Azərbaycan XİN-dən Türkiyə hadisələrinə reaksiya
Bəyanatda qonşu ölkədə baş verənlər «demokratik yolla Türkiyə xalqının seçdiyi hökumətə qarşı bir qrupun etdiyi çevriliş cəhdi» adlandırılır: «Türkiyə milləti və dövləti birlik və bərabərlik nümayiş etdirərək, buna qarşı çıxmışdır».
Bəyanatda Azərbaycanın Türkiyə xalqı və dövlətinin yanında olduğu bəyan edilir, tezliklə vəziyyətin tam sabitləşəcəyinə və normallaşacağına əminlik ifadə olunur.
Tava vs. Tank
Ölkə, deyəsən, ötən gecədən sonra özünə gəlir. Sosial şəbəkələrdə artıq zarafatlaşırlar. «Buna bax e, əlində tavalar tutan xalq tank və vertolyotla gələn xuntadan daha çox tab gətirdi :)» - uzun müddət İstanbulda yaşamış bir qız yazır.
General xilas edilib
Türkiyə Silahlı Qüvvələrinin Baş Qərargah rəisi Hulusi Akar girovluqdan azad edilib.
Bu məqsədlə onun saxlanıldığı Akıncılar hərbi bazasında xüsusi əməliyyat keçirilib.
NTV onun etibarlı bir yerə aparıldığını xəbər verir.
Türkiyə Hava Qüvvələrinin bazası olan Akıncı Ankaradan 35 km aralıda yerləşir.
Neftin qiyməti qalxır
Türkiyədə hərbi çevriliş cəhdindən sonra neftin qiyməti qalxıb.
«Brent» neftinin barreli 1.01 faiz bahalanaraq 48.09 dollara bərabərləşib. ABŞ Qərbi Texas nefti isə 0.72 faiz qalxaraq, barreli 46.28 dollara bərabər olub.
«Reuters» agentliyi qeyd edir ki, Türkiyə böyük neft istehsalçısı olmasa da, buradan neft kəmərləri keçir. Yaxın Şərqdə sabitsizlik yarananda isə, neft, adətən, bahalanır.
«Again Capital» şirkətinin təsisçisi John Kilduff də CNBC-yə deyib ki, neftin bahalanması sırf Türkiyədə baş verənlərlə bağlıdır.