Azərbaycan Xalq Cəbhəsi Partiyasının (AXCP-nin) həbsdəki üzvlərindən partiya sədri Əli Kərimlinin ictimai əsaslarla mühafizəçisi olmuş Niyaməddin Əhmədovun bir aydan çox sürən aclığını martın 30-da dayandırdığı bildirilir. AzadlıqRadiosuna AXCP-dən verilən bilgiyə görə, N.Əhmədov anasına görə aclığı dayandırmağa razılaşıb.
Partiyadan bildirilib ki, AXCP fəalının anası Hürü Əhmədova da oğlu ilə yanaşı aclıq etmək qərarı verib: "Deyib ki, övladıyla bərabər sonadək aclığı davam etdirəcək. Niyaməddin Əhmədov anasının bu qərarından xəbər tutandan sonra martın 30-da aclığı dayandırıb".
N.Əhmədovun yaxınları da bu bilgini AzadlıqRadiosuna doğrulayıblar.
Oğlunun saxlandığı 7 saylı Cəzaçəkmə Müəssisəsində ona qarşı rəftara, cəza rejiminin ağırlaşdırılmasına - 1 illik həbsxana rejiminə köçürülməsinə etiraz olaraq fevralın sonundan aclıq elan etdiyini atası Arif Əhmədov bildirmişdi.
Bu barədə deyilənlərə Penitensiar Xidmətdən açıqlama almaq mümkün olmayıb.
Daha öncəki açıqlamalarda Penitensiar Xidmət həbsxanalarda məhkumlarla pis davranıldığını, onların qanunsuz cəzalandırma şikayətlərini, bir qayda olaraq, yalanlayıb. Bu qurumdan bildirilib ki, məhkumların qanunvericilikdə nəzərdə tutulan bütün hüquqları təmin edilir.
Xatırlatma
N.Əhmədov 2020-ci ilin aprelindən həbsdədir. Öncə ona koronavirusla bağlı karantin rejimi qaydalarını pozmaq ittihamı ilə 30 sutka inzibati həbs cəzası verilmişdi. Bu cəza başa çatan günsə cinayət işi başlanmış, ona Cinayət Məcəlləsinin 214-1-ci (terrorçuluğu maliyyələşdirmə), 28.281-ci (dövlət əleyhinə yönəlik açıq çağırışlara hazırlıq) və 233-1-ci (qanunla mülki dövriyyədə olmasına yol verilməyən əşyaları əldə etmə, saxlama) maddələriylə ittiham verilmiş, sonda 13 il həbs cəzası kəsilmişdi.
Terroru maliyyələşdirməkdə suçlanan N.Əhmədov Almaniyada siyasi sığınacaq almış, sosial şəbəkələrdə Azərbaycan hökumətini kəskin ifadələrlə tənqid, bəzən də təhqir edən Qabil Məmmədovdan pul almaqda təqsirləndirilib.
N.Əhmədov bu ittihamın absurd olduğunu, Q.Məmmədovla Tovuz rayonunun Qazqulu kəndində qonşu olmalarından istifadə edərək belə bir ssenari quraşdırıldığını bildirib.
O vurğulayıb ki, həbsinin gerçək səbəbi Ə.Kərimlinin ictimai əsaslarla mühafizəçisi olmasıdır. N.Əhmədovun fikrincə, AXCP sədri 2019-cu il oktyabrın 19-da Milli Şuranın keçirdiyi etiraz aksiyasında tutularkən onu sonadək tək buraxmadığına görə cəzalandırılıb.
