Türkiyə hakimiyyəti prezident Rəcəb Tayyib Ərdoğanın əsas siyasi rəqibi sayılan İstanbul Böyük Şəhər Bələdiyyəsi başqanı Əkrəm İmamoğlunu saxlayıb.

AFP xəbər verir ki, polis İmamoğlunu martın 19-u səhər tezdən evinə reyd zamanı saxlayıb və o, hazırda qurumun baş qərargahında tutulur.

Dövlət "Anadolu" agentliyinin məlumatına görə, prokurorlar onun, o cümlədən iş adamları və jurnalistlərin də olduğu 100-ə yaxın şəxsin saxlanması barədə göstəriş verib. Onlara cinayətkar təşkilata rəhbərlik, üzvlük, hədə-qorxu ilə tələb etmə, rüşvət alma, şəxsi məlumatların qanunsuz əldə edilməsi və tender nəticələrinin saxtalaşdırılması maddələri ilə ittihamlar verilib.

Prokurorluğun iddiasına görə, Ə.İmamoğlu və "bir çox başqa şəxslər" iş adamlarını pul verməyə məcbur ediblər, haqsız qazanc əldə ediblər, cinayət fəaliyyətindən qazanılan vəsaitləri yuyublar. Qurum Ə.İmamoğlunu "cinayətkar təşkilatın lideri" adlandırır.

İmamoğlunun özü tutulmazdan əvvəl X hesabında yazıb: "Xalqın iradəsi hədə-qorxu və ya qeyri-qanuni hərəkətlərlə boğula bilməz. Mən taleyimi təkcə İstanbulun 16 milyon əhalisinə deyil, həm də Türkiyənin 86 milyon vətəndaşına, bütün dünyada demokratiya və ədaləti dəstəkləyən hər kəsə tapşırıram. Əsas hüquq və azadlıqlar uğrunda mübarizəmdə əzmkaram".

Bir gün əvvəl, martın 18-də İstanbul Universiteti "açıq-aşkar səhv"i əsas gətirərək Ə.İmamoğlunun diplomunu ləğv edib. Medianin məlumatına görə, bu, onu prezident seçkisində iştirak imkanından məhrum edir, çünki namizədin universitet diplomu olmalıdır. İmamoğlu bu qərarı qanunsuz və akademik sistemə siyasi müdaxilə adlandırıb.

Türkiyədə növbəti prezident seçkisi 2028-ci ilə təyin edilib. Müxalifətdə olan Cümhuriyyət Xalq Partiyası (CHP) seçkilərin erkən keçirilməsini tələb edir. Bu məqsədlə bir neçə gün sonra partiyanın namizədinin müəyyən edilməsi ilə bağlı seçki olmalı idi.

• Bir il əvvəl Ə.İmamoğlu İstanbul Böyük Şəhər Bələdiyyəsinə seçkilərdə qalib gəlib. Həmin vaxt bələdiyyə seçkilərində müxalif CHP nümayəndələri İstanbul və Ankara da daxil olmaqla, Türkiyənin 30-dan çox bölgəsində səslərin çoxunu qazanıblar.
• İstanbul 15 milyondan çox əhalisi ilə Türkiyənin ən böyük şəhəridir. 2023-cü il prezident seçkisindəki qələbəsindən və müxalifət koalisiyasının dağılmasından sonra R.T.Ərdoğan İstanbulu hakim Ədalət və İnkişaf Partiyasının (AKP) nəzarətinə qaytarmağa ümid edirdi.

Martın 18-də "Neft Daşları"nda kran tarazlığını itirərək dənizə düşüb.

Azərbaycan Dövlət Neft Şirkətinin (SOCAR) "Azneft" İstehsalat Birliyindən (İB) bu barədə məlumatları ölkənin yerli saytlarına təsdiqləyiblər.

Məlumata görə, saat 16:25 radələrində "Azneft" İB-nin "Neft Daşları" Neft və qazçıxarma idarəsinin 4 saylı Neft və qazçıxarma sahəsində təmir işləri zamanı "Libher Gravleer" tırtıllı kranı tarazlığını itirərək dənizə düşüb.

Hadisə nəticəsində kranın maşinistinin həlak olduğu bildirilir.

Rəsmi məlumata həlak olan maşinistin yaxınlarından münasibət almaq mümkün olmayıb.

Xatırlatma

Son 10 ildə Xəzərdə neftçilər bir sıra ağır faciələrlə üzləşiblər. 2016-cı il dekabrın 15-də qasırğanın Nərimanov adına Neft Qaz Çıxarma İdarəsinin estakadasını uçurması nəticəsində 10 neftçinin dənizə düşdüyü açıqlanmışdı. Onlardan birinin həmin gün, bəzilərinin isə sonrakı günlər cəsədi tapılıb ailəsinə verilib.

Həmin vaxt bir çox sosial şəbəkə istifadəçiləri SOCAR rəhbərliyini önləyici təhlükəsizlik tədbirləri görməməkdə qınamışdı.

2015-ci il dekabrın 4-də isə "Günəşli" yatağında yanğın baş vermişdi. Həmin vaxt 64 neftçidən yalnız 34-ü xilas edilib. Onda da hava şəraitinin əlverişsiz olduğu bildirilirdi.

Bu gün, martın 18-də Xətai rayon Məhkəməsində hakim Sülhanə Hacıyevanın sədrliyi ilə həbsdə olan media eksperti, "Toplum" İnternet Televiziyasının təsisçisi Ələsgər Məmmədlinin ev dustaqlığına buraxılması ilə bağlı müdafiə tərəfinin vəsatətinə baxılıb. Vəsatətə təmin edilməyib.

Yaxınlarının verdiyi məlumata görə, Ə.Məmmədli məhkəmə iclasında geniş çıxış edib. Media ekspertinin deməsinə görə, bundan öncəki bütün məhkəmə iclaslarında istintaq tərəfi iddia edib ki, əgər o, azadlıqda olsa, istintaqın gedişinə əngəl törədə, yaxud sübutları yox edə bilər. Ə.Məmmədli vurğulayıb ki, artıq istintaq başa çatıb və işlə tanışlıq mərhələsi də yekunlaşıb.

Media ekspertinin sözlərinə görə, istintaqın materialları ilə tanış olanda aydın olub ki, onun həbsinə əsas olacaq heç bir fakt və sübut yoxdur.

Yaxınlarının əlavə etməsinə görə, o habelə səhhətindən danışıb və əməliyyat olmasının vacibliyindən bəhs edib.

Lakin hakim S.Hacıyeva Ə.Məmmədlinin həbsi ilə bağlı qərarı qüvvədə saxlayıb.

19 fevral

Ələsgər Məmmədli istintaq materialları ilə tanış olub, həbsini 'qanunsuz' sayır

Həbsdə olan media eksperti Ələsgər Məmmədli təsisçisi olduğu "Toplum" İnternet Televiziyası ilə bağlı açılmış cinayət işinin istintaq materialları ilə tanış olub və "məhkəmədə azacıq ədalət olacağı təqdirdə bütün ittihamları puç edəcəyinə inanır".

Bunu fevralın 18-də Ə.Məmmədli ilə telefonda danışan qardaşı Nəsimi Məmmədli bildirib: "Ələsgər bəy bildirdi ki, 11 aydan çoxdur davam edən istintaq yekunlaşıb. Həbsinin qanunsuz olmasına etiraz əlaməti olaraq bu müddət ərzində heç bir ifadə verməyib".

Qardaşının sözlərinə görə, hər biri 300 vərəqdən ibarət olmaqla 23 cild qovluq, əlavə qeydlər və ifadələrlə birlikdə ümumilikdə 10 min səhifədən çox istintaq materialları ilə tanış olmaq üçün beş gün sərf edib.

"Deməsinə görə, 50 nəfərdən çox şəxs istintaqa çağrılıb və dindirilib. Bütün ifadələrlə tanışdır. İstintaq materiallarının özü ilə bağlı hissələrindən və prosessual pozuntulardan ibarət 21 qeyd götürüb. Hər biri ilə bağlı əminliklə bildirdi ki, onun həbsdə saxlanması tamamilə qanunsuzdur", - N.Məmmədli bildirib.

Bu fikirlərə istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.

+++

Ə.Məmmədli ötən il martın 8-də həbs olunub. Xətai rayon Məhkəməsi onun barəsində 4 aylıq həbs-qətimkan tədbiri seçib. Daha sonra qətimkan tədbirinin müddəti uzadılıb.

Ə.Məmmədli Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ittiham olunur. O, özünü təqsirli bilmir və həbsini peşə fəaliyyəti ilə əlaqələndirir.

Xatırlatma

Ümumilikdə 2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Bu gün, martın 18-də hüquq müdafiəçisi Rüfət Səfərov barəsində seçilmiş həbs-qətimkan tədbirinin uzadılması ilə bağlı istintaq orqanından verilən təqdimata baxılıb.

Binəqədi rayon Məhkəməsinin qərarına əsasən, R.Səfərovun həbs müddəti mayın 3-dək uzadılıb.

Buna da bax:

Rüfət Səfərov: 'Qanun və hüququn dəfn olunduğu ölkədə məni nələr gözlədiyini bilirəm'

7 yanvar

Rüfət Səfərovun anası onun ölkədən çıxışına qadağanın götürüldüyünü deyir

Həbsdə olan hüquq müdafiəçisi Rüfət Səfərovun anası Tahirə Tahirqızı ölkədən çıxışına məhdudiyyətin götürüldüyünü bildirir. Onun sözlərinə görə, bu gün, yanvarın 7-də o, ağır xəstə olan həyat yoldaşı Eldar Sabiroğlu ilə birlikdə Türkiyəyə yola düşüb.

Onların artıq Türkiyədə olduğu bildirilir.

Məsələ ilə bağlı istintaqı aparan Daxili İşlər Nazirliyi ilə danışmaq mümkün olmayıb.

6 dekabr

Rüfət Səfərovun anası ifadəyə çağrılıb

Həbsdə olan hüquq müdafiəçisi Rüfət Səfərovun anası Tahirə Tahirqızı oğluna qarşı qaldırılan cinayət işi üzrə istintaqa çağırıldığını bildirib. Yanvarın 6-da o, şahid qismində ifadə vermək üçün Bakı şəhər Baş Polis İdarəsinə çağrılıb.

T.Tahirqızının sözlərinə görə, o, qanunvericiliyə uyğun olaraq ifadə verməkdən imtina edib və oğlunun şərləndiyini deyib: "Müstəntiqə ölkədən çıxmağıma qadağa qoyulması ilə bağlı sual verdim, amma heç bir cavab ala bilmədim".

Hüquq müdafiəçisinin anası vurğulayıb ki, həyat yoldaşı Parkinson xəstəliyindən əziyyət çəkir və hər yarım ildən bir Türkiyədə müayinədən keçir: "Yanvarın 7-də də müayinəyə getməli idik, amma ölkədən çıxışına qadağa qoyuldu. Amma ümid edirəm ki, oğlumun həbsinin sifarişçiləri humanizm göstərəcəklər və onun atasının xaricə getməsinə imkan verəcəklər".

T.Tahirqızının açıqlamasına istintaqdan münasibət almaq mümkün olmayıb.

Rüfət Səfərovun anasının ölkədən çıxışına 'stop' qoyulduğu deyilir

Həbsdə olan hüquq müdafiəçisi Rüfət Səfərovun anası Tahirə Tahirqızının ölkədən çıxışına məhdudiyyət qoyulduğu bildirilir. Bu barədə Səfərovun ailəsindən məlumat veriblər.

"Tahirə xanımın ölkədən çıxışına Daxili İşlər Nazirliyi qadağa qoyub. Tahirə xanım həyat yoldaşı Eldar Səfərovun Türkiyədə həkim müayinəsindən keçirilməsi üçün İstanbula getməli idi. Amma yanvarın 4-də onun çıxışına məhdudiyyət qoyulduğunu öyrənib. Rüfətin atası Eldar Səfərovun vəziyyəti kəskin şəkildə pisləşməsinə baxmayaraq, onu Türkiyəyə aparmaq, hələlik, mümkün olmayıb", - Səfərovlar ailəsindən deyiblər.

R.Səfərovun özü də saxlandığı təcridxanasından Daxili İşlər Nazirliyinə müraciət edib. O, anasının xəstə atası E.Səfərovla birlikdə ölkədən xaricə çıxmasına icazə verilmədiyini vurğulayaraq "nə etməyə çalışırsınız" deyə sual edib.

Hələlik, bütün bu deyilənlərə Daxili İşlər Nazirliyinin özündən münasibət almaq mümkün olmayıb.

"Müdafiə Xətti" hüquq-müdafiə təşkilatının icraçı direktoru, hüquq müdafiəçisi R.Səfərov ötən il, dekabrın 3-də axşam saatlarında saxlanıb. Ona qarşı Cinayət Məcəlləsinin 221.1 (xuliqanlıq), 178.3.2 (dələduzluq-külli miqdarda ziyan vurmaqla törədildikdə) və 127.2.3-cü (qəsdən sağlamlığa az ağır zərər vurma) maddəsi ilə ittiham irəli sürüldüyü açıqlanıb. Dekabrın 4-də Binəqədi rayon Məhkəməsi R.Səfərov barəsində 4 ay müddətinə həbs-qətimkan tədbiri seçib. O, ittihamları qurama sayır.

Xatırlatma

Zərdab rayon Prokurorluğunun keçmiş müstəntiqi R.Səfərov 2015-ci ilin sonunda Azərbaycan hakimiyyətini insan haqlarının pozulmasında və ölkədə qanunsuzluqlarda ittiham etdikdən sonra istefaya çıxıb. O bundan sonra rüşvət almaq ittihamı ilə həbs edilib. 2016-cı ilin sentyabrında Lənkəran Ağır Cinayətlər Məhkəməsinin qərarı ilə 9 il müddətinə azadlıqdan məhrum edilib.

Keçmiş müstəntiq ona qarşı irəli sürülən ittihamları rədd edib. 2019-cu ildə əfv sərəncamı ilə azadlığa çıxıb. Daha sonra o, hüquq müdafiəsi fəaliyyətinə başlayıb.

Polşa, Estoniya, Latviya və Litva piyadalar əleyhinə minaların qadağan olunması haqqında Ottava Konvensiyasından geri çəkilməyə hazırlaşır.

Müvafiq qərarla bağlı bu ölkələrin müdafiə nazirləri birgə bəyanat yayıb.

Bəyanatda bildirilib ki, bu Konvensiyanın ratifikasiyasından bəri regionda təhlükəsizlik vəziyyəti əsaslı şəkildə pisləşib.

Müdafiə nazirləri vurğulayıb ki, Rusiya və Belarusla həmsərhəd olan NATO dövlətləri üçün hərbi təhdidlər xeyli artıb: "Bu mülahizələri nəzərə alaraq, biz – Estoniya, Latviya, Litva və Polşanın müdafiə nazirləri yekdilliklə Ottava Konvensiyasından çıxmağı tövsiyə edirik. Bu qərarla biz açıq mesaj veririk: ölkələrimiz ərazimizi və azadlığımızı müdafiə etmək üçün hər cür tədbirə hazırdır".

Piyadalar əleyhinə yerüstü minaların istehsalına, daşınmasına və istifadəsinə qadağa qoyulması haqqında Ottava Konvensiyası 1997-ci ildə qəbul edilib. Konvensiyaya 160-dan çox ölkə qoşulub. Azərbaycan və Ermənistan da daxil olmaqla 34 ölkə Konvensiyaya qoşulmayıb. Aİ-də daxil olmaqla, müxtəlif beynəlxalq qurumlar hər iki ölkəyə Konvensiyaya qoşulmaqla bağlı çağırışlar edib.

Azərbaycanda xüsusi karantin rejimi 2025-ci il iyulun 1-nə kimi uzadılıb.

Baş nazir Əli Əsədov bununla bağlı bu gün, martın 18-də qərar imzalayıb.

Azərbaycanda karantin müddəti aprelin 1-də başa çatırdı.

Baş nazirin qərarında bu belə izah edilib: "Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə…".

Koronavirus pandemiyası ilə bağlı Azərbaycanda 2020-ci ilin martından karantin rejimi elan edilib. Bu arada onun müddəti bir çox dəfə uzadılıb. Yoluxma sayından asılı olaraq zaman-zaman rejim sərtləşdirilsə də, sonra yenə yumşaldılıb.

Ümumdünya Səhiyyə Təşkilatı (ÜST) 2023-cü ilin mayından bu pandemiyanın başa çatdığını elan edib. Azərbaycanın özündə də son illər bu virusa yoluxma kəskin azalıb. Son vaxtlar isə, ümumiyyətlə, bu virusa yoluxma ilə bağlı hər hansı statistika açıqlanmır.

Koronavirusla bağlı 2020-ci ilin yazından Azərbaycanın quru sərhədlərində gediş-gəliş məhdudlaşdırılıb. Bu hal hələ də davam edir. Ölkənin bir sıra müxalifət partiyaları pandemiyanın başa çatdığını vurğulayaraq məhdudiyyətlərin götürülməsini tələb edir.

Dövlət başçısı və bəzi deputatlar isə son dönəmlər açıqlamalarında sərhəddə məhdudiyyətlərin saxlanmasını Nazirlər Kabinetindən fərqli olaraq təhlükəsizlik amili ilə izah edirlər. Amma hakimiyyətin opponentləri vurğulayırlar ki, təhlükəsizliklə bağlı sərhəddə məhdudiyyətin saxlanması hökumətin acizliyi sayıla bilər. Onların fikrincə, əslində məqsəd hakimiyyətdəkilərin iqtisadi və siyasi maraqlarına söykənir.

Xatırlatma

2019-cu ilin sonlarında dünyada yeni koronavirus aşkar edilib. 2020-ci il martın 11-də ÜST koronavirusu pandemiya elan edib. Dünyada sürətlə yayılan bu virusdan 7 milyona yaxın şəxsin vəfat etdiyi açıqlanıb. Azərbaycanda isə, son statistikalara görə, 834 mindən çox insanın bu virusa yoluxduğu, onlardan 10 min 400-nün vəfat etdiyi bildirilir.

Respublika Endokrinoloji Mərkəzinin vəzifəli şəxsləri ilə bağlı cinayət işi başlanıb.

Bu barədə Baş Prokurorluq və Tibbi Ərazi Bölmələrini İdarəetmə Birliyi (TƏBİB) bu gün, martın 18-də birgə məlumat yayıb.

Məlumatda bildirilir ki, Korrupsiyaya qarşı Mübarizə Baş İdarəsində Endokrinoloji Mərkəzin vəzifəli şəxslərinin "qanunsuz hərəkətləri ilə bağlı" daxil olmuş məlumat əsasında əməliyyat-axtarış tədbirləri keçirilib.

Əlavə edilir ki, Mərkəzin vəzifəli şəxslərinin şəkərli diabet xəstəliyindən əziyyət çəkən insanların qeydiyyata alınması, müxtəlif dərman vasitələri ilə təmin olunması məqsədilə müxtəlif məbləğlərdə pul vəsaiti almalarına və vəzifə səlahiyyətlərindən sui-istifadə etmələrinə əsaslı şübhələr yaranıb: "Toplanmış ilkin sübutlar əsasında Cinayət Məcəlləsinin 308.1 (vəzifə səlahiyyətlərindən sui-istifadə) və 312-1.1-ci (vəzifəli şəxsin qərarına qanunsuz təsir göstərmə (nüfuz alveri)) maddələri ilə cinayət işi başlanıb. Hazırda cinayət əməllərinin törədilməsində təqsirli şəxslərin müəyyən edilərək məsuliyyətə cəlb olunmaları istiqamətində zəruri tədbirlər davam etdirilir".

Hələlik, rəsmi açıqlamaya Mərkəzin rəhbərliyindən, cinayət işinə cəlb edilən vəzifəli şəxslər və onların vəkillərindən münasibət almaq mümkün olmayıb.

Qeyd edilən maddələrlə şəxslərə ümumilikdə 7 ilə qədər həbs cəzası verilə bilər.

İsrail BP, SOCAR və yerli "NewMed Energy" şirkətlərinə İsrail sularında təbii qaz axtarışı aparmaq üçün lisenziyalar verib.

Bununla bağlı İsrailin Enerji və İnfrastruktur Nazirliyi məlumat yayıb. Lisenziya bu gün, martın 17-də İsraildə səfərdə olan Azərbaycanın iqtisadiyyat naziri Mikayıl Cabbarova bu ölkənin enerji və infrastruktur naziri Eli Koen tərəfindən təqdim olunub.

İsrail daxili qaz ehtiyatlarını artırmaq və ixracı genişləndirmək istəyir.

"Təbii qaz bütün dünyada, xüsusən də Yaxın Şərqdə iqtisadi və diplomatik mövqeyimizi gücləndirən strateji sərvətdir. Buna görə də biz təbii qaz hasilatını həm daxili bazar, həm də ixrac üçün genişləndirməyə çalışırıq, xüsusən də bu dövrdə", - Koen bildirib

"Reuters"in xəbərinə görə, 2023-cü ildə bu üçlük dördüncü lisenziya raundunda iki dəniz blokuna birlikdə təklif verib.

"Leviathan" yatağı yaxınlığındakı "Klaster I" adlanan ərazi üçün verilən lisenziyalar çərçivəsində SOCAR kəşfiyyat konsorsiumunun operatoru kimi çıxış edəcək. BP ilk dəfə İsrailin təbii qaz sektorunda fəaliyyət göstərəcək. "NewMed Energy" isə artıq "Chevron" (CVX.N) tərəfindən idarə olunan nəhəng "Leviathan" dəniz yatağının ən böyük payçısıdır.

Hər bir şirkət lisenziyalardakı hüquqların təxminən üçdə birinə sahib olacaq.

"Klaster I" İsrailin iqtisadi sularının şimal hissəsində, Aralıq dənizində yerləşən 1700 kvadrat kilometrlik bir ərazidir. Konsorsium kəşfiyyatın birinci mərhələsində seysmik və geoloji tədqiqatlar aparacaq, ikinci mərhələdə isə tədqiqat nəticələrinə əsasən qazma işləri həyata keçiriləcək.

İsrailin Energetika Nazirliyi əlavə lisenziyaların verilməsinin gözlənildiyini və bu ilin sonlarına doğru beşinci tender raundunun planlaşdırıldığını açıqlayıb.

Tbilisi məhkəməsi Gürcüstanın keçmiş prezidenti Mixeil Saakaşvilini 2021-ci ildə sərhədi qanunsuz keçməkdə təqsirli bilərək 4 il yarım azadlıqdan məhrum edib.

Yerli KİV-in məlumatına görə, müttəhim özü iclasda iştirak etməyib.

8 ildən sonra, 2021-ci il oktyabrın 1-də M.Saakaşvili Gürcüstana qayıdıb. Gürcüstan hüquq-mühafizə orqanları keçmiş prezidenti ölkə sərhədini qanunsuz keçməkdə ittiham edərək saxlayıblar.

Gürcüstanın istintaq orqanlarının məlumatına görə, Saakaşvili Ukraynanın Çernomorsk şəhərindən Gürcüstanın Poti şəhərinə üzən "Vilnüs" gəmisinin göyərtəsində olub. Sentyabrın 29-na keçən gecə gəmi limana daxil olub, oradan süd məhsulları ilə yüklənmiş qoşqulu treyler çıxıb. Saakaşvili həmin treylerdə olub.

12 mart

Saakaşvili 'Gödəkcələr işi' üzrə 9 il azadlıqdan məhrum edildi

Gürcüstanın keçmiş prezidenti Mixeil Saakaşvili "gödəkcələr işi" üzrə 9 il azadlıqdan məhrum edilib. O, külli miqdarda büdcə vəsaitlərini israf etməkdə təqsirli bilinib.

Qərarı Tbilisi şəhər Məhkəməsinin hakimi Badri Koçlamazaşvili elan edib.

Məhkəmə Xüsusi Mühafizə Xidmətinin keçmiş rəhbəri Teymuraz Canaşiyanı vəzifə səlahiyyətlərindən sui-istifadədə təqsirli bilib və 300 min lari (108 min 125 ABŞ dolları) məbləğində cərimələyib.

Saakaşvili və Canaşiya əvvəllər dəfələrlə ittihamları rədd edərək məhkəmənin siyasi xarakter daşıdığını bildiriblər.

İttihama görə, Saakaşvili prezidentliyi dövründə büdcə vəsaitlərindən geyim, o cümlədən gödəkcə almaq, oğlunun təhsilini ödəmək, həmçinin kosmetik prosedurlar üçün istifadə edib.

Saakaşvili hazırda 6 illik həbs cəzası çəkir. Daha əvvəl onun barəsində digər iki iş - Sandro Qirqvlianinin qatillərinin əfv edilməsi və deputat Valeri Qelaşvilinin döyülməsi üzrə hökmlər çıxarılmışdı.

Yeni həbs müddəti M.Saakaşvilinin həbs olunduğu andan - 2021-ci il oktyabrın 1-dən hesablanacaq. Beləliklə, yeni hökmə əsasən, o, yalnız 2030-cu il oktyabrın 1-də azadlığa çıxacaq. Eyni zamanda, onun barəsində "7 noyabr 2007-ci il hadisələri" və sərhədi qanunsuz keçmə ilə bağlı məhkəmə prosesləri davam etdirilir.

2007-ci il noyabrın 7-də Tbilisidə polis müxalifət nümayişçilərinə qarşı gözyaşardıcı qaz, su şırnaqları və rezin güllələrdən istifadə edib. Gürcüstan Səhiyyə Nazirliyinin məlumatına görə, mitinqin dağıdılması zamanı 500-dən çox insan xəsarət alıb.

M.Saakaşvili 2021-ci il oktyabrın 1-də gizli şəkildə Gürcüstana qayıtdıqdan sonra həbs edilib. Hazırda "Vivamedi" klinikasında saxlanılır.

Azərbaycan Baş Prokurorluğu bu ölkədən xaricə mühacirət etmiş bır sıra şəxsləri İstintaq İdarəsinə çağırıb. Aralarında bəzi bloqer, biznesmen və internet kanallarının rəhbərinin də olduğu bu şəxslər müxtəlif maddələrlə ittiham edilirlər.

Onlardan biri, bir vaxtlar Azərbaycanda bir çox tenderlərin qalibi olmuş "Akkord" şirkətinin rəhbəri İlqar Hacıyevdir. Hazırda mühacirətdə olan Haciyev son illər Azərbaycan hakimiyyətini kəskin tənqid edirdi.

Baş Prokurorluğun məlumatında onun iyulun 14-də İstintaq İdarəsinə gəlməli olduğu qeyd edilir.

İ.Hacıyevin Cinayət Məcəlləsinin 178.3.2-ci (dələduzluq) maddəsi ilə ittiham olunduğu bildirilir. Onun barəsində axtarış elan edildiyi, həbs-qətimkan tədbirinin seçildiyi vurğulanır.

Ondan başqa, bloqerlər Məhəmməd Mirzəli və Qabil Məmmədov da Baş Prokurorluğa çağırılıb.

M.Mirzəli Azərbaycan Xalq Cəbhəsi Partiyasının (AXCP) üzvü olub, Fransada yaşayır. Özünün yazdığına görə, o, Göyçayda "Əsgər ölümlərinə son!" aksiyasının təşkilatçısı olub və bundan sonra təqiblərlə üzləşib. O, mühacirətə getməzdən öncə polisə aparıldığını, incidildiyini, atasının da dəfələrlə polisə çağırılaraq hədələndiyini iddia edir.

Bu iddialara hüquq-mühafizə orqanlarından münasibət almaq cəhdləri nəticə verməyib.

Hakimiyyət rəsmiləri siyasi əqidələrinə görə insanların və onların qohumlarının basqılara məruz qalması haqqında deyilənləri, ümumiyyətlə, inkar edirlər.

Mirzəlinin Fransada olarkən bıçaqlandığı bildirilir, hətta qeyd edilir ki, həmin olayla bağlı həbs olunan şəxslər var. Onun Cinayət Məcəlləsinin 220.2 (Hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) və 281.1-ci (Hakimiyyətin zorla ələ keçirilməsinə, zorla saxlanılmasına və ya Azərbaycanın konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlar etmə) maddələri ilə 2018-ci il iyunun 2-də təqsirləndirilən şəxs qismində cəlb olunması barədə qərar qəbul edilib.

Hakimiyyətə qarşı sərt çıxışları ilə tanınan və Baş Prokurorluğun İstintaq idarəsinə çağırılan başqa bir bloqer Q.Məmmədov isə Cinayət Məcəlləsinin terrorçuluq daxil 24 maddəsi il ittiham edilir.

Baş Prokurorluğa çağırılan mühacirlərdən biri də hüquqşünas, "Azərifreedom" kanalının rəhbəri Qurban Məmmədovdur. Q.Məmmədov da terrorçuluq və daha bir neçə başqa maddələrlə ittiham edilir. O, mühacirətdən əvvəl Azərbaycanda olarkən bir neçə dəfə müxtəlif ittihamlarla həbs edilib. Hüquq müdafiəçiləri onu siyasi məhbus kimi tanıyıblar. Amma Azərbaycan rəsmiləri ölkədə siyasi məhbusların olması ilə bağlı deyilənləri qəbul etmirlər.

Baş Prokurorluğa çağırılan və mühacirətdə olan kanal rəhbərlərindən (Azad Söz) biri isə Tural Sadıqlıdır. O isə kütləvi iğtişaşlara çağırış və başqa qanunsuz əməllərdə ittiham olunur. T.Sadıqlı axtarışa verilib və onun haqqında qiyabi həbs-qətimkan tədbiri seçilib.

Hələlik, rəsmi açıqlamalara sözügedən şəxslərdən ayrılıqda münasibət almaq mümkün olmayıb.

Amma onlar bundan əvvəl haqlarında səslənən ittihamları, bir qayda olaraq, rədd ediblər və bunu tənqidi fəaliyyətləri ilə izah ediblər.

Şimali Makedoniya hökuməti və vətəndaşları ən azı 59 nəfərin öldüyü və 150-dən çox insanın yaralandığı gecə klubundakı yanğınla bağlı cavablar axtarır. Müəssisənin fəaliyyət icazəsinin qanuniliyi barədə suallar da meydana çıxıb.

Ölkənin səhiyyə naziri Arben Taravari ölənlərin sayının arta biləcəyini deyib.

Səlahiyyətlilər bildirib ki, martın 15-də "Pulse" gecə klubunda konsert zamanı şou üçün pirotexniki vasitədən istifadə izdihamlı klubda yanğına səbəb olub. Həmin klubun fəaliyyət göstərmək üçün müvafiq lisenziyaya sahib olmadığı güman edilir.

"Bu məsələdə rüşvət və korrupsiyanın rol oynadığına inanmaq üçün səbəblərimiz var", - ölkənin daxili işlər naziri Pançe Toşkovski mətbuat konfransında bildirib. "Klubda 500-ə yaxın adam var idi. 250 bilet satılmışdı", - o, əlavə edib.

Nazir gecə klubunun tavanının yanar materialdan hazırlandığını və pirotexniki qığılcımlardan alovlandığını, qatı tüstünün sürətlə bütün binaya yayıldığını deyib. Sosial şəbəkələrdə yayılan videoda alovların binanın damından qalxdığı görünür.

DİN rəhbəri dörd nəfər barəsində həbs orderi verildiyini bildirsə də, onların kimliyini açıqlamayıb. O deyib ki, cinayət istintaqında təxminən 20 nəfərin adı keçir, lakin onlardan bəziləri yanğın nəticəsində ölüb, bəziləri isə xəstəxanadadır.

Daxili işlər naziri ölkədə belə müəssisələrin lisenziyalaşdırılmasının çox vaxt rüşvət və korrupsiya ilə əlaqəli olduğunu qeyd edib.

Prokuror isə ətraflı məlumat vermədən keçmiş iqtisadiyyat naziri Kreşnik Bekteşinin dindirilmək üçün çağırıldığını təsdiqləyib.

ABŞ prezidentinin milli təhlükəsizlik üzrə müşaviri Mayk Uoltsla Azərbaycan prezidentinin köməkçisi Hikmət Hacıyev arasında təmas olub.

X hesabında paylaşım edən Uolts Cənubi Qafqazda münaqişəyə son qoyulması gərəkdiyini bildirib.

"Biz Azərbaycan və Ermənistanın irəliyə doğru böyük addım atmasından və sülh müqaviləsi ilə bağlı razılıq əldə etməsindən məmnunuq. Mən ona bildirdim ki, biz bu sülh sazişini indi yekunlaşdırmalıyıq, məhbusları azad etməli və regionun daha təhlükəsiz, firavan olması üçün birlikdə çalışmalıyıq. Amerikanın Qızıl Dövrü dünyaya sülh və firavanlıq gətirəcək və bu baş verənə qədər biz işləməyi dayandırmayacağıq", - Uolts paylaşımında yazıb.

Azərbaycan rəsmi dairələri, hələlik, Hacıyev-Uolts danışığına dair açıqlama yaymayıb.

Azərbaycanla Ermənistan bu həftənin əvvəlində sülh sazişinin mətnini razılaşdırdıqlarını açıqlayıblar. Azərbaycan XİN rəhbəri Ceyhun Bayramov hazırkı dönəmdə sülh müqaviləsinin imzalanmasına əsas maneənin Ermənistanın konstitusiyasının olduğunu bildirib. Ermənistan rəsmiləri isə, öz növbəsində, razılaşmanı imzalamaq üçün yeri və zamanı müzakirə etməyə hazır olduqlarını bildiriblər.

Azərbaycan Xalq Cəbhəsi Partiyasının (AXCP) daha iki fəalı – Qaradağ rayon şöbəsinin sədri Zaur Əsgərov və Binəqədi şöbəsinin üzvü Gündüz Mirzəyev dövlət əleyhinə çağırışlarda təqsirləndirilərək həbs olunublar. Cəbhəçilər haqqında həbs qərarından verilən şikayətə martın 13-də Bakı Apellyasiya Məhkəməsində baxılıb.

Z.Əsgərovun vəkili Nemət Kərimli AzadlıqRadiosuna bildirib ki, müvəkkili haqqında həbs qərarının əsassız olduğunu düşünür.

"Zaur Əsgərov haqqında həbs-qətimkan tədbiri seçilməsi üçün qanunda göstərilən maddi və prosessual əsaslar yoxdur. Şəxsi həbs etmək üçün ciddi əsas olmalıdır. Belə bir əsas yoxdur. Onu həbsdə saxlamadan da istintaq aparmaq olardı. O, ailə başçısıdır, övladları var", - vəkil məhkəmədə belə deyib. O, Z.Əsgərovun özünü təqsirli bilmədiyinə də diqqət çəkib.

Apellyasiya şikayəti təmin edilməyib və Binəqədi rayon Məhkəməsinin AXCP üzvləri haqqında qərarı qüvvədə saxlanılıb.

Cəbhəçilər martın 7-də saxlanılıbıar. Onlara Cinayət Məcəlləsinin 281.2-ci (dövlət əleyhinə açıq çağırışlar, təkrar və ya bir qrup şəxs tərəfindən törədildikdə) maddəsiylə ittiham verilib. Bu maddədə 5 ildən 8 ilədək həbs cəzası nəzərdə tutulub.

AXCP üzvlərinin işi üzrə istintaq Baş Prokurorluğun İstintaq İdarəsində aparılır.

Partiyadan bildirilib ki, indi AXCP-nin 15-ə yaxın üzvü həbsdədir. Onlar özlərini təqsirli bilmir, siyasi baxışlarına görə sifarişlə həbs olunduqlarını deyirlər.

Hökumət təmsilçiləri isə ölkədə heç kimin siyasi motivlərlə təqib olunmadığını, həbs edilənlərin konkret faktlara görə saxlandığını bildirirlər.

Bu il martın 5-də Bakıda Neft Emalı Zavodunda baş verən yanğın ilə bağlı saxlanan var.

Bu barədə bu gün, martın 13-də Dövlət Təhlükəsizlik Xidməti (DTX) məlumat yayıb.

Məlumatda bildirilir ki, zavodun N-21/1 saylı nasos sisteminin iş planına uyğun təmirə hazırlanması prosesində təhlükəsizlik qaydalarına əməl edilməyib: "Növbə qəbulu zamanı nasosda mazut axınının davam etməsi barədə birbaşa xəbərdaredici yazılı məlumat verilməsinə baxmayaraq, 4-5 mart 2025-ci il tarixlərində olan növbə heyəti qurğunu təmirə tam hazır vəziyyətə gətirmədən və borunun ağır dizel fraksiyası ilə təmizlənərək boş olmasını təmin etmədən təmir-bərpa qrupuna təhvil verib".

Rəsmi açıqlamaya görə, nəticədə nasos avadanlığı ümumi qurğudan təmir məqsədilə ayrılarkən tezalışan mazut kütləsi borudan təzyiq altında sızıb alovlanaraq geniş ərazini əhatə edən yanğın yaradıb.

Növbə heyəti rəhbəri, baş operator Sadiq Qarayev saxlanılaraq Cinayət Məcəlləsinin 223.2-ci (partlayış təhlükəli obyektlərdə təhlükəsizlik qaydalarının pozulması) maddəsi ilə cinayət məsuliyyətinə cəlb edilib.

Hələlik, bu açıqlamaya saxlanan şəxsin özü və yaxınlarının münasibəti bəlli deyil. Həmin ittihamla ona 6 ilə qədər həbs cəzası verilə bilər.

5 mart

Neft Emalı Zavodunun ərazisində yanğın

"Neft Emalı Zavodunun ərazisində baş vermiş yanğın geniş sahəyə yayılmasına imkan verilmədən tam söndürülüb". Bu barədə saat 11:48-də Fövqəladə Hallar Nazirliyi məlumat yayıb.

Yanğının səbəbi və tələfat barədə, hələlik, məlumat verilməyib.

+++

Bu gün, martın 5-i səhər saatlarında Bakıda Neft Emalı Zavodunun ərazisində yanğın başlayıb.

Bu barədə Fövqəladə Hallar Nazirliyinin (FHN) Mətbuat xidməti məlumat yayıb.

"Hazırda yanğınla mübarizə tədbirləri davam etdirilir", - məlumatda bildirilir.

Neft Emalı Zavodu (NEZ) 15 növ məhsul istehsal edir. Bu məhsullar, əsasən, benzin, aviasiya kerosini, dizel yanacağı, neft koksu və mazutdur.

1953-cü ildə inşa edilən zavodda bir neçə dəfə yenidənqurma işləri aparılıb.

Bugünlərdə Milli Məclisdə müzakirələr zamanı Nazirlər Kabinetinin nümayəndəsi bildirmişdi ki, Neft Emalı Zavodunun Bakıdan köçürülməsi məsələsinə baxılır. Halbuki, son 10 ildə zavodda modernizasiya işləri aparılmasından bəhs edilib.

İndi bəzi enerji ekspertləri sual edirdilər ki, əgər zavodda ciddi yenidənqurma işləri aparılıbsa, onun Bakıdan köçürülməsi nədən gündəmə gəlir?

Hələlik, rəsmilərdən bu suala cavab almaq mümkün olmayıb. Üstəlik, onlar son 10 ildə modernizasiya işlərinə nə qədər vəsait xərcləndiyini də açıqlamayıblar.

Azərbaycanın rayonlarında, xüsusilə də İran İslam Respublikasına yaxın cənub bölgəsində balığın kəskin bahalaşdığı bildirilir.

Cənub rayonlarının sakinlərinin AzadlıqRadiosuna deməsinə görə, ən çox da ziyad (kütüm) balığı bahalaşıb, hazırda 1 kilo 100 qram ziyad balığı 30.35 manata satılır.

"Qiymətin daha da artacağı gözlənir. Fevralın əvvəlində 1 kiloqramlıq ziyad balığı 1415 manata idi. İki dəfə bahalaşıb", - adının çəkilməsini istəməyən sakinlərdən biri söyləyib.

"Pensiyaya beş balıq almaq olar"

O bunun səbəbini qarşıdan Novruzun sonuncu-İlaxır çərşənbəsinin gəlməsi ilə izah edib: "Martın 18-də İlaxır çərşənbədir. İlaxır çərşənbənin adətlərinə görə, süfrədə ziyad balığı olmalıdır. Bu üzdən hər Novruz bayramı ərəfəsində ziyad balığı bahalaşır. Amma heç vaxt belə kəskin bahalaşma olmurdu. Əvvəl bahalaşma faizlə olurdu, indi dəfə ilə olub. Bir balıq çəkisindən asılı olaraq 40-50 manata satılır. Obrazlı desək, Azərbaycanda ortalama bir pensiyaçının pensiya məbləğinə beş kütüm balığı düşər".

Başqa bir yerli sakin isə kütüm balığının bahalaşmasını həmçinin onun qıtlığı ilə izah edib: "Həm Xəzərdə balıq azalıb, həm də balıqçılara məhdudiyyət artıb".

Bütün bu deyilənlərlə bağlı rəsmi qurumların fikirlərini öyrənmək mümkün olmayıb.

Rusiya Müdafiə Nazirliyi Kursk vilayətinin Sudja şəhərinin ələ keçirildiyini rəsmən elan edib. Şəhər 2024-cü ilin avqustundan bəri Ukrayna silahlı qüvvələrinin nəzarətində idi.

Bir gün əvvəl Rusiya kanalları rusiyalı hərbçilərin Sudjanın mərkəzindən olan foto və videolarını yayımlamışdılar. Həmçinin, martı 12-si axşam prezident Vladimir Putinin Kursk vilayətindəki qərargahlardan birinə baş çəkdiyi məlum olub.

Ukrayna prezidenti Volodimir Zelenski isə Sudja ilə bağlı məlumatı şərh edərkən bildirib: "Ukrayna hərbi komandanlığı lazım olanı edir: maksimim əsgərlərimizin həyatını xilas etmək".

Ukrayna silahlı qüvvələrinin baş komandanı Aleksandr Sırski isə deyib ki, Ukrayna hərbçiləri "məqsədəuyğun və zəruri olduğu müddətdə Kursk vilayətində müdafiəni saxlayacaqlar".

Bloqerlər və media Rusiya ordusunun ötən cümə günü Kursk vilayətinə hücumu barədə məlumat yaymış və bir qrup Ukrayna hərbçisinin mühasirəyə düşməsi təhlükəsi açıqlanmışdı.

Ukrayna 2024-cü ilin avqustunda Kursk vilayətinə hücuma keçərək Sudja və sərhəd bölgəsindəki bir sıra digər yaşayış məntəqələrini nəzarətə götürüb.

Kiyev o zaman bəyan edib ki, Kursk əməliyyatı gələcək sülh danışıqlarında Moskvanı ərazi mübadiləsinə məcbur edəcək, Rusiya qoşunlarını Ukraynanın şərqindəki hücumdan yayındıracaq.

Martın 11-də Qrenlandiyada parlament seçkiləri keçirilib. Qalib əvvəllər müxalifətdə olan Demokrat Partiyası (Demokraatit) olub. O, seçicilərin, demək olar ki, 30 faiz səsini toplayıb və parlamentdəki 31 yerdən 10-unu tutacaq. İndi o, digər siyasi qüvvələrlə koalisiya qurmalıdır.

"Naleraq" partiyası ikinci olub, hakim koalisiya isə əvvəlki seçkilərlə müqayisədə səslərin, demək olar ki, yarısını itirib.

Həm "demokratlar", həm də "Naleraq" Qrenlandiyanın Danimarkadan ayrılaraq müstəqilliyini elan etməsinin tərəfdarıdır. Bundan əlavə, Demokrat Partiyası yerli biznesin və sosial proqramların dəstəklənməsinin vacibliyini vurğulayır.

"İnsanlar dəyişiklik istəyirlər", - Demokrat Partiyasının lideri Yens Frederik Nilsen bildirib. " Bizə düz sabah müstəqillik lazım deyil, lakin bunun üçün yaxşı təməl yaratmaq istəyirik".

Qrenlandiyada seçkilər ABŞ prezidenti Donald Trampın adanı satınalma və ya başqa yollarla ABŞ ərazisinə birləşdirmək istədiyi barədə bəyanatları fonunda baş tutub. Yanvarın 24-də Trampın Danimarkanın baş naziri Mette Frederiksen ilə telefon danışığı olub, mənbələr söhbəti "sərt" kimi xarakterizə ediblər. Buna cavab olaraq Qrenlandiyanın baş naziri Müte Eqede bildirib ki, Qrenlandiya "satılmır".

Qrenlandiya Danimarkanın tərkibində muxtar ərazidir. Kopenhagen xarici və təhlükəsizlik siyasətini müəyyən edir. Maliyyə məsələləri ada hökumətinin iştirakı ilə həll olunur.

Təxminən 57 min nəfər əhalisi olan ada təbii sərvətlərlə zəngindir. Burada həm də Birləşmiş Ştatlarım böyük hərbi bazası yerləşir. 1951-ci ildə Vaşinqton və Kopenhagen Qrenlandiyanın müdafiəsi ilə bağlı müqavilə imzalayıb. ABŞ müqaviləyə uyğun olaraq adanın müdafiəsini öz üzərinə götürüb.

ABŞ-nin Ukraynaya hərbi yardımı artıq Polşa sərhədindən keçməyə başlayıb. Bunu Polşanın xarici işlər naziri Radoslav Sikorski martın 12-də ukraynalı həmkarı ilə birgə keçirdiyi mətbuat konfransında deyib.

"Mən təsdiq edə bilərəm ki, Yasionka vasitəsilə silah tədarükü əvvəlki səviyyəyə qayıdıb", - Sikorski Polşanın cənub-şərqindəki hərbi logistika mərkəzinə istinadən bildirib.

ABŞ prezidenti Donald Tramp və onun ukraynalı həmkarı Volodimir Zelenski arasında Ağ evdəki gərgin görüşdən sonra Vaşinqton Ukraynaya hərbi yardımın dondurulduğunu açıqlamışdı.

ABŞ-nin hərbi yardımı dayandırması Ukraynada dərin narahatlığa səbəb olub. Bu narahatlıq "Current Time"nin cəbhə bölgəsindəki Ukrayna əsgərləri ilə müsahibələrində də vurğulanıb.

Ukraynanın şərqindəki Donetsk vilayətində artilleriya bölməsində xidmət edən Sokol ləqəbli əsgər bildirib: "Bizə daha çox silah verin, biz təhlükəsizliyimizi təmin edəcəyik".

"Düşünürəm ki, tezliklə hər şey aydınlaşacaq və biz silah və digər yardımları almağa davam edəcəyik", - o deyib.

Sokol haqlı idi, Ukraynanın ABŞ-nin 30 günlük atəşkəs təklifini qəbul etməsi ilə nəticələnən doqquz saatlıq görüşdən sonra hərbi yardım bərpa edilib.

ABŞ Ukraynanın ən böyük silah donorudur və Sokolun sözləri silah tədarükünün bərpasının Ukraynanın müharibə səyləri üçün nə qədər vacib olduğunu göstərir.

"Biz ABŞ və Avropada istehsal olunan çoxlu silahlardan istifadə edirik", - o bildirib.

Varşavada çıxış edən Ukrayna XİN rəhbəri Andriy Sibiqa isə bir daha vurğulayıb ki, onun ölkəsi 30 günlük atəşkəs təklifinə sadiqdir.

"Əgər bu, baş verərsə, atəşkəsə nail olmaq naminə biz öz tərəfimizdən bu yol xəritəsi üzərində işləmək üçün müvafiq komanda yaratmağa hazırıq", - ukraynalı nazir deyib.

Rusiya rəsmiləri Ciddədə əldə olunan razılaşmaya hələ cavab verməyib.

Yazını AzadlıqRadiosunun aparıcı beynəlxalq müxbiri Rey Förlonq hazırlayıb.

Avropa İttifaqı apreldən etibarən 26 milyard avro (28 milyard dollar) dəyərində ABŞ məhsullarına cavab tarifləri tətbiq edəcək. Avropa Komissiyası martın 12-də verdiyi bəyanatında bildirib ki, bu qərar ABŞ-nin tətbiq etdiyi tariflərə cavab olaraq qəbul edilib.

Fevralda prezident Donald Tramp ABŞ-yə idxal olunan bütün polad və alüminium məhsullarına 25 faiz tarif tətbiq olunacağı barədə qərar qəbul edib. Bu gün, martın 12-də bu qərar qüvvəyə minib və bununla da bu məhsulların idxalı ilə bağlı əvvəlki istisnalar, vergisiz kvotalar ləğv olunub.

Avropa Komissiyası bildirib ki, ABŞ məhsullarına tətbiq olunan mövcud tariflər 1 aprel tarixində sona çatacaq və yeni tariflər 13 aprelə qədər tam qüvvəyə minəcək.

Avropa Komissiyasının prezidenti Ursula Fon der Lyayen bildirib ki, "bu müddət ərzində Aİ həmişə danışıqlara açıq olacaq".

"Reuters" yazır ki, mövcud tariflərin dayandırılması qayıqlardan motosikletlərə qədər müxtəlif məhsullara şamil edilir və Aİ indi digər məhsul kateqoriyalarını seçmək üçün ikihəftəlik məsləhətləşməyə başlayacaq.

Tariflərin tətbiqi təklif olunan hədəf məhsullar arasında sənaye və kənd təsərrüfatı məhsulları, məsələn, tekstil, ev əşyaları, plastiklər, toyuq, mal əti, yumurta, süd məhsulları, şəkər və tərəvəzlər də var.

Pakistan təhlükəsizlik qüvvələri bildirib ki, ölkənin Bəlucistan əyalətində silahlılar tərəfindən ələ keçirilən qatarda girov götürülən təxminən 155 nəfər azad edilib. Lakin qatarda hələ də 300-ə yaxın şəxsin girov saxlanıldığı ehtimal edilir.

"Reuters" təhlükəsizlik mənbələrinə istinadən xəbər verir ki, silahlılar bir çox sərnişinin yanında intiharçı bombalar yerləşdiriblər, bu da xilasetmə əməliyyatını daha da çətinləşdirir.

+++

Silahlılar Pakistanın cənub-qərbində, tuneldə sərnişinlə dolu bir qatarı ələ keçirərək onlarla insanı girov götürüb. Təhlükəsizlik qüvvələri ilə toqquşma nəticəsində bir neçə nəfər həlak olub.

Bəlucistan hökumətinin sözçüsü Şahid Rind bildirib ki, 400-dən çox sərnişini daşıyan "Jaffar Express" qatarı Bəlucistan əyalətinin paytaxtı Kvettadan Peşəvər şəhərinə gedərkən "şiddətli" atəşə məruz qalıb.

Martın 11-i gecə saatlara qədər neçə sərnişinin hələ də girov saxlanıldığı bəlli olmasa da, separatçı Bəlucistan Azadlıq Ordusu (BLA) hadisəyə görə məsuliyyəti öz üzərinə götürüb. Silahlı qruplaşma bildirib ki, naməlum sayda Pakistan təhlükəsizlik və kəşfiyyat zabitləri də daxil olmaqla, 100-dən çox sərnişin girov götürülüb.

"Hücuma məruz qalan qatar hələ də yerindədir və silahlı şəxslər sərnişinləri girov saxlayırlar", - rayonun baş polis rəsmisi Rana Dilavar bildirib.

Qatarda olan sərnişin AzadlıqRadiosuna telefonla bildirib ki, təhlükəsizlik qüvvələri silahlı qruplaşmaya qarşı quru və hava əməliyyatlarına başlayıb, yaraqlılar isə cavab olaraq silah və raketlərdən istifadə edirlər.

Bəlucistan regional dəmiryol departamentinin sözçüsü Məhəmməd Kaşif AzadlıqRadiosuna deyib ki, ümumilikdə doqquz vaqondan ibarət olan qatar ucqar, dağlıq ərazidəki tuneldən keçərkən hücuma məruz qalıb. Qatar hücumdan sonra tunelin içərisində qalıb.

BLA qadınlar, uşaqlar, yaşlılar və Bəlucistan sakinləri da daxil mülki sərnişinlərin azad olunduğunu bildirib.

Müqavimət göstərən 10 hərbçinin öldürüldüyü vurğulanıb.

"Reuters"in xəbərinə görə, silahlı qruplaşma Bəluc siyasi məhbuslarının, fəallarının və itkin düşmüş şəxslərin 48 saat ərzində azad olunmasını tələb edib.

Resurslarla zəngin, lakin yoxsul bölgə olan Bəlucistanda uzun illərdir ki, silahlı toqquşmalar baş verir. Silahlı qruplaşma həm Əfqanıstan, həm də İranla həmsərhəd olan Bəlucistan əyalətinin müstəqilliyini tələb edir.

Noyabrda BLA Kvetta qatar stansiyasında intiharçı bomba hücumu həyata keçirib. Hərbçilər, dəmiryol işçiləri və sərnişinlər də daxil olmaqla 26 nəfər həlak olub.

Avropa İnsan Haqları Məhkəməsi (AİHM) martın 11-də Azərbaycanla bağlı bəzi qərarlarını açıqlayıb. Məlum olub ki, Azərbaycan toplam 14 min 500 avro təzminat və xərclər ödəməlidir.

Şikayətlərdən biri 2016-cı ildə həbs olunan müxalifət fəalı və "Azadlıq" qəzetinin maliyyə direktoru Faiq Əmirovla bağlıdır. Orada bildirilir ki, polis ərizəçi Faiq Əmirovu 2016-cı ilin avqustunda Gülənçi hərəkatına mənsub olduğu iddiasıyla saxlayıb, ardınca da o, vergidən yayınma, etnik, irqi, sosial və ya dini nifrət və düşmənçiliyi qızışdırmaqda təqsirli bilinib.

Ərizəçi Avropa İnsan Hüquqları Konvensiyası 5-ci maddəsinin 1 və 3-cü (azadlıq və toxunulmazlıq hüququ) bəndlərinə əsaslanaraq cinayət törətməsi ilə bağlı "əsaslı şübhə" olmadan həbs edilib saxlanıldığını, eləcə də daxili məhkəmələrin onun istintaqdan əvvəl həbsini əsaslandıra bilmədiyini iddia edir. O, 6-cı maddənin 2-ci (günahsızlıq prezumpsiyası) bəndi çərçivəsində hüquq-mühafizə orqanlarının mediaya açıqlamasında özünün cinayətkar kimi tanıdılmasından da şikayətlənir. Üstəlik, ərizəçi 5-ci maddə ilə bağlı 18-ci (hüquqların məhdudlaşdırılmasından istifadənin hədləri) maddə əsasında da şikayət irəli sürür.

Məhkəmə bu işdə iddia olunan pozuntunu tanıyıb və Avropa Konvensiyasının 5-ci (azadlıq) maddəsinin 1-ci bəndinin pozulduğunu müəyyənləşdirib. AİHM-in qərarına əsasən, hökumət ərizəçiyə mənəvi zərər və xərc əvəzi 9 min avro ödəməlidir.

AİHM-də qərar verilən digər iş jurnalist Aytac Əhmədovanın şikayəti ilə bağlıdır.

Ərizəçi iddia edir ki, 2015-ci ilin sentyabrında onlayn xəbər portalı olan MeydanTV ilə əməkdaşlıq etdiyi üçün Daxili İşlər Nazirliyinin Mütəşəkkil Cinayətkarlıqla Mübarizə İdarəsinə getməyə məcbur edilib və orada xəbər portalı, onun fəaliyyəti ilə bağlı sorğu-suala tutulub. DİN əməkdaşları heç bir order və ya məhkəmə qərarı olmadan onun mənzilində axtarış apararaq kompüterini də götürüblər. Onun ailəsiylə evdə və çimərlikdə çəkdirdiyi bəzi şəxsi fotoşəkil və videogörüntülər, çox güman, saxta şəxslərə məxsus müxtəlif "Facebook" hesablarında yayımlanıb. Paylaşımlar ərizəçinin "dilindən asılmalı", "hamının gözü önündə çılpaq asılmalı" və s. yazılarla müşayiət edilib.

Ərizəçi Avropa İnsan Hüquqları Konvensiyasının 6-cı (ədalətli məhkəmə araşdırması hüququ) və 8-ci (şəxsi və ailə həyatına hörmət hüququ) maddələrinə əsaslanaraq şəxsi həyatına hörmət hüququnun qorunmadığını və bu baxımdan, hökumət orqanlarının onun şikayətlərini araşdırmadığını iddia edir.

Məhkəmə bu işdə ərizəçiyə münasibətdə Konvensiyanın 8-ci (şəxsi və ailə həyatına hörmət hüququ) maddəsinin pozulduğuna qərar verib. Qərara əsasən, hökumət ərizəçiyə mənəvi zərər və xərc əvəzi 5 min 500 avro ödəməlidir.

Agent Şon Kerran (Sean Curran) ABŞ-də Gizli Xidmətin yeni rəhbəridir. O, prezident Donald Trampı Pensilvaniyada seçki mitinqi vaxtı sui-qəsd cəhdindən qorumuşdu.

Martın 10-da axşam Kerran Ağ evdə Oval kabinetdə vəzifə andı içib. Bu haqda "Fox News" xəbər yayıb.

Kerranın andını daxili təhlükəsizlik naziri Kristi Noem qəbul edib. O deyib ki, Kerran "prezident Trampın həyatını xilas etmək üçün öz həyatını riskə atıb". Onun sözlərinə görə, bu, ABŞ Gizli Xidməti agentinin sədaqətinin sübutudur.

Tramp ötən ilin iyulunda seçki mitinqində çıxış edərkən ona atəş açılıb. O, sağ qulağından xəsarət alıb, tərəfdarlarından biri həlak olub, iki nəfər yaralanıb.

Siyasətçiyə 20 yaşlı Tomas Metyu Kruks qonşu binanın damından atəş açıb. Onu Gizli Xidmət əməkdaşları qətlə yetirib. Kruksun yanından AR-15 yarımavtomat silahı tapılıb, silahdan 10-dək atəş açdığı bəlli olub.

O zaman Gizli Xidmət əməkdaşlarına qarşı bəzi iddialar səslənib. Əsas fikir bu idi ki, onlar Kruksun olduğu binanın damını yoxlamayıblar, atəş açanın yerini gec müəyyən ediblər.

Ş.Kerran 2001-ci ildən Gizli Xidmətdə çalışır. O, Trampın birinci prezidentliyi dönəmində və sonra onun mühafizəsi üçün cavabdeh olub. Kerranın tabeliyində 85 nəfər olub.

Moskva şəhəri üzərində hava məkanının açılması ilə əlaqədar "Azərbaycan Hava Yolları" QSC (AZAL) aviaşirkətinin Bakı-Moskva marşrutu üzrə J2-807 (Vnukovo), J2-181 (Domodedovo) nömrəli reysləri, müvafiq olaraq, saat 12:25 və 12:35-də yola düşüb.

Bu barədə AZAL-dan bildirilib.

+++

"Rosaviasiya" Rusiyanın bir sıra hava limanlarında təyyarələrin qəbulu və uçuşuna qoyulan məhdudiyyətlərin aradan qaldırıldığını bildirib.

+++

Rusiyanın Moskva şəhəri üzərində hava məkanının bağlanması səbəbindən "Azərbaycan Hava Yolları"nın (AZAL) Bakı-Moskva marşrutu üzrə J2-807 (Vnukovo) və J2-181 (Domodedovo) nömrəli reyslərində gecikmələr müşahidə olunur.

Ötən gücə, martın 11-də Ukrayna pilotsuz uçuş aparatları (PUA) ilə Moskvaya kütləvi hücum həyata keçirib. İki nəfərin öldüyü, 10-dan çoxunun yaralandığı bildirilir.
Rusiya Müdafiə Nazirliyi ölkəboyu ümumilikdə 337 dronun vurulduğunu bildirib.

Üç il əvvəl, fevralın 24-də Rusiya Ukraynaya yenidən təcavüzə başlayıb. Ondan altı il əvvəl də Rusiya Ukraynanın bir hissəsini-Krımı ilhaq etmişdi.

Azərbaycanda məhkəmə Krasnodar Vilayət Məhkəməsinin keçmiş hakimi Yelena Xaxalevanın Rusiyaya ekstradisiyasından imtina edib. Bu barədə APA onun vəkilinə istinadən xəbər verir.

Xaxaleva Rusiyanın tələbi ilə yanvarın sonunda Bakıda saxlanılıb. "Kommersant" qəzeti bunun Dubaya uçuşdan əvvəl hava limanında baş verdiyini yazıb. Əvvəlcə Xaxaleva istintaq təcridxanasına göndərilib, lakin fevralın 4-də polis nəzarətinə verilməklə sərbəst buraxılıb.

Rusiyada Xaxalevaya qarşı dələduzluq və vəzifə saxtakarlığına görə cinayət işi açılıb. Müstəntiqlərin fikrincə, o, 2016-2019-cu illər arasında 127 gün iş yerində olmayıb: o, iş vaxtının cədvəllərini dolduran məhkəmə işçilərini aldadıb və nəticədə təxminən 1.2 milyon rubl (14 min 515 ABŞ dolları) maaş alıb.

2021-ci ilin dekabrında Hakimlərin ali ixtisas kollegiyası Xaxalevaya qarşı işin başlanmasına icazə verib, lakin o, bu vaxta qədər ölkəni tərk edib. Bundan əvvəl o, hakim statusundan məhrum edilib.

Y.Xaxaleva 2017-ci ildə, media onun qızı və İstintaq Komitəsinin müstəntiqi Vadim Badalovun dəbdəbəli toyu haqqında yazandan sonra məşhurlaşıb. Şənlikdə Nikolay Baskov, Valeri Meladze, İosif Kobzon və digər ulduzlar görüntüləniblər. Tədbirin dəyərinin 2 milyon dollar olduğu bildirilirdi. Daha sonra Krasnodar Vilayət Məhkəməsinin Hakimlər şurası toya 4.5 milyon rubl (51 min 430 dollar) xərcləndiyini müəyyən edib.

Bir sıra media nümayəndələri "Elektron məhkəmə" sistemində məhdudiyyətlə bağlı Məhkəmə Hüquq Şurasının və Ali Məhkəmənin sədri İnam Kərimova müraciət ediblər.

Məhkəmələrin fəaliyyətini işıqlandıran jurnalistlər məhdudiyyətin tətbiqinin sistemdən istifadədə çətinlik yaratdığını vurğulayaraq bunu şəffaflığın pozulması kimi qeyd ediblər.

Bildirilib ki, məlumatların qapalı olmasına görə məhkəmə işlərinin araşdırılması, ictimaiyyətə məlumat çatdırılması istiqamətində ciddi maneə yaranıb.

Müraciətdə o da vurğulanıb ki, "e-məhkəmə" sistemi məhkəmə proseslərinin şəffaf və əlçatan olması üçün yaradılıb, lakin qoyulan məhdudiyyət ictimai maraq kəsb edən işlərə dair məlumatların əldə olunmasına əngəldir.

9 il... Bunun nəyi şəffaflıq oldu?

Azərbaycanda "Elektron məhkəmə" informasiya sistemi 2014-cü ildə prezidentin sərəncamı ilə yaradılıb. Bu sistem məhkəmədə işlərə baxılması vaxtlarına dair elektron cədvəlin tərtib olunmasını, iclasların audio, video qeydə alınmasını, habelə onları onlayn rejimdə izləmək imkanını özündə ehtiva etməlidir.

Amma artıq bir müddətdir sistemdə məhkəmə işləri üzrə tərəflərin adları əks olunmur. Ayrı-ayrı jurnalistlər isə şikayətlənirlər ki, Dünya Bankının maliyyəsi ilə yaradılmış elektron sistemin ictimaiyyət üçün yalnız adı qalıb. "Hakimlərin fotolarından, tərcümeyi-hallarından tutmuş, məhkəmələrdə baxılan işlərə qədər hamısını sistemdən yığışdırıblar. Bunun nəyi şəffaflıq oldu?", - jurnalistlər sual edir.

Hələlik, müraciətə Məhkəmə Hüquq Şurası və Ali Məhkəmədən münasibət almaq mümkün olmayıb.