ABŞ dekabrın 30-da Ukraynaya 5.9 milyard dollarlıq yardım paketinin ayrılacağını açıqlayıb və rəsmi Kiyevə yardımın "ola bildiyincə tez" artırılacağını vəd edib.
Yardım paketinin 1.25 milyard dolları Ukrayna ordusunun hərbi ehtiyacları, 1.22 milyard dollarlıq bölümü isə Ukraynanın güvənliyinə yardım təşəbbüsü (USAI) üçün nəzərdə tutulub.
Bundan bir neçə saat sonra isə xəzinədarlıq Ukraynaya birbaşa büdcə dəstəyi olaraq 3.4 milyard dollar ayrılacağını elan edib.
"Administrasiyama mümkün qədər tez və daha böyük yardımın göstərilməsinə təlimat verdim", - prezident Baydenin Ağ evin bəyanatında əksini tapan sözləridir.
Təlimatın məqsədi ABŞ-nin silah anbarlarındakı köhnə hərbi avadanlığı Ukraynaya ayırmaq və tez bir zamanda döyüş bölgəsinə çatdırmaq, eləcə də həmin anbarları müasir silahlarla yeniləmək üçün ABŞ-nin hərbi sənaye bazasını canlandırmaqdır.
Dəstəyin sürəcəyi vəd edilsə də, çox güman, bu, Baydenin prezidentlik dönəmində ayrılan sonuncu yardım paketi olacaq. İddiaya görə, prezident seçilmiş Donald Tramp rəsmi Kiyevi Rusiya ilə sülh sazişi bağlamağa təhrik etməkdən ötrü Ukraynaya silah tədarükünü önəmli ölçüdə azaldacaq və ya dayandıracaq.
"Mənim göstərişimlə Birləşmiş Ştatlar prezidentliyimin qalan müddətində Ukraynanın bu savaşda mövqeyini möhkəmləndirmək üçün yorulmadan çalışmağa davam edəcək", - Bayden belə deyib.
Trampın təntənəli andiçmə mərasimi yanvarın 20-də baş tutmalıdır.
Rusiya Pokrovsk bölgəsində şəhər ələ keçirib
Rusiya qoşunları dekabrın 29-da Donetsk vilayətində daha bir şəhərə nəzarəti ələ keçirib. Rusiya Müdafiə Nazirliyi bu bilgini yayıb və bildirib ki, strateji logistika qovşağı sayılan Pokrovskdan 16 km məsafədə yerləşən 6 min 300 nəfər sakini olan Novotroitskoye şəhəri tutulub.
Bilgini şərh etmək istəməyən Ukrayna hərbçiləri dekabrın 29-da axşam saatlarınadək düşmənin rekord sayda - 133 hücum gerçəkləşdirdiyinə diqqət çəkib.
Britaniya kəşfiyyatı hələ dekabrın 15-də Rusiya ordusunun Pokrovskun cənubuna doğru irəlilədiyini açıqlamışdı.
ABŞ Savaş Araşdırmaları İnstitutu (ISW) Rusiya ordusunun Donetsk və Dnepropetrovsk vilayətləri arasındakı inzibati sərhəddən 10 km aralıda olduğunu bildirib: "Vladimir Putin Pokrovska yox, sərhəd boyunca irəliləməklə bağlı hərbi rəhbərliyə basqı göstərə bilər".
Rusiya hücum edir, Ukrayna qorunur
Ukrayna ordusu ilin əvvəlində Rusiyanın Kursk bölgəsində ələ keçirdiyi bəzi ərazilərə nəzarəti əlində saxlamağa çalışır. Burada düşmənin 16 həmləsinin qarşısı alınıb. Rusiyalılar Ukraynanın cənubundakı Nikolayev bölgəsinə də hücumlarını gücləndiriblər.
Bölgə administrasiyasının bilgisinə görə, dekabrın 29-da İran istehsalı olan 9 "Şahed" PUA-sı vurulub. Yerə düşən PUA qalıqları hədəflərdən biri olan enerji infrastrukturu obyektinə çırpılıb. Nəticədə müəssisədə yanğın başlanıb və bir nəfər yaralanıb.
Bir gün öncə Nikolayev şəhərinə buraxılan 16 PUA zərərsizləşdirilmişdi.
Savaş başlanandan bəri hər iki tərəf ard-arda qarşılıqlı PUA hücumları gerçəkləşdirir. Rusiya özəlliklə qış mövsümündə Ukraynanın enerji infrastrukturu obyektlərini hədəfə alır. Çoxsaylı sübutlar olsa da, rəsmi Moskva mülki infrastruktur obyektlərinin hədəfə alınmasını danır.
"Resurs bazasının yarısı"
Ukraynanın sabiq Baş Qərargah rəisi Viktor Mujenko AzadlıqRadiosuna müsahibəsində deyib ki, Ukraynanın bir hissəsini Rusiya nəzarəti altında nəzərdə tutacaq istənilən atəşkəs sazişi Kremlin qələbəsi sayılacaq.
O, Donetsk və Luqanskın bütövlükdə, Zaporojye və Xerson bölgələrininsə bir bölümünün itirilməsinin "təkcə ərazi yox, həm də ölkənin resurs bazasının yarısının itirilməsi" anlamına gəldiyini vurğulayıb.
Bu arada, Danimarka, Fransa və Litva Ukraynanın müdafiə sənayesini maliyyələşdirmək üçün əlavə 150 milyon avro yardım ayırıb. Bu vəsait raket, PUA və artilleriya qurğularının istehsalı üçün nəzərdə tutulub.
Almaniyaya gəlincə, ölkənin yeni hökumətinin Ukraynaya hərbi yardımı dayandıracağı gözlənilmir.
"Özünü Almaniya və Avropanın güvənliyinə həsr edən heç bir alman hökuməti ukraynalıları tək qoymayacaq", - bu yaxınlarda vəzifəsini tərk edəcək Almaniya xarici işlər naziri Annalena Berbok belə deyib.
Rəsmi Berlin Ukraynaya ağır silahlar göndərməsə də, ABŞ-dən sonra rəsmi Kiyevə ən çox yardım göstərən ikinci ölkədir.
