Moskvanın Ukraynaya qarşı başlatdığı genişmiqyaslı işğal müharibəsinin ilk dönəmində Rusiya qüvvələrinin törətdiyi ən dəhşətli vəhşiliklərə səhnə olan Kiyev ətrafında yerləşən Buça şəhərinin Ukrayna ordusu tərəfindən azad edilməsindən üç il keçir. Ancaq hələ də bu şəhərdən olan ən azı 33 mülki şəxs Rusiyada həbsdə saxlanılır.
Onlardan biri 2022-ci ildə yüzlərlə ukraynalı mülki şəxsin və hərbi əsirlərin həyatına son qoyan Buça qırğını zamanı Rusiya qoşunlarının yaraladığı və əsir götürdüyü Vladislav Popoviçdir. Vladislavın anası Tatyana Popoviç oğlunun Rusiya həbsxanasından azad olunaraq Ukraynaya qayıtması üçün mübarizəni davam etdirir.
2022-ci ilin martın 2-də Vladislav ayağından vurulub və itkin düşüb. "Rus qoşunları onlara atəş açmağa davam edirdilər, halbuki onlar diz çökərək əllərini yuxarı qaldırmışdılar", - Tatyana işğal zamanı vaxtilə Rusiyanın nəzarət-buraxılış məntəqəsi olan yeri göstərərək xatırlayır.
Əvvəlcə Tatyana oğlunun qaçaraq evlərinin yaxınlığındakı bir həyətdə gizləndiyini düşünüb. Lakin tezliklə ana oğlunun yoxa çıxdığını anlayıb.
Rusiya Müdafiə Nazirliyinə müraciət etdikdən bir neçə ay sonra o, Vladislavın Kurskda bir Rusiya həbsxanasında saxlanıldığını öyrənib.
2023-cü ildə o, oğlundan bir məktub alıb və o vaxtdan bəri Tatyana övladından xəbər ala bilmir.
"Təcrid vəziyyətində saxlanılırlar"
İnsan haqları təşkilatları və hüquq ekspertləri Rusiyanın bu əməllərinin müharibə cinayəti təşkil etdiyini bildirir.
"İnsan Hüquqları üzrə Media Təşəbbüsü" təşkilatının təmsilçisi Anastasiya Panteleyevanın sözlərinə görə, Moskva V.Popoviçi saxlamaqla beynəlxalq hüququ pozur: "Mülki şəxslər oğurlana, öz ölkələrindən aparıla bilməz. Ukraynanın şimal bölgələrində əsir götürülən bütün mülki şəxslər tamamilə təcrid olunmuş vəziyyətdə saxlanılır".
BMT-nin İnsan Haqları Şurasının son hesabatına əsasən, Rusiyanın ukraynalı mülki şəxsləri məcburi şəkildə yoxa çıxarması "genişmiqyaslı və sistematik" xarakter daşıyır.
Acı reallığa baxmayaraq, Ukrayna hökuməti mülki şəxslərin azad edilməsi üçün diplomatik səylərini davam etdirir.
Yazı AzadlıqRadiosunun "Amerikanın Səsi" ilə əməkdaşlıq çərçivəsində idarə etdiyi rusdilli xidməti - "Current Time" tərəfindən hazırlanıb.
