ABŞ prezidenti Donald Tramp Rusiyanı hədələyib. O deyib ki, Moskva onun atəşkəs təşəbbüslərini bloklayarsa, o zaman Rusiyanın neft məhsullarına yeni gömrük rüsumları tətbiq edəcək. Tramp, eyni zamanda, Ukrayna lideri Volodimir Zelenskiyə də xəbərdarlıq edib. Onun sözlərinə görə, Zelenski Vaşinqtonla nadir torpaq minerallarına dair müqaviləni imzalamasa, "böyük, böyük" problemlərlə üzləşəcək.
"O, nadir torpaq mineralları sazişindən geri çəkilməyə çalışır və bunu etsə, bəzi problemləri, böyük, böyük problemləri olacaq", - Tramp martın 30-da jurnalistlərə bildirib.
"Nadir torpaq minerallarına dair bir saziş hazırladıq. İndi isə o deyir ki, "bilirsiniz, mən bu sazişi yenidən müzakirə etmək istəyirəm". O, NATO-nun üzvü olmaq istəyir, amma heç vaxt NATO-nun üzvü olmayacaq. O, bunu başa düşür", – Tramp əlavə edib.
Vaşinqtonun müvafiq sazişin şərtlərini bir neçə dəfə dəyişdirməsi ilə bağlı mətbuatda yayılan xəbərlər fonunda martın 28-də Ukrayna hökuməti hələ də saziş layihəsini nəzərdən keçirdiyini bildirib.
Ukraynanın iqtisadiyyat naziri Yuliya Sviridenko hökumətin iclasında bəyan edib ki, Kiyev sazişlə bağlı mövqeyini formalaşdırır. O, bundan əvvəl sazişlə bağlı hökumət daxilində konsensus olmadan ictimai müzakirənin zərərli olacağını əlavə edib.
Ukrayna əhəmiyyətli kritik mineral yataqlarına malikdir, lakin onların dəqiq həcmi hələ dəqiq müəyyən edilməyib. Nadir torpaq elementləri müdafiə texnologiyalarında, eləcə də kompüterlər, smartfonlar və batareyalar kimi cihazlarda istifadə edildiyinə görə yüksək dəyərə malikdir.
Bu ayın əvvəlində Kiyev və Vaşinqton Ukraynanın kritik mineral resurslarının inkişafına dair əhatəli bir saziş bağlamaq barədə razılığa gəlib. Sazişin yekunlaşdırılması ilə bağlı səylər daha əvvəl, fevralın 28-də Ağ evdə Tramp və Zelenski arasında gərgin mübahisədən sonra uğursuzluğa düçar olmuşdu.
Putinə qarşı daha sərt ton
Martın 30-da Tramp bildirib ki, əgər o, prezident Putinin onun Ukraynadakı müharibəni bitirmək səylərini əngəllədiyi hiss edərsə, Rusiya neftinə 25-50 faiz həcmində əlavə tariflər tətbiq edəcək.
"NBC News"a telefon müsahibəsində Tramp Putinin Ukraynada keçid hökumətinin qurulmasını təklif etməsinə çox qəzəbləndiyini və əsəbiləşdiyini deyib.
"Əgər Ukraynada qan tökülməsini dayandırmaq üçün Rusiya və mən razılığa gələ bilməsək və bunun Rusiyanın günahı olduğunu düşünsəm – bu, belə olmaya da bilər, amma əgər mən belə hesab etsəm, - o zaman Rusiyadan çıxan neftə əlavə tariflər tətbiq edəcəyəm", – Tramp bildirib. "Bu o deməkdir ki, əgər siz Rusiyadan neft alırsınızsa, ABŞ-də biznes apara bilməyəcəksiniz. Bütün neftə 25 faiz tarif tətbiq ediləcək, neft üçün 25-50 faizlik tarif olacaq".
Ağ ev martın 25-də elan edib ki, Rusiya və Ukrayna Qara dənizdə ticarət gəmiçiliyi üçün maneəsiz keçid, eləcə də qarşılıqlı olaraq enerji obyektlərinə hücum etməmək barədə razılığa gəlib.
Kiyev bildirib ki, atəşkəs dərhal qüvvəyə minəcək. Lakin Moskva bunun üçün beynəlxalq ərzaq ticarətində iştirak edən Rusiya şirkətləri və banklarına tətbiq olunan sanksiyaların qismən ləğvini tələb edir.
Trampın bu şərhləri Ağ evin Rusiyaya qarşı daha yumşaq yanaşmasında bir dəyişiklik olduğunu göstərir.
Tramp "NBC" telekanalına bildirib ki, o, bu həftə ərzində Putinlə danışacaq.
