10:29
9.10.2013
ABŞ SƏFİRİ SEÇKİNİN GEDİŞATINI İZLƏYİR
ABŞ-ın Azərbaycandakı səfiri Richard Morningstar 20 saylı Nərimanov ikinci Dairə Seçki Komissiyasının 18 saylı məntəqəsində olub. Səsvermə üçün yaradılan şəraitlə tanış olub, müxtəlif partiyalardan olan müşahidəçilərlə söhbət edib. Səfir səsvermə prosesinin başlanmasını müşahidə edib.
10:34
9.10.2013
JURNALİSTİ MƏNTƏQƏDƏN ÇIXARDIBLAR
AzadlıqRadiosunun müxbirini 33 saylı Xətai seçki dairəsinin 23 saylı məntəqəsindən çıxardıblar.
Müxbir sənədlərini təqdim etsə də çəkilişə icazə verməyiblər, qapını isə arxadan bağlayıblar.
10:42
9.10.2013
SURAXANIDA KARUSEL BAŞLAYIB
32 saylı Suraxanı seçki dairəsinin 11 və 12 saylı məntəqələrdə karusel başlayıb. AzadlıqRadiosunun müxbiri xəbər verir ki, 15 nəfərdən ibarət 4-5 nəfərlik qrup hər iki məntəqədə bir neçə dəfə səs verir.
10:48
9.10.2013
FƏRƏC QULİYEV VƏ HAFİZ HACIYEV DƏ SƏS VERİB
Milli Dirçəliş Hərəkatı Partiyasından prezidentliyə namizəd Fərəc Quliyev 23 saylı Nəsimi-Sabail seçki dairəsinin 25 saylı məntəqəsində səs verib.
Fərəc Quliyev jurnalistlərə bildirib ki, onun seçki qərargahı heç bir qanun pozuntusu qeydə almayıb.
Müasir Müsavat Partiyasından prezidentliyə namizəd Hafiz Hacıyev 8 saylı Binəqədi seçki dairəsinin 31 saylı məntəqəsində səs verib.