Varşava və Yagellon universitetləri (6-7-ci yerlər) yer alıb. Qalanları yenə Rusiya və Çexiya universitetləridir.
İlk 100 təhsil müəssisəsinin demək olar ki, 25-i Rusiyada yerləşir. Türkiyədən siyahıda 16, Qazaxıstanda 14, Polşadan 12, Çexiyadan 10, Ukraynadan 9 təhsil müəssisəsi var.
Azərbaycandan Xəzər Universiteti 67, Qafqaz Universiteti 78, Bakı Dövlət Universiteti 83-cü yerdədir. Azərbaycan Dillər Universiteti 101-110-c yerdə qərar tutub.