Aprelin 29-da Binəqədi rayon Məhkəməsinin qərarı ilə hüquq müdafiəçisi Rüfət Səfərov barəsində seçilmiş həbs-qətimkan tədbirinin müddəti daha bir ay uzadılıb.

Həbs-qətimkan tədbirinin uzadılması üçün əsas arqument istintaqın yekunlaşmaması göstərilib.

Bundan öncə, martın 18-də Binəqədi rayon Məhkəməsinin qərarına əsasən, R.Səfərovun həbs müddəti mayın 3-dək uzadılmışdı.

7 yanvar

Rüfət Səfərovun anası onun ölkədən çıxışına qadağanın götürüldüyünü deyir

Həbsdə olan hüquq müdafiəçisi Rüfət Səfərovun anası Tahirə Tahirqızı ölkədən çıxışına məhdudiyyətin götürüldüyünü bildirir. Onun sözlərinə görə, yanvarın 7-də o, ağır xəstə olan həyat yoldaşı Eldar Sabiroğlu ilə birlikdə Türkiyəyə yola düşüb.

Onların artıq Türkiyədə olduğu bildirilir.

Məsələ ilə bağlı istintaqı aparan Daxili İşlər Nazirliyi ilə danışmaq mümkün olmayıb.

6 dekabr

Rüfət Səfərovun anası ifadəyə çağrılıb

Həbsdə olan hüquq müdafiəçisi Rüfət Səfərovun anası Tahirə Tahirqızı oğluna qarşı qaldırılan cinayət işi üzrə istintaqa çağırıldığını bildirib. Yanvarın 6-da o, şahid qismində ifadə vermək üçün Bakı şəhər Baş Polis İdarəsinə çağrılıb.

T.Tahirqızının sözlərinə görə, o, qanunvericiliyə uyğun olaraq ifadə verməkdən imtina edib və oğlunun şərləndiyini deyib: "Müstəntiqə ölkədən çıxmağıma qadağa qoyulması ilə bağlı sual verdim, amma heç bir cavab ala bilmədim".

Hüquq müdafiəçisinin anası vurğulayıb ki, həyat yoldaşı Parkinson xəstəliyindən əziyyət çəkir və hər yarım ildən bir Türkiyədə müayinədən keçir: "Yanvarın 7-də də müayinəyə getməli idik, amma ölkədən çıxışına qadağa qoyuldu. Amma ümid edirəm ki, oğlumun həbsinin sifarişçiləri humanizm göstərəcəklər və onun atasının xaricə getməsinə imkan verəcəklər".

T.Tahirqızının açıqlamasına istintaqdan münasibət almaq mümkün olmayıb.

Rüfət Səfərovun anasının ölkədən çıxışına 'stop' qoyulduğu deyilir

Həbsdə olan hüquq müdafiəçisi Rüfət Səfərovun anası Tahirə Tahirqızının ölkədən çıxışına məhdudiyyət qoyulduğu bildirilir. Bu barədə Səfərovun ailəsindən məlumat veriblər.

"Tahirə xanımın ölkədən çıxışına Daxili İşlər Nazirliyi qadağa qoyub. Tahirə xanım həyat yoldaşı Eldar Səfərovun Türkiyədə həkim müayinəsindən keçirilməsi üçün İstanbula getməli idi. Amma yanvarın 4-də onun çıxışına məhdudiyyət qoyulduğunu öyrənib. Rüfətin atası Eldar Səfərovun vəziyyəti kəskin şəkildə pisləşməsinə baxmayaraq, onu Türkiyəyə aparmaq, hələlik, mümkün olmayıb", - Səfərovlar ailəsindən deyiblər.

R.Səfərovun özü də saxlandığı təcridxanasından Daxili İşlər Nazirliyinə müraciət edib. O, anasının xəstə atası E.Səfərovla birlikdə ölkədən xaricə çıxmasına icazə verilmədiyini vurğulayaraq "nə etməyə çalışırsınız" deyə sual edib.

"Müdafiə Xətti" hüquq-müdafiə təşkilatının icraçı direktoru R.Səfərov ötən il, dekabrın 3-də axşam saatlarında saxlanıb. Ona qarşı Cinayət Məcəlləsinin 221.1 (xuliqanlıq), 178.3.2 (dələduzluq-külli miqdarda ziyan vurmaqla törədildikdə) və 127.2.3-cü (qəsdən sağlamlığa az ağır zərər vurma) maddəsi ilə ittiham irəli sürüldüyü açıqlanıb. Dekabrın 4-də Binəqədi rayon Məhkəməsi R.Səfərov barəsində 4 ay müddətinə həbs-qətimkan tədbiri seçib. O, ittihamları qurama sayır.

Xatırlatma

Zərdab rayon Prokurorluğunun keçmiş müstəntiqi R.Səfərov 2015-ci ilin sonunda Azərbaycan hakimiyyətini insan haqlarının pozulmasında və ölkədə qanunsuzluqlarda ittiham etdikdən sonra istefaya çıxıb. O bundan sonra rüşvət almaq ittihamı ilə həbs edilib. 2016-cı ilin sentyabrında Lənkəran Ağır Cinayətlər Məhkəməsinin qərarı ilə 9 il müddətinə azadlıqdan məhrum edilib. Keçmiş müstəntiq ona qarşı irəli sürülən ittihamları rədd edib. 2019-cu ildə əfv sərəncamı ilə azadlığa çıxıb. Daha sonra o, hüquq müdafiəsi fəaliyyətinə başlayıb.

Milli Məclisin növbədənkənar sessiyası çərçivəsində ilk iclası iyunun 3-də keçiriləcək.

Bu barədə Milli Məclisin Mətbuat və ictimaiyyətlə əlaqələr şöbəsindən xəbər verilib.

İclasın gündəliyinə ilk məsələ kimi "2024-cü il dövlət büdcəsinin icrası haqqında" qanunun layihəsi (birinci oxunuş) daxil edilib.

Habelə bir sıra məcəllə və qanunlara dəyişiklik nəzərdə tutulur.

Gündəlikdə ümumilikdə, hələlik, 7 məsələnin olduğu bildirilir.

Milli Məclisin növbədənkənar sessiyası keçiriləcək

Milli Məclisin növbədənkənar sessiyası keçiriləcək. Bunu Milli Məclisin bu gün, mayın 30-da yaz sessiyası çərçivəsində son iclasında parlamentin sədri Sahibə Qafarova bildirib.

Spiker deyib ki, Milli Məclisin iyunda növbədənkənar sessiyası keçiriləcək: "85 deputat növbədənkənar sessiyanın çağırılması üçün müraciət edib".

İclasda növbədənkənar sessiyanın keçirilməsinin motivi ilə bağlı məlumat verilməyib. Bu barədə deputatlar da mediaya, hələlik, açıqlama verməyiblər.

Ötən il növbədənkənar sessiyada olanlar...

Azərbaycanda bundan əvvəl də bir çox illərdə Milli Məclisin növbədənkənar sessiyaları keçirilib. Ötən il də bu, baş vermişdi. Onda dövlət büdcəsinə və bir çox qanunlara dəyişiklik edilmişdi. Növbədənkənar sessiyada büdcənin gəlir və xərcləri artırılmışdı.

Habelə parlamentin iyunun 21-də keçirilən iclasında (növbədənkənar sessiyanın davamı olaraq) Milli Məclis növbədənkənar seçkilərin təyin edilməsi üçün prezidentə müraciət etmişdi. Ondan bir gün əvvəl isə hakim Yeni Azərbaycan Partiyası (YAP) Milli Məclisin buraxılması təşəbbüsü ilə çıxış etmişdi. YAP-dan belə bir təşəbbüsü zəruri edən amil kimi həmin ilin noyabrında ölkədə keçiriləcək BMT iqlim konfransı (COP29) və başqa tədbirlər göstərilmişdi. Vurğulanmışdı ki, Konstitusiyaya əsasən, konfransın gerçəkləşəcəyi vaxtda - 2024-cü ilin noyabrında Milli Məclisə növbəti seçkilər keçirilməlidir. "Həm seçkilərin, həm də qeyd olunan tədbirlərin yüksək səviyyədə təşkili mühüm əhəmiyyət kəsb edir. Bundan əlavə, həmin dövrdə ölkə parlamentinin tam fəaliyyətdə olmasının məqsədəmüvafiqliyi də nəzərə alınmalıdır", - YAP-ın sədr müavini-Mərkəzi Aparatın rəhbəri Tahir Budaqov demişdi.

Ölümü bütün ölkədə müzakirələrə səbəb olan 18 yaşlı Elgün İbrahimovun hündürlükdən yıxılaraq aldığı xəsarətlər nəticəsində vəfat etdiyinin müəyyən olunduğu bildirilir.

Bu barədə mayın 29-da Baş Prokurorluq və Dövlət Təhlükəsizliyi Xidmətinin birgə məlumatında vurğulanır.

Əlavə edilib ki, cinayət işi üzrə bütün fərziyyələr, onun intihar etməsi, ehtiyatsızlıqdan yıxılması və ya ona ağır bədən xəsarəti yetirilməsi nəticəsində ölümün baş verməsi kimi hallar yoxlanılıb: "... Şahid ifadələri, hadisə yerinə, müşahidə kameralarına baxış, meyitin xarici, daxili müayinə edilməsi, telefon məlumatları, məhkəmə-genetik, məhkəmə-tibbi... ekspertizaların rəyləri və başqa dəlillərlə müəyyən edilib ki, Elgün İbrahimova hər hansı... xəsarət yetirilməyib, ona qarşı heç bir zorakı hərəkətlərə yol verilməyib, o, hündürlükdən yıxılmaq nəticəsində aldığı çoxsaylı xəsarətlərdən ölüb".

Vurğulandığına görə, həmçinin müəyyən edilib ki, E.İbrahimov mayın 12-də saat 16 radələrində hazırlıq kursundan çıxdıqdan sonra mobil telefonunu sataraq ayrı-ayrı şəxslərə olan pul borcunu qaytarıb.

Ana intihar versiyasına inanmır...

Birgə rəsmi açıqlamaya, hələlik, onun yaxınlarından münasibət almaq mümkün olmayıb.

Amma bugünlərdə onun anası Fizzə Zeynalova yerli mediaya açıqlamasında oğlunun intihar edə biləcəyini istisna etmişdi: "Ola bilməz, mənim uşağım həyatdolu uşaq idi. Nəyə görə intihar etməli idi?!", - o, rəsmi açıqlamadan bir gün öncə "TV Müsavat"a müsahibəsində vurğulamışdı.

Yerli mediada mayın 13-nə keçən gecə Gəncə sakini, 18 yaşlı E.İbrahimovun Texnologiya Universitetinə məxsus, hazırda istifadəsiz olan yataqxananın həyətində ağır vəziyyətdə tapılıb xəstəxanaya yerləşdirilsə də, bir neçə saat sonra vəfat etdiyi barədə məlumatlar yayılmışdı. Faktla bağlı cinayət işi açılsa da, sosial şəbəkələrdə işin açılmaması ilə bağlı tənqidlər səslənmişdi.

Azərbaycan Xalq Cəbhəsi Partiyasının (AXCP) sədri Əli Kərimliyə sürücülük edən və aprelin əvvəlində inzibati qaydada həbs olunan Zaur Rzalı ilə bağlı cinayət işinin açıldığı bildirilir. O, Cinayət Məcəlləsinin 228.5 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə,...) maddəsi ilə ittiham olunur. Bu barədə AXCP-dən məlumat verilib.

Partiyadan vurğulandığına görə, bununla bağlı onun özünə mayın 29-da dəvət olunduğu Nərimanov rayon Polis İdarəsində məlumat veriblər.

"Cinayət işinin başlanmasına formal səbəb Z.Rzalının avtomobilindən məişətdə istifadə etdiyi meyvə bıçağının tapılmasıdır", - AXCP-dən vurğulanıb.

Z.Rzalı aprelin 1-də Nərimanov rayon Məhkəməsində 30 sutka həbs edilmişdi. O, İnzibati Xətalar Məcəlləsinin 510 (xırda xuliqanlıq) və 535.1-ci (Polis işçisi və ya hərbi qulluqçu ictimai qaydanın mühafizə vəzifələrini icra edərkən onların qanuni tələblərinə qəsdən tabe olmamaq) maddələri ilə təqsirli sayılıb. Partiyadan onun şərləndiyi açıqlamışdı.

AXCP-nin məlumatına görə, Z.Rzalı onlara bildirib ki, həmin vaxt onu saxlayanda maşınında axtarış aparıblar, meyvə bıçağını götürüblər: "Deməsinə görə, 17-ci polis bölməsində maşınında axtarış aparılanda "bardaçok"dakı bıçağı götürüblər, nə üçün olduğunu soruşublar. O, da Sədərək Ticarət Mərkəzindən 10 il bundan qabaq aldığını, sırf məişətdə istifadə üçün olduğunu deyib. Bildirib ki, meyvəçidir, tez-tez rayonlarda olur və bıçaq onun üçün vacib əşyadır".

AXCP hesab edir ki, hadisənin üstündən iki aya yaxın vaxt keçəndən sonra bıçağın yenidən yada düşməsi cinayət işinin siyasi sifarişlə açıldığını deməyə əsas verir.

Z.Rzalı sərbəst buraxılsa da, ölkədən çıxışına qadağa qoyulduğu bildirilir.

AXCP sədri Əli Kərimli isə bir müddət öncə vurğulamışdı ki, son iki ayda ona ictimai əsaslarla sürücülük və mühafizəçilik edən səkkiz şəxs əsassız yerə həbs edilib.

Hələlik, bütün bu açıqlamalara rəsmi qurumlardan münasibət almaq mümkün olmayıb.

Xatırlatma

Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.

Bəzi hüquq müdafiəçilərinin hesablamalarına görə, hazırda Azərbaycanda 360-dan çox siyasi məhbus var.

Mayın 28-də Avropa İnsan Hüquqları Məhkəməsi (AİHM) "İşçi Masası" Həmkarlar İttifaqları Konfederasiyası İdarə Heyətinin üzvü Ayxan İsrafilovun şikayəti ilə bağlı qərar çıxarıb.

Vəkil Fariz Namazlı bildirib ki, bu şikayət A.İsrafilov barəsində 2023-cü il avqustun 23-də seçilmiş həbs-qətimkan tədbirinin qanunsuzluğu ilə bağlı olub. Onun bildirməsinə görə, şikayətdə Avropa Konvensiyanın 5-ci (Azadlıq və toxunulmazlıq hüququ) maddəsinin pozuntusunun tanınması xahiş olunurdu. F.Namazlı deyib ki, bu iş üzrə hökumət birtərəfli bəyanat qəbul edib və hüquq pozuntusunu etiraf edib.

AİHM bu işi nəticədə siyahıdan çıxarıb.

Məhkəmə mənəvi zərərin əvəzi olaraq 2 min 700 avro, məhkəmə xərclərinə görə 450 avro kompensasiya müəyyən edib.

Hələlik, qərara Azərbaycanın rəsmi qurumları münasibət bildirməyib.

Qərar icra olunacaqmı?

Bu ilin aprelində prezident İlham Əliyev bildirmişdi ki, artıq AİHM-in qərarları Azərbaycana şamil edilə bilməz. O, ADA Universitetində "Yeni dünya nizamına doğru" adlı forumdakı çıxışında bununla bağlı fikirləri Azərbaycan nümayəndə heyətinin ötən il Avropa Şurası Parlamentlər Assambleyasında (AŞPA) mandatının təsdiqlənməməsi haqda suala cavab verərkən səsləndirmişdi: "Nəzərə alsaq ki, biz Avropa İnsan Hüquqları Məhkəməsinin hakimlərinin seçilməsində iştirak etmirik, buna görə həmin məhkəmənin qərarları bizim üçün hər hansı bir qüvvəyə malik deyil. Bu bizim mövqeyimizdir".

AŞPA ötən il yanvarın 24-də Azərbaycanın Avropa Şurasına üzvlükdən irəli gələn əsas öhdəliklərini yerinə yetirməməsini əsas gətirərək bu ölkənin deputatlarının etimadnamələrini təsdiqləməyib. Əsaslar kimi Azərbaycanda insan hüquqlarının vəziyyətinin pisləşməsi, jurnalistlərin həbsi, növbədənkənar prezident seçkisini müşahidə etmək üçün quruma dəvət göndərilməməsi, habelə Qarabağda hərbi əməliyyatlar göstərilib.

Assambleyada səsvermədən əvvəl qurumda iştirakını "qeyri-müəyyən müddətə" dayandıran Azərbaycan nümayəndə heyəti vurğulamışdı ki, baş verənlər ölkələrinin ərazi bütövlüyünü bərpa etməsinə görə aparılan qərəzli kampaniyanın bir hissəsidir.

Xatırlatma

A.İsrafilov 2023-cü ilin avqustunda saxlanılıb. O, Cinayət Məcəlləsinin 234.1-1-ci (narkotik vasitələri saxlama və yayma) maddəsi ilə ötən il aprelin 2-də Bakı Ağır Cinayətlər Məhkəməsində 3 il müddətinə azadlıqdan məhrum edilib. A.İsrafilov ittihamı qəbul etmir.

2022-ci ildə yaradılan "İşçi Masası" Həmkarlar İttifaqları Konfederasiyasının dörd üzvü – sədr Afiəddin Məmmədov, üzvləri Ayxan İsrafilov, Elvin Mustafayev və Möhyəddin Orucov hazırda həbsdədir. Onlar müxtəlif ittihamlarla üzləşsələr də, ittihamların hamısını qurama, siyasi sayırlar.

Azərbaycana kərə yağı idxalı artıb. Bu barədə Dövlət Gömrük Komitəsinin (DGK) məlumatında bildirilir. Qurum vurğulayır ki, bu ilin yanvar-aprel aylarında Azərbaycan 9 min 323 ton kərə yağı və süddən hazırlanmış digər yağlar idxal edib. Həmin həcmdə yağların idxal dəyəri 65 milyon 474 min ABŞ dolları göstərilib. Bu, ötən ilin eyni dövrü ilə müqayisədə həcm baxımından 1 min 387 ton (17.4 faiz), dəyər baxımından isə 24 milyon 499 min ABŞ dolları (59.7 faiz) çoxdur.

Azərbaycanda marqarin istehsalı artıb, kərə yağı azalıb

Kərə yağı idxalının artmasının səbəblərindən biri kimi onun ölkədə istehsalının azalması göstərilir. Bu ilin yanvar-aprelində Azərbaycanda 16.4 min ton marqarin istehsal edilib. Dövlət Statistika Komitəsinin (DSK) məlumatına görə, bu göstərici ötən ilin eyni dövrü ilə müqayisədə 478 ton və ya 3 faiz çoxdur.

Hesabat dövründə ölkədə 8.7 min ton kərə yağı istehsal edilib ki, bu da illik müqayisədə 223 ton, yaxud da 2.5 faiz azdır.

Üstəlik, iqtisadçılar deyir ki, daxili istehsalın özünü araşdırılmasına ehtiyac var. Onların fikrincə, daxili istehsal deyəndə bəzən söhbət təkcə qablaşdırmadan gedir. Onlar kərə yağı idxalının artmasında başqa amillərin də rolunu istisna etmirlər.

Ümumilikdə götürəndə Azərbaycanda idxalda kəskin artım var. Hesabat dövründə idxal təqribən 2 milyard 668 milyon dollar, başqa sözlə 48.8 faiz artaraq 8 milyard 133 milyon dollara çatıb. İdxalda əsas malları ət, süd, kərə yağı təşkil edir.

ABŞ dövlət katibi Marko Rubio 28 May - Müstəqillik Günü münasibətilə Azərbaycan xalqını təbrik edib. Bununla bağlı ABŞ Dövlət Departamentinin saytında onun adından bəyanat dərc olunub.

Bəyanatda bildirilib ki, ABŞ Azərbaycanın suverenliyini, müstəqilliyini və ərazi bütövlüyünü dəstəkləyir.

"Cənubi Qafqazın çiçəklənməsi üçün mühüm əhəmiyyət kəsb edən regionda sülh və sabitliyin təşviqi səylərini dəstəkləməyə davam edirik. Biz bu il Azərbaycan və Ermənistanın sülh müqaviləsinin mətni üzrə əldə etdiyi razılaşmanı alqışlayırıq. Həmçinin, Azərbaycanın enerji təchizatçısı və nəqliyyat qovşağı kimi artan əhəmiyyətini tanıyırıq".

Bəyanatda vurğulanır ki, son 33 il ərzində qurulmuş Azərbaycan-ABŞ tərəfdaşlığı təhlükəsizlik, enerji və iqtisadi inkişaf sahələrində ortaq maraqların irəliləməsinə xidmət edir: "Birləşmiş Ştatlar Azərbaycanda konstitusiyasına uyğun olaraq fundamental azadlıqları, o cümlədən mətbuat azadlığını dəstəkləməyə sadiqdir".

ABŞ Dövlət Departamentinin dünyada insan haqlarının vəziyyətinə dair illik hesabatlarında Azərbaycan hakimiyyəti, bir qayda olaraq, qanunsuz həbslər, məhbusların hüquqlarının pozulması, onlarla pis rəftar, hüquq-mühafizə orqanlarında korrupsiya və cəzasızlıq sisteminə görə tənqid olunur. Hökumətin insan haqları pozan məmurların cəzalandırılması üçün inandırıcı addımlar atmadığı vurğulanır.

Bütövlükdə götürəndə 2023-cü ilin noyabrından bəri Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Sonra onlardan bəzilərinin ittihamı daha bir neçə maddə ilə ağırlaşdırılıb. Söhbət külli miqdarda gəlir əldə etməklə qanunsuz sahibkarlıq, mütəşəkkil dəstə ilə qaçaqmalçılıq, vergidən yayınma, sənəd saxtalaşdırma və başqa ittihamlardan gedir. Amma onların hamısı bu ittihamları qəbul etmir, peşə fəaliyyətlərinə görə siyasi sifarişlə həbs olunduqlarını deyir.

Yerli hüquq-müdafiə təşkilatlarının hazırladığı siyahılara görə, hazırda Azərbaycan həbsxanalarında 360-dan çox siyasi məhbus var. Rəsmilərsə, bir qayda olaraq, vurğulayırlar ki, ölkədə heç kim peşə fəaliyyəti ilə bağlı, siyasi əsaslarla həbs edilmir.

Amerikalı senatorlar ABŞ Qlobal Media Agentliyinə (USAGM) bağlı jurnalistlərin müdafiəsi üçün dövlət katibi Mark Rubioya müraciət ünvanlayıblar: "Biz sizi İran, Vyetnam, Rusiya, Belarus, Azərbaycan və Myanma həbsxanalarında saxlanılan və ABŞ ilə əlaqəli jurnalistlərin azad olunmasının təmin edilməsi üçün tədbirlər görməyə çağırırıq. USAGM Azad Avropa/Azadlıq Radioları (RFE/RL), Azad Asiya Radiosu (RFA), Kuba Yayım Bürosu (OCB), Yaxın Şərq Yayım Şəbəkələri (MBN), "Amerikanın Səsi" (VOA) və Açıq Texnologiyalar Fondu (OTF) üçün qrantları dayandırdıqdan sonra bu şəbəkələrlə əlaqəli həbsdə olan jurnalistlərin unudulmaq və diqqətdən kənarda qalmaq riski ilə üz-üzə qalmasından narahatıq. Bu şəbəkələrin statusu qeyri-müəyyən olaraq qaldığı müddətcə onların müdafiəsi məsələsində Dövlət Departamentinin məsuliyyəti daha da artacaq".

Senatorlar müvafiq müraciət məktubunda xatırladıblar ki, USAGM ilə çalışmış beş əməkdaş hazırda Vyetnamda, ikisi Rusiyada, biri Belarusda, biri Azərbaycanda və ikisi Myanmada həbsdədir.

Senatorlar dövlət katibi Rubiodan xahiş ediblər ki, o, bu şəxslərin vəziyyəti ilə bağlı narahatlığı mütəmadi şəkildə ABŞ adından səsləndirsin və müvafiq qurumları - Demokratiya, İnsan Hüquqları və Əmək Bürosunu (DRL), Konsulluq İşləri Bürosunu (CA) və Girovlarla İş üzrə Xüsusi Nümayəndənin Ofisini (SPEHA) bu jurnalistlərin müdafiəsi üçün hərəkətə keçməyə təşviq etsin.

Senatorlar bu jurnalistlərin azad olunmasının təminatına dair konkret plan təqdim olunmasını istəyiblər.

Xatırlatma

AzadlıqRadiosunun jurnalisti F.Mehralızadə "Abzas Media"ya qarşı cinayət işi üzrə təqsirləndirilsə də, özü və bu media orqanının jurnalistləri onların arasında əməkdaşlıq olmadığını deyirlər. F.Mehralızadə, son ilyarımda həbs olunmuş jurnalistlər və fəallar kimi, qaçaqmalçılıq və digər maddələrlə ittiham olunur. Onların hamısı həbslərini peşə fəaliyyətləri ilə əlaqələndirirlər.

F.Mehralızadə deyir ki, onu AzadlıqRadiosunun Azərbaycan xidmətində yayımlanan iqtisadi mövzuda araşdırmalarına, təhlillərinə görə cəzalandırıblar. Onun fikrincə, həmin vaxt hökumət təmsilçiləri istintaqı davam edən "AbzasMedia" ilə bağlı cinayət işinə onu da qoşublar.

Bu gün, mayın 28-də Azərbaycan Xalq Cümhuriyyətinin yaranmasından 107 il keçir.

Rusiyada çarın devrilməsindən sonra, 107 il əvvəl Tbilisidə elan olunan Azərbaycan Xalq Cümhuriyyəti (AXC) 23 ay fəaliyyət göstərə bilib. 1920-ci il aprelin 27-də Rusiyanın silahlı təcavüzü ilə süqut edib. AXC paytaxtı Tbilisidən Gəncəyə, daha sonra 2018-ci il sentyabrın 15-də isə Bakının işğaldan azad edilməsi ilə ora köçürülmüşdü. Azərbaycanın indiki faktiki ərazilərini Rusiya 19-cu əsrin əvvəllərində işğal etmişdi.

Cümhuriyyətin bir çox qurucuları Azərbaycanın təkrar işğalından sonra mühacirət etmək məcburiyyətində qalıblar.

1991-ci il noyabrın 18-də Azərbaycan öz müstəqilliyini yenidən bəyan edib. Həmin vaxt Azərbaycan Respublikası Xalq Cümhuriyyətinin varisi elan edilib.

1992-ci ildən Azərbaycanda mayın 28-i Respublika, 2021-ci ildən isə Müstəqillik günü kimi qeyd edilir. Milli Məclisin 2021-ci il oktyabrın 15-də keçirilən iclasında "Müstəqillik Günü haqqında" yeni qanun layihəsi qəbul edilib. 28 May - Respublika Gününün və 18 Oktyabr - Dövlət Müstəqilliyi Gününün adı dəyişdirilib. Mayın 28-i Müstəqillik Günü, oktyabrın 18-i isə Müstəqilliyin Bərpası Günü elan olunub.

Embed paylaş

Bakıda sorğu: Azərbaycan Xalq Cümhuriyyətini quranlara layiqli qiymət verilirmi?

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

• Auto
• 240p
• 360p
• 480p
• 720p
• 1080p

No media source currently available

0:00 1:51 0:00

• Auto
• 240p
• 360p
• 480p
• 720p
• 1080p

Ötən il dövlət büdcəsindən "Formula-1 Azərbaycan Qran-Prisi" üçün 168 milyon manat vəsait xərclənib. Bu, 2024-cü il dövlət büdcəsinin icrası barədə illik hesabatda əksini tapıb.

2024-cü il dövlət büdcəsindən beynəlxalq, ölkə səviyyəli və bu qəbildən olan digər tədbirlərə ümumilikdə 195.9 milyon manat ayrılıb.

2016-cı ildən bəri "Formula 1" yarışlarına ev sahibliyi edən Azərbaycan bununla bağlı tədbirlərin təşkilinə milyon manatlarla vəsait xərcləyir. Lakin ümumilikdə rəqəmlərin detalları ictimaiyyətə açıqlanmır.

Rəsmilər, bir qayda olaraq, vurğulayırlar ki, beynəlxalq idman yarışları ölkəyə xeyli turist cəlb edir, büdcəyə milyonlarla gəlir gətirir.

Bəzi ekspertlər də gəlirin qazancdan dəfələrlə az olduğunu iddia edirlər.

Tənqidçilər isə bildirirlər ki, bu vəsait təhsil, səhiyyə, regional inkişaf kimi daha vacib sahələrə yönəldilə bilərdi.

"Formula 1"ə ayrılan vəsaitlər mənimsənilirmi?

Üstəlik, Azərbaycanda "Formula 1" ilə bağlı mənimsəmə iddialarından tək müxalifət təmsilçilərinin çıxışlarında yox, məhkəmə iddianamələrində də bəhs edilir. Elə bu il, martın 17-də Bakı Şəhər Halqası Əməliyyat Şirkətinin 400 min manata yaxın yeyintidə təqsirləndirilən keçmiş şöbə müdiri Çingiz Mehdiyevə 3 il sınaq müddəti olmaqla, şərti cəza verilib. Ç.Mehdiyev və vəkilləri məhkəmənin gedişində keçmiş gənclər və idman naziri Azad Rəhimovun oğlu Arif Rəhimzadənin çağrılıb dindirilməsi barədə vəsatət qaldırsalar da, təmin edilməyib. A.Rəhimzadə 2022-ci ilin oktyabrına kimi Bakı Şəhər Halqası Əməliyyat Şirkətinin icraçı direktoru olub. O, istintaq vaxtı şahid kimi dindirilib. Ancaq iş məhkəməyə göndəriləndə ittiham tərəfi məhkəmədə dindirilməsini istədiyi şahidlərin siyahısına onun adını salmayıb. Ç.Mehdiyev isə özünü təqsirli bilmir.

Bu il Azərbaycanda "Formula 1" yarışları sentyabrın 19-21-də keçiriləcək. Ona da nə qədər pul xərclənəcəyi açıqlanmır.

Azərbaycanda əsgər Fariz İsayevin ölümü araşdırılır. Bu gün, mayın 26-da Baş Prokurorluğun yaydığı məlumatda qeyd olunur ki, F.İsayevin ölüm faktı əsasında Sumqayıt Hərbi Prokurorluğunda cinayət işi açılıb və istintaq aparılır. Ancaq prokurorluq cinayət işinin hansı maddə ilə açıldığını, ölümün səbəbi və tarixini bildirməyib.

Hələlik, məsələ ilə bağlı əsgərin yaxınları ilə danışmaq mümkün olmayıb. Amma yerli saytların bildirməsinə görə, o, hərbi xidmətə yollanmasından bir ay sonra vəfat edib. Vurğulandığına görə, 20 yaşlı F.İsayev andiçmə mərasimindən sonra N saylı hərbi hissəyə göndərilib, üç gün sonra mayın 10-da vəfat edib.

Bəzi saytlarda isə yüksək qızdırması olan əsgərin vurulan iynədən sonra şoka düşüb vəfat etdiyi iddia olunur. Amma bu iddiaya nə Baş Prokurorluqdan, nə də başqa cavabdeh rəsmi qurumlardan münasibət bildirilib.

Xəzər Hərbi Tədqiqatlar İnstitutunun (XHTİ) məlumatına görə, 2025-ci ilin ilk rübündə Azərbaycanda azı 14 hərbi qulluqçu qeyri-döyüş şəraitində həyatını itirib. Amma bu rəqəmi, hələlik, rəsmi qurumlar ayrılıqda təsdiqləməyiblər.

İctimai fəal Nicat Əmiraslanova 15 sutka inzibati həbs cəzası verilib. Bu barədə AzadlıqRadiosuna fəalın yaxınları danışıb.

Yaxınlarının vurğulamasına görə, o, İnzibati Xətalar Məcəlləsinin 510-cu (xırda xuliqanlıq) maddəsi ilə məhkəməyə çıxarılıb.

Onların demələrinə görə, N.Əmiraslanovun həbsi 18 yaşlı Elgün İbrahimovun ölümü ilə bağlı bukletlərin paylaması ilə izah edilir: "Amma rəsmi məlumatımız yoxdur".

Mayın 13-nə keçən gecə Gəncə sakini, 18 yaşlı E.İbrahimov Texnologiya Universitetinə məxsus, hazırda istifadəsiz olan yataqxananın həyətində ağır vəziyyətdə tapılıb və xəstəxanaya yerləşdirilsə də, bir neçə saat sonra vəfat edib. Faktla bağlı cinayət işi açıldığı deyilsə də, hələlik, cinayətkarların tapılmaması sosial şəbəkələrdə tənqidlə qarşılanıb.

Lakin N.Əmiraslanovun etiraz aksiyası keçirilməsi ilə bağlı sosial şəbəkədə çağırışına rast gəlinməyib.

Hələlik, fəalın həbsi ilə bağlı Daxili İşlər Nazirliyindən də mövqe öyrənmək mümkün olmayıb.

N.Əmiraslanov əvvəllər müstəqil jurnalist kimi fəaliyyət göstərib. 2024-cü ildə NİDA Vətəndaş Hərəkatının fəalı olan Əmiraslanov iyunun 15-də, saxlanıldıqdan iki gün sonra sərbəst buraxılmışdı. O saxlanılmasını şərh etməsə də, yaxınları şiddət gördüyünü açıqlamışdı. Lakin bu, rəsmən təsdiqini tapmamışdı.

2017-ci ildə isə N.Əmiraslanov Qazax rayonunda 30 sutka inzibati qaydada həbs edilmişdi. Həmin vaxt sosial şəbəkələrdə onun saxlandıqdan sonra işgəncələrlə məruz qaldığı bildirilsə də, həmin iddiaları onda da rəsmi qurumlar təsdiqləməmişdi. Əmiraslanovun özü də həmin vaxt haqqında deyilənlərə münasibət bildirməmişdi.

Mayın 25-də Azərbaycan prezidenti İlham Əliyev Ukraynanın xarici işlər naziri Andrey Sibiqanı qəbul edib.

AZƏRATAC-ın xəbərinə görə, A.Sibiqa Azərbaycan dövlətinə Ukraynaya göstərilən humanitar yardımlarla bağlı təşəkkürlərini bildirib, xüsusilə İrpen şəhərində həyata keçirilən layihələrin (detalları açıqlanmır) əhəmiyyətini vurğulayıb.

Prezident İ.Əliyev isə öz növbəsində Azərbaycan tərəfindən Ukraynaya humanitar yardımın bundan sonra da davam etdiriləcəyini bildirib.

Söhbət zamanı Azərbaycanla Ukraynanın bir-birinin ərazi bütövlüyünü və suverenliyini daim dəstəklədikləri qeyd olunub.

İki ölkə arasında energetika, bərpaolunan enerji, nəqliyyat, ticarət, kənd təsərrüfatı sahələrində əlaqələrin perspektivlərinə dair fikir mübadiləsi aparılıb.

Mayın 25-də Azərbaycana səfər edən A.Sibiqa daha sonra xarici işlər naziri Ceyhun Bayramovla görüşüb.

Xatırlatma

2022-ci il fevralın 24-də Rusiya Ukraynaya yenidən təcavüzə başlayıb. 9 il əvvəl də Rusiya Ukraynanın bir hissəsini-Krımı tutmuşdu. Onda Rusiyaya sanksiyalar tətbiq edilməyə başlanmışdı. Yeni müharibədən sonra Qərb və dünyanın bir sıra ölkələri Rusiyaya sanksiyaları genişləndirib. Amma Azərbaycan bu sanksiyalara qoşulmur. Bununla belə, Ukraynaya humanitar yardım göstərildiyi açıqlanıb.

Başqa tərəfdən, 2022-ci il fevralın 22-də Moskvada "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə" imzalanıb. Bu sənəddə isə iki ölkə arasında siyasi, iqtisadi və daha bir çox sahələrdə əməkdaşlığın inkişaf etdirilməsindən bəhs olunur.

Avropa Siyasi Birliyinin növbəti zirvə toplantıları Yerevanda və Bakıda keçiriləcək. Bu barədə Avropa İttifaqı Şurasının prezidenti Antonio Koşta X platformasındakı paylaşımında yazıb.

Koşta bildirib ki, 2026-cı ildə səkkizinci zirvə toplantısına Ermənistan ev sahibliyi edəcək. 2028-ci ildə isə zirvə toplantısı Azərbaycanda keçiriləcək.

Avropa Siyasi Birliyinin toplantısı liderlər səviyyəsində baş tutur və ildə iki dəfə Birliyə üzv ölkələrdən birində keçirilir.

Koştanın sözlərinə görə, yeddinci zirvə toplantısı bu ilin oktyabrında Danimarkanın paytaxtı Kopenhagendə baş tutacaq.

Azərbaycan və Ermənistan bir-birinin namizədliyini dəstəkləyib

Ermənistan baş naziri Nikol Paşinyan bildirib ki, Bakı və Yerevan Avropa Siyasi Birliyinin sammitlərinə ev sahibliyi etmək üçün bir-birinin namizədliyini dəstəkləyib.

"Mən 2028-ci ildə Avropa Siyasi Birliyinin sammitinin Azərbaycanda keçirilməsi qərarını alqışlayıram. Ermənistan və Azərbaycanın bu sammitlərə ev sahibliyi etmək üçün bir-birinin namizədliyini qarşılıqlı dəstəklədiyini vurğulamaq vacibdir. Həmkarlarımı Yerevanda qəbul etməyi səbirsizliklə gözləyirəm", - Ermənistan hökumət başçısı mayın 23-də X platformasındakı paylaşımında qeyd edib.

Yerevanda keçiriləcək sammitdə Azərbaycanın, Bakıdakı sammitdə isə Ermənistanın iştirak edib-etməyəcəyi, hələlik, bəlli deyil.

Ötən ilin noyabrında Azərbaycanda keçirilən COP29 beynəlxalq iqlim konfransına Ermənistandan təmsilçi gəlməyib.

2025/2026-cı tədris ili üçün ali təhsil müəssisələrinə tələbə qəbulu planı 60 min 489 yer müəyyən edilib.

Bunu bu gün, mayın 23-də Dövlət İmtahan Mərkəzi İdarə Heyətinin sədri Məleykə Abbaszadə ixtisas qrupları üzrə ali təhsil müəssisələrinə qəbul imtahanlarının başlanması ilə bağlı keçirdiyi mətbuat konfransında deyib. Onun vurğulamasına görə, ötən illə müqayisədə plan yerləri 2.21 faiz (1 min 309 yer) artırılıb. Plan yerlərinin 28 min 401-i dövlət sifarişlidir. Dövlət sifarişli yerlərin sayı ötən illə müqayisədə 2.04 faiz və ya 568 yer artıb.

Bu rəqəmlərin təhlili göstərir ki, Azərbaycan ali məktəblərində ödənişsiz təhsil alanların sayı ümumu tələbələrin sayının 50 faizindən azdır.

Amma bundan illər öncə rəsmilərin verdiyi vədlərə görə, 2020-ci ildə bu rəqəm 50 faizə çatmalı idi. Bu hədəf sonrakı illərdə də dilə gətirilsə də, hələlik, ona çatmaq mümkün olmayıb.

Bununla belə, ali məktəblərdə dövlət sifarişi yerlərinin sayında son 10 ildə müəyyən artım müşahidə edilib. 2016-cı ildə ali məktəblərə qəbul planı üçün nəzərdə tutulan yerlərin cəmi 29 faizi ödənişsiz nəzərdə tutulmuşdu. 2020-ci ildə bu rəqəm artıq 45 faizə yaxınlaşmışdı.

Xatırlatma

2015-ci ildə Azərbaycanda dalbadal baş verən iki devalvasiyadan sonra manat iki dəfədən çox dəyər itirdi. Həmin vaxt Azərbaycan ali məktəblərində yerlərin 70-75 faizinin ödənişli olması vətəndaşlar arasında tənqidlərin səslənməsinə səbəb olmuşdu. Hətta ayrı-ayrı müxalif simalar vurğulayırdılar ki, ölkəyə böyük neft pullarının gəldiyi bir dönəmdə ali məktəblərdə yerlərin 70 faizinin ödənişli olması hökumətin antisosial siyasətinin göstəricisidir.

Avropa Şurası Parlament Assambleyasının (AŞPA) siyasi məhbuslar üzrə baş məruzəçisi Azade Royhan azərbaycanlı talış tarixçi və etnoqraf İqbal Əbilovun vətənə xəyanət ittihamı ilə məhkum edilməsinə dair mayın 22-də bəyanat yayıb.

"Talış Milli Akademiyası xəbərləri" jurnalının baş redaktoru, tədqiqatçı İ.Əbilova 18 il həbs cəzası kəsilib.

AŞPA-nın baş məruzəçisi bildirib ki, o, Əbilovun vətənə xəyanət və nifrətə təhrik ittihamları ilə 18 il müddətinə azadlıqdan məhrum edilməsi ilə bağlı məhkəmə hökmündən dərin narahatlıq keçirir.

"İttihamların faktiki əsası onun erməni alimlərlə peşəkar əlaqələrinə dayanır. Halbuki Əbilov tarixçi və etnoqraf kimi talış azlığının tarixi və mədəniyyəti üzrə tədqiqat aparıb", - o bildirib.

Məruzəçisi xatırladıb ki, akademik azadlıq tədqiqat aparmaq, bilik və həqiqəti maneəsiz yaymaq hüququ söz azadlığı hüququ ilə qorunur: "Akademik azadlıq demokratik cəmiyyətlərin təməl sütunlarından biridir və tədqiqatçılar hər cür siyasi müdaxilədən qorunmalıdır".

"Mən Azərbaycan hakimiyyətini Əbilova qarşı irəli sürülmüş ittihamları təcili şəkildə yenidən nəzərdən keçirməyə və onu — insan hüquqları müdafiəçiləri, jurnalistlər və akademiklər də daxil olmaqla — digər bütün şəxslərlə birlikdə azad etməyə çağırıram", - AŞPA-nın baş məruzəçisinin bəyanatında vurğulanır.

Buna da bax:

Araşdırıcı İqbal Əbilova 18 il həbs cəzası kəsildi