-
İlkin məlumata görə, Parisdə törədilmiş terror hücumları nəticəsində həlak olan və ya xəsarət alanlar arasında Azərbaycan vətəndaşı yoxdur.
Bunu ANS-ə açıqlamasında Azərbaycanın Fransadakı səfirliyinin mətbuat xidmətinin rəhbəri Nigar Hüseynova bildirib.
Onun dediyinə görə, səfirlik hadisəylə bağlı təhlükəsizlik tədbirlərini gücləndirib və qaynar xətt yaradıb:
«Bildiyiniz kimi, hadisə gecə radələrində törədilib. Biz də bununla bağlı dərhal qaynar xətt yaratmışıq. İndi bütün gücümüzü baş vermiş bu terror hadisələrində azərbaycanlının olub-olmadığını araşdırmağa səfərbər etmişik. Səfirlik olaraq, zərərçəkənlərə, xüsusən də, əgər bunlar Azərbaycan vətəndaşı olarsa, bacardığımız köməkliyi göstərməyə hazırıq», - qurum rəsmisi əlavə edib.
Noyabrın 13-də axşam saatlarında Parisdə törədilən silsilə partlayışlar və silahlı hücumlar azı 127 nəfərin həyatına son qoyub.