Azərbaycan xəbərləri
Daşkəsəndə Xalq Cəbhəsi sədri narkotik ittihamını qəbul etmir
Azərbaycan Xalq Cəbhəsi Partiyası (AXCP) Daşkəsən şöbəsinin martın 18-də saxlanan sədri Sahib Məmmədzadə barəsində martın 19-da 4 aylıq həbs-qətimkan tədbirinin seçildiyi bildirilir.
Bu barədə həmin partiyadan məlumat verilib.
AXCP-dən bildirilib ki, S.Məmmədzadə Cinayət Məcəlləsinin 234.4.3-cü (Qanunsuz olaraq küllü miqdarda narkotik vasitələri,...hazırlama,... və ya satma) maddəsi ilə ittiham olunur və artıq Gəncə 2 saylı İstintaq Təcridxanasına köçürülüb: "Sahib bəy vəkilə bildirib ki, özünü təqsirli bilmir və məhkəmədə də deyib ki, ona şər atılıb. O, həbsini onun AXCP-nin Daşkəsən rayon şöbəsinin sədri olmağı ilə izah edir".
Bu deyilənlərə, hələlik, Daxili İşlər Nazirliyindən (DİN) münasibət öyrənmək mümkün olmayıb. Amma buna qədər həm DİN, həm də başqa rəsmi qurumlar insanların Azərbaycanda siyasi fəaliyyətlərinə görə şərlənərək həbs edilmələri ilə bağlı deyilənləri əsassız sayıblar.
Dünən, martın 19-da DİN-in mətbuat xidmətinin regional qrupundan bildirilmişdi ki, narkotik vasitələrin qanunsuz dövriyyəsində şübhəli bilinən S.Məmmədzadəni Baş Narkotiklərlə Mübarizə İdarəsinin əməkdaşları saxlayıb: "Fakta görə cinayət işi qaldırılıb, istintaq hərəkətləri davam etdirilir".
+++
Martın 18-də axşam saatlarında müxalifətdə olan Azərbaycan Xalq Cəbhəsi Partiyasının (AXCP) üzvü Sahib Məmmədzadə saxlanıb.
AXCP-dən iddia edirlər ki, fəalın saxlanması onun siyasi fəaliyyəti ilə bağlıdır: "Sahib bəy heyvanlarını yaylağa aparırdı. Qara maskalı şəxslər polis postunda Sahib bəyi saxlayıb naməlum istiqamətə aparıblar".
AXCP-nin hazırda azı beş fəalı müxtəlif ittihamlarla uzunmüddətli həbsdədir. Partiyadan onların siyasi sifarişlə şərləndiyini bəyan ediblər. Amma rəsmilər ölkədə siyasi həbslərin olması ilə bağlı deyilənləri qəbul etmirlər.
Bütün xəbərləri izləyin
İsrail mətbuatı: Netanyahu mayda Azərbaycana gələcək
İsrailin baş naziri Benyamin Netanyahu mayın birinci yarısında Azərbaycan səfər edəcək, Azərbaycan prezidenti İlham Əliyevlə görüşəcək. Bu barədə "Times of Israel" öz mənbələrinə istinadən yazıb.
Nəşr bildirib ki, tərəflər rəsmi Bakının vasitəçiliyi ilə Türkiyə və İsrail arasında Suriyaya dair aparılan danışıqları müzakirə edəcəklər.
Eyni zamanda, ikitərəfli münasibətlərin möhkəmləndirilməsi və ABŞ ilə üçtərəfli əməkdaşlığın genişləndirilməsi məsələləri də gündəmdə olacaq.
Aprelin əvvəlində Azərbaycan prezidenti Antalya Diplomatik Forumu çərçivəsində Türkiyə prezidenti Rəcəb Tayyib Ərdoğan və Suriya prezidenti Əhməd əl-Şaraa ilə görüşüb.
Körpü qəzalı vəziyyətə düşüb, 50 min sakinin gediş-gəlişi çətinləşib
Son günlər Quba-Qonaqkənd-Muçu avtomobil yolunun 7-ci kilometrində Qaraçay çayı üzərində inşa edilmiş dördaşırımlı körpünün qəzalı vəziyyətə düşməsi nəticəsində bu rayonun bir çox kəndlərinə gediş-gəliş çətinləşib.
Avtomobil Yolları Dövlət Agentliyindən (AAYDA) bildirilib ki, əlavə təhlükəsizlik tədbirləri görülüb və körpü ilə avtonəqliyyat vasitələrinin hərəkəti tam məhdudlaşdırılıb: "Sürücülər müvəqqəti olaraq alternativ yol kimi Quba-Pirvahid-İkinci Nügədi avtomobil yolundan istifadə edə bilərlər".
Agentlik körpünün qəzalı vəziyyətə düşməsini son günlər intensiv yağıntılar nəticəsində yaranmış güclü sel suları ilə izah edib.
Quba rayon Fövqəladə Hallar Komissiyasından da bildirilib ki, hadisə nəticəsində Quba rayonunun 60-dan çox kəndinə aparan əsas yol bağlanıb: "Bu istiqamətdə olan kəndlərdə 51 mindən çox əhali yaşayır".
Qaraçay üzərində həmin körpü 1959-cu ildə inşa edilib və 101 metr uzunluğundadır.
Son həftələr Azərbaycanda yağıntılar istər Bakıda, istərsə də bölgələrdə bir sıra fəsadlar törədib. Sel sularında dörd nəfərin boğulduğu açıqlanıb.
Azərbaycan xidmətdən yayınan hərbçini Rusiyaya verib
Azərbaycan Baş Prokurorluğu hərbi hissəni özbaşına tərk etməkdə təqsirləndirilərək axtarışa verilmiş hərbi qulluqçu Sotim Savlatovun ekstradisiyası ilə bağlı Rusiya prokurorluğunun vəsatətini təmin edib.
"Savlatov bu gün Ədliyyə Nazirliyi Penitensiar Xidmətinin xüsusitəyinatlı hissəsinin müşayiəti ilə Rusiya Federasiyasının səlahiyyətli orqanına təhvil verilib", - Baş Prokurorluğun məlumatında bildirilir.
"Mediazona"nın məlumatına görə, 27 yaşlı Savlatov Tacikistanda doğulub. Onun Rusiya vətəndaşlığı var və Tver vilayətində yaşayıb. Rusiya Daxili İşlər Nazirliyi 2023-cü il oktyabrın sonundan Savlatov barəsində axtarış elan edib.
Hərbçi 2025-ci ilin yanvarında Azərbaycanda saxlanılıb. Savlatov ekstradisiya olunana qədər həbsdə saxlanılıb.
"Mediazona" bildirir ki, Ukraynanın tammiqyaslı işğalı başlayandan bəri Rusiya məhkəmələrində fərarilik, əmrə tabe olmama və bölmənin icazəsiz tərk edilməsi maddələri ilə Rusiya məhkəmələrində təxminən 16 min cinayət işi qaldırılıb. Təkcə fərarilik maddəsi ilə 683 iş məhkəməyə göndərilib. Bu maddə üzrə ən ağır cəza 15 ilədək azadlıqdan məhrumetməni nəzərdə tutur.
Şəhər rəhbərliyi Milli Şuranın mitinqini 'məqsədəuyğun' saymadı
Bakı şəhər İcra Hakimiyyəti (BŞİH) müxalifətdə olan Azərbaycan Xalq Cəbhəsi Partiyası (AXCP) və Milli Şuranın aprelin 27-də ölkə paytaxtında mitinq keçirməklə bağlı müraciətinə müsbət cavab verməyib.
Şəhər rəhbərliyi mitinqin keçirilməsini "məqsədəuyğun" hesab etməyib.
Təşkilatçılar hazırda həbsdə aclıq aksiyası keçirən Milli Şura, Müsavat Partiyasının üzvü Tofiq Yaqublu və digər siyasi məhbus sayılan şəxslərin azadlıq tələbi ilə mitinq üçün BŞİH müraciət etmişdi.
Bakıda müxalifətin son razılaşdırılmış etiraz aksiyası 2019-cu ildə keçirilib. Ondan sonra şəhər rəhbərliyi, əsasən, paytaxtın mərkəzi ərazilərində nəqliyyatın sıxlığını səbəb göstərərək etiraz aksiyalarına müsbət cavab verməyib. Müxalifət də şəhər kənarında etiraz aksiyası keçirmək istəməyərək onlara müsbət cavab verilməməsini sərbəst toplaşmaq azadlığının pozulması kimi dəyərləndirib.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 350-dən çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Xatırlatma
T.Yaqubluya 9 il həbs cəzası verilib. Bu il martın 10-da Bakı Ağır Cinayətlər Məhkəməsində ona hökm oxunub. Bu hökmlə T.Yaqublu Cinayət Məcəlləsinin 178.3.2 (külli miqdarda ziyan vurmaqla dələduzluq) və 320-ci (saxta sənəd hazırlama və ya istifadə etmə) maddələri ilə təqsirli bilinib. Amma o, ittihamları qurama, siyasi sayır.
Azərbaycanla Çin arasında vizasız gediş-gəliş haqqında saziş imzalanıb
Aprelin 23-də Pekində Azərbaycan prezidenti İlham Əliyev və Çin dövlət başçısı Si Cinpinin iştirakı ilə iki ölkə arasında bir sıra sənədlərinin imzalanması mərasimi olub. Həmin sənədlərdən biri "Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş"dir.
Hazırda Azərbaycanla bir sıra ölkələr arasında oxşar razılaşma var.
Amma son illər bu istiqamətdə Avropa İttifaqı (Aİ) ilə aparılan müzakirələr, hələlik, elə bir nəticə verməyib. 2017-ci ildən Azərbaycanla Aİ arasında strateji tərəfdaşlıq haqqında saziş layihəsi üzrə danışıqlar aparılır. Amma, hələlik, bu danışıqlar müsbət sonluqla başa çatmayıb. Həmin layihə çərçivəsində aparılan müzakirələrin elementlərindən biri də viza rejiminin sadələşdirilməsidir.
Xatırlatma
Ötən il iyulun 3-də "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə" imzalanıb. Həmin vaxt da prezident İ.Əliyev Çinə səfər etmişdi.
Eyni zamanda, Azərbaycan rəsmiləri Çinin "Bir kəmər, bir yol" layihəsini dəstəklədiklərini açıqlayıblar. Çin hökumətinin 2013-cü ildə qəbul etdiyi həmin layihə 70-ə yaxın ölkəyə və beynəlxalq təşkilata sərmayə yatırmaq məqsədi daşıyan infrastruktur inkişafı strategiyasıdır.
Azərbaycan müxalifəti hökumətin Çin və Rusiya kimi ölkələrə yaxınlaşmasını tənqid edir, Qərbə inteqrasiyanı vacib sayırlar.
Azərbaycanda inflyasiya azalacaqmı?
Azərbaycan Mərkəzi Bankı (AMB) bu gün, aprelin 23-də 2025-ci illə bağlı inflyasiya proqnozunu açıqlayıb. Qurumun vurğulamasına görə, illik inflyasiyanın bu il 5.3, 2026-cı ildə isə 4.3 faiz ətrafında olacağı gözlənilir.
Qeyd edilib ki, baza ssenari üzrə 2025-ci və 2026-cı ildə illik inflyasiyanın hədəf daxilində (4±2%) olacağı proqnozu dəyişməz qalır.
10 aprel
Azərbaycanda inflyasiya artır, amma...
Dövlət Statistika Komitəsi (DSK) bildirir ki, 2025-ci ilin martında istehlak qiymətləri indeksi (inflyasiya göstəricisi) 2024-cü ilin analoji dövrünə nisbətən 5.9 faiz artıb.
Bu rəqəm qida məhsulları, içkilər və tütün məmulatları üzrə 6.5, qeyri-qida məhsulları üzrə 2.8 faiz, əhaliyə göstərilmiş ödənişli xidmətlər üzrə 7.5 faiz təşkil edib.
Martda istehlak qiymətləri əvvəlki aya nisbətən 0.6 faiz yüksəlib.
Müstəqil iqtisadçılar bu rəqəmlərə şübhə ilə yanaşırlar. Onların fikrincə, Azərbaycanda reallıqda inflyasiya daha yüksəkdir.
Hazırda müstəqil iqtisadçılar qarşıdakı aylarda da inflyasiyanın aşağı düşəcəyinə şübhə edirlər. Onlar vurğulayırlar ki, hazırda bir sıra kənd təsərrüfatı məhsulları ötən ilin eyni dövrü ilə müqayisədə az qala 100 faiz bahadır.
Hacı Vəliyevin həbs müddəti uzadılıb
Bu gün, aprelin 18-də Gənc Qazilər Birliyinin sədri Hacı Vəliyevin həbs müddəti uzadılıb.
Bu barədə vəkil Aqil Layıc məlumat verib. Bununla bağlı Xətai rayon Məhkəməsində təqdimata baxılıb. Məhkəmə həbs müddətinin 2 ay uzadılması barədə qərar verib.
Müdafiə tərəfinin bildirməsinə görə, H.Vəliyev həbsdə müalicəsini davam etdirə və ağrıkəsicilərlə təmin edilə bilməməsindən şikayətlənir. Ədliyyə Nazirliyinin Penitensiar Xidmətindən onun Mərkəzi Müalicə Müəssisəsinə köçürülməsi istənilir.
Bu xahişə, hələlik, Penitensiar Xidmət və ya başqa rəsmi qurumlardan münasibət almaq mümkün olmayıb.
H.Vəliyev barəsində aprelin 1-də Xətai rayon Məhkəməsində 22 gün müddətinə həbs-qətimkan tədbiri seçilmişdi. Onun Cinayət Məcəlləsinin 221.3-cü (Silahdan və ya silah qismində istifadə olunan əşyalardan istifadə edilməklə xuliqanlıq...) və 186.1-ci (Özgənin əmlakını qəsdən məhv etmə və ya zədələmə - zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunduğu bildirilir. Amma onun ittihamları qəbul etmədiyi vurğulanır. Həmin maddələrlə şəxsə 5 ilə qədər həbs cəzası verilə bilər.
H.Vəliyev sosial şəbəkələrdə tənqid çıxışları ilə də tanınırdı. Onun bundan əvvəl də saxlanıb sərbəst buraxıldığı bildirilmişdi. O, xüsusilə İkinci Qarabağ müharibəsindən sonrakı dövrdə döyüşlərdə sağlamlığını itirmiş hərbçilərin və ya həlak olanların ailələrinin problemlərini ictimailəşdirib.
Gənc Qazilər Birliyi 2021-ci ildə "Qarabağ qaziləri" İctimai Birliyinin nəzdində yaradılıb.
Əfqan Sadıqov həbsdən azad edilib
"Azel TV" saytının Gürcüstanda həbsdə olan təsisçisi Əfqan Sadıqovun dünən, aprelin 16-da məhkəmənin qərarı ilə azad olunduğu bildirilir.
Bu məlumatı onun həyat yoldaşı Sevinc Sadıqova yayıb: "Gürcüstan Avropa İnsan Hüquqları Məhkəməsinin qərarını icra etdi. Bunu əminliklə deyirəm, yaxın gələcəkdə biz bu saxta cinayət işinin bəraətini də mütləq alacağıq".
Bildirilir ki, Gürcüstan qanunvericiliyinə görə, ekstradisiya həbsi üçün nəzərdə tutulan 9 aylıq müddətin tamamlanmasına bir neçə həftə qalmış Tbilisi məhkəməsi belə qərar çıxarıb.
Məhkəmə onu 5 min lari (3 min manat) məbləğində girov qarşılığında azadlığa buraxıb.
Ə.Sadıqov azadlığa çıxdıqdan sonra, aprelin 17-də keçirdiyi mətbuat konfransında deyib ki, qərarla razı deyil və həmin məbləği ödəmək niyyəti yoxdur. O, çıxışında Azərbaycan və Gürcüstan hakimiyyətini sərt tənqid edib.
Onun fikirlərinə, hələlik, Azərbaycan və Gürcüstan rəsmilərindən münasibət almaq mümkün olmayıb.
Bu il yanvarın 31-də Tbilisi şəhər Məhkəməsi Ə.Sadıqovun həbs müddətini 3 ay uzatmışdı. Ondan öncə Gürcüstanın Sosial Ədalət Mərkəzi bildirmişdi ki, Avropa Məhkəməsinin qərarına görə, Gürcüstan məhkəməsi bu iş üzrə yekun qərar qəbul edənə qədər Sadıqov Azərbaycana ekstradisiya olunmamalıdır.
Ə.Sadıqov 2023-cü ilin dekabrında ailəsi ilə birlikdə Gürcüstana gəlib. Ötən ilin iyulunda o, Gürcüstandan Türkiyəyə buraxılmadığını söyləyib. Avqustda Azərbaycanın sorğusu ilə Ə.Sadıqov həbs edilib. Bakıda o, pul tələb etməkdə ittiham olunur və onun ekstradisiyası tələb olunur. Gürcüstan hakimiyyəti ona siyasi sığınacaq verməkdən imtina edib. 2024-cü il noyabrın 28-də Tbilisi şəhər Məhkəməsi Ə.Sadıqovun Azərbaycana ekstradisiyası haqqında qərar qəbul etmişdi. Lakin qərar icra edilməmişdi.
Xatırlatma
"Azel TV" saytının təsisçisi və baş redaktoru Ə.Sadıqov bundan əvvəl 2016-cı il noyabrın 22-də Azərbaycanda saxlanmışdı. Ona Cinayət Məcəlləsinin 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham irəli sürülmüşdü. O, icra hakimiyyətində bir qadına xəsarət yetirməkdə ittiham edilirdi. Ancaq o, ittihamı qəbul etmir, işi qurama sayırdı. 2017-ci il yanvarın 12-də Cəlilabad rayon Məhkəməsi onu 2 il yarım müddətinə azadlıqdan məhrum edib. Həmin ilin noyabrında isə Ali Məhkəmə Ə.Sadıqovun cəza müddətini 2 il yarımdan 1 il yarımadək azaldıb. O, 2018-ci il mayın 23-də azadlığa çıxıb.
Azadlığa çıxdıqdan sonra da o, polisin qanuni tələbinə əməl etməməkdə günahlandırılaraq 30 sutka həbs cəzası almışdı. Ə.Sadıqov onda da ittihamı qəbul etmirdi.
Tbilisidə Azərbaycan, Ermənistan və Gürcüstan rəsmiləri görüşüb
Bu gün, aprelin 17-də Tbilisidə Azərbaycan, Gürcüstan və Ermənistan arasında xarici işlər nazirlərinin müavinləri səviyyəsində üçtərəfli görüş keçirilib.
Görüşdə Azərbaycandan Elnur Məmmədov, Gürcüstandan Laşa Darsaliya, Ermənistan tərəfdən isə Vaan Kostanyan iştirak edib. "Onlar üç Cənubi Qafqaz ölkəsinin ilk üçtərəfli görüşünün keçirilməsini alqışlayıb, bir-birinin suverenliyinə və ərazi bütövlüyünə tam hörmətə əsaslanan əməkdaşlıq potensialının imkanlarından hələ də tam şəkildə istifadə olunmadığını bildiriblər", - birgə məlumatda yazılıb.
Qeyd edilib ki, görüşün məqsədi regionda davamlı inkişaf və firavanlığı təşviq etmək naminə ümumi maraq kəsb edən sahələrdə üçtərəfli əməkdaşlığı inkişaf etdirməkdir: "Görüşdə açıq fikir mübadiləsi şəraitində potensial əməkdaşlıq sahələrinə dair baxışlar təqdim edilib".
Xatırlatma
Bu belə bir formatda ilk görüşdür. Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olmuşdu. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilmişdi. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
İki il öncə Qarabağdakı erməni əhali Ermənistana köç edib, rəsmi Yerevan baş verənləri etnik təmizləmə kimi dəyərləndirir. Azərbaycan isə etnik təmizləmə ilə bağlı ittihamları qəbul etmir.
Hazırda tərəflər arşında sülh sazişinin imzalanması üçün danışıqlar gedir. Artıq bütün müddəaların da razılaşdırıldığı bildirilir.
Macarıstan Aİ-nin Ermənistana əlavə hərbi yardımını bloklayır
Macarıstan Avropa İttifaqının (Aİ) Ermənistana 10 milyon avro (11 milyon dollar) dəyərində əlavə "qeyri-öldürücü" hərbi yardım ayırmasına blok qoyub. Bu yardım Avropa Sülh Təşəbbüsü (EPF) çərçivəsində ayrılmalıydı.
Aİ-nin xarici siyasət rəhbəri Kaya Kallas ilin əvvəlində bu yardımın ayrılmasını təklif edib. Təsdiqlənməsi üçün ona Aİ-nin 27 üzv ölkəsinin yekdil dəstəyi lazımdır.
Macarıstandan savayı, qalan üzvlər Kallasın təklifini dəstəkləyib. Bunu Brüsseldəki diplomatik mənbə deyib. O əlavə edib ki, Aİ-nin xarici işlər nazirlərinin aprelin 14-də Lüksemburqdakı görüşündə Budapeşt qərara veto qoyub.
"Bugünkü danışıqlardan sonra irəliləyiş əldə olunmayıb", – mənbə aprelin 15-də AzadlıqRadiosunun erməni xidmətinə söyləyib.
Ermənistan Aİ-dən ötən ilin iyulunda 10 milyon avroluq ilk hərbi yardımı alıb. Həmin vəsait növbəti iki il yarım ərzində bir batalyonluq hərbi hissə üçün səhra hospitalının və yardımçı obyektlərin quraşdırılmasına xərclənməlidir.
Macarıstan həmin vəsaitin ayrılmasını da aylarla bloklayıb, oxşar yardımın Azərbaycana da verilməsini tələb edib. Bakı ilə sıx əlaqələri olan Budapeştin vetonu Aİ-nin Azərbaycanda minaların təmizlənməsini başqa mənbədən maliyyələşdirmək vədi qarşılığında qaldırdığı deyilir.
Macarıstan Dağlıq Qarabağ münaqişəsində Azərbaycanı açıq dəstəkləyib. Azərbaycan 2020-ci ildə 44 günlük müharibə və 2023-cü ildə birgünlük hərbi əməliyyatla ərazi bütövlüyünü bərpa edib. Tərəflər, hələlik, sülh sazişi imzalamayıb.
Nazirlik qarşıdakı 3 ildə manatın məzənnəsinin dəyişməyəcəyini proqnozlaşdır, amma...
İqtisadiyyat Nazirliyinin təqdim etdiyi makroiqtisadi proqnozlarda 2026-2029-cu illər üzrə manatın ABŞ dollarına qarşı məzənnəsi sabit, bu ilin səviyyəsində götürülüb.
Bu barədə Maliyyə Nazirliyinin bu gün, aprelin 15-də açıqlamasında qeyd edilir.
2017-ci ilin martından Azərbaycanda manatın məzənnəsi sabit saxlanır. O vaxtdan 1 ABŞ dolları 1 manat 70 qəpiyə bərabər sayılır. 2015-ci ildə Azərbaycanda iki dəfə devalvasiya baş vermişdi, nəticədə manat iki dəfə dəyər itirmişdi. Sonrakı 1 il 3 aylıq dönəmdə isə manatın məzənnəsində müəyyən düşüş və artım yaşanmışdı.
Həmin devalvasiyalar öncəsi dünyada neftin qiymətində kəskin ucuzlaşma baş vermişdi.
Son bir ayda da dünyada neftin qiymətində müəyyən azalma baş verir. Hazırda bir barel neftin qiyməti təqribən 65 dollardır. Azərbaycanın 2025-cü il dövlət büdcəsində neftin bir bareli 70 dollar götürülüb.
Müstəqil iqtisadçılardan Zöhrab İsmayıl bugünlərdə AzadlıqRadiosuna bildirib ki, neftin qiyməti 65 dollardan da aşağı düşərsə, manatın kursunu saxlamaq problemə çevrilə bilər: "Hazırkı tarazlıq neftin bir bareli 70 dollar olarsa, qoruna bilir. Hələ keçən ilin son rübündə biz gördük ki, Mərkəzi Bankın ehtiyatları azalmağa başladı. Bu ilin əvvəlindən də görürük ki, Mərkəzi Bank ehtiyatlarını artıra bilmir və ya çox az artıra bilir. Yəni, bu qiymət Azərbaycan iqtisadiyyatında sabitlik üçün son həddir... Bu, uzun müddət davam etsə, yeni bir devalvasiya dalğasına gətirib çıxara bilər".
Azərbaycanın dövlət borcunun artacağı proqnozlaşdırılır
2025-ci ilin sonuna Azərbaycanın dövlət borcunun (xarici və daxili) ümumi məbləğinin 29 milyard manat səviyyəsinə çatacağı gözlənilir.
Bu barədə aprelin 15-də Maliyyə Nazirliyinin yaydığı açıqlamada bildirilir.
Qeyd edilib ki, ortamüddətli (2026-2029-cu illər) dövrün sonuna Azərbaycan dövlət borcunun ümumi məbləğinin 32.7 milyard manat səviyyəsinə çatacağı proqnozlaşdırılır.
2024-cü ilin sonunda Azərbaycanın dövlət borcu 27 milyard 380 milyon manat açıqlanıb.
Halbuki, bir neçə il öncə rəsmilər çıxışlarında, bir qayda olaraq, vurğulayırdılar ki, hökumətin qarşısına qoyduğu əsas məqsədlərdən biri dövlət borcunu azaltmaqdır.
Azərbaycanda doğum sürətlə azalır
Azərbaycanda əhali artımı davam etsə də, son 10 ildə doğum 60 faiz azalıb.
Dövlət Statistika Komitəsinin (DSK) məlumatına görə, bu ilin yanvar-fevral aylarında Ədliyyə Nazirliyinin rayon (şəhər) qeydiyyat şöbələri 15 min 971 doğulan körpə qeydə alıb. Ötən ilin eyni dövründə doğulan uşaqların sayı 17 min 81 olmuşdu.
Əgər 2023-cü ildə ölkədə 112 min 620 uşaq doğulmuşdusa, 2024-cü ildə bu rəqəm 102 min 310 olub.
Ölkədə doğum son 10 ildə isə daha kəskin şəkildə azalıb. Doğum nə az, nə çox düz 60 faiz azalıb. 2014-cü ildə Azərbaycanda 170 min 503 uşaq doğulmuşdu.
Bütün bunlarla belə, əhalinin ümumi sayında az da olsa, artım davam etməkdədir. İlin əvvəlindən ölkə əhalisinin sayı 5 min 777 nəfər və ya 0.1 faiz artaraq 2025-ci il martın 1-də 10 milyon 230 min 666 nəfər təşkil edib.
2014-cü ilin sonunda, rəsmi rəqəmlərə görə, Azərbaycanda 9 milyon 593 min insan yaşayırdı.
Rəbiyyə Məmmədova sərbəst buraxılıb
İctimai fəal Rəbiyyə Məmmədova artıq sərbəst buraxılıb. Sosial mediada onun oturaq etiraz aksiyasını davam etdirdiyini göstərən foto yayılıb.
+++
İctimai fəal, "Sapla" tikiş sexinin qurucusu Rəbiyyə Məmmədova bu gün, aprelin 11-də saxlanıb.
Bir qədər əvvəl o, Facebook səhifəsində İqtisadiyyat Nazirliyi qarşısında oturaq etiraz aksiyası keçirməsi ilə bağlı paylaşım etmişdi.
Hələlik, məsələyə İqtisadiyyat Nazirliyi və Daxili İşlər Nazirliyindən münasibət almaq mümkün olmayıb.
R.Məmmədova iki gün əvvəl, aprelin 9-da da Sahibkarlığın İnkişafı Fondunun (SİF) qarşısında təkadamlıq oturaq etiraz aksiyası keçirdiyini açıqlamışdı. O bildirirdi ki, fevralın 6-dan müraciət etsə də, kredit ala bilmir. Fonddan ona müraciətinin araşdırıldığını bildiriblər.
Məmmədova vurğulayırdı ki, söhbət 15 min manatlıq kreditdən gedir və onlar bu məbləği faizi ilə geri qaytaracaqlar, lakin kredit verilmir. O, 2022-ci ildə yaratdığı "Sapla" adlı sosial təşəbbüsün fəaliyyətinə əngəllər yaradıldığını iddia edirdi.
Xanım sahibkar bir neçə gün əvvəl bununla bağlı prezident İlham Əliyevə də müraciət ünvanladığını bildirmişdi.
R.Məmmədova 2020-ci ildə Azərbaycanda keçirilən parlament seçkilərində 10 saylı Binəqədi üçüncü seçki dairəsindən namizədliyini vermişdi. O, seçkidən sonra bir çox etiraz aksiyalarına qatılaraq səsvermədə hüquqlarının pozulduğunu, ciddi saxtakarlıq hallarına yol verildiyini açıqlamışdı. Lakin seçki komissiyası onun şikayətini əsaslı saymamışdı.
Xanlar Vəliyev Konstitusiya Məhkəməsinin hakimi oldu
Keçmiş hərbi prokuror Xanlar Vəliyev Konstitusiya Məhkəməsinin hakimi təyin olunub. Bu barədə təqdimat Milli Məclisin bu gün, aprelin 11-də keçirilən iclasında müzakirəyə çıxarılıb. Layihə səsverməyə çıxarılaraq bir oxunuşda qəbul edilib. Bunun ardınca X.Vəliyev Milli Məclisdə and içib.
Üç gün öncə, aprelin 8-də X.Vəliyevin hərbi prokuror kimi səlahiyyət müddəti başa çatmışdı. O, 1995-ci ildən hərbi prokuror vəzifəsini tuturdu. Bu müddət ərzində Hərbi Prokurorluğun apardığı bir çox cinayət işləri cəmiyyətdə müzakirə və şikayətlər doğurub.
Onlardan biri də 2017-ci ildə başlanan "Tərtər işi" olub. Həmin vaxt bir çox hərbçilər dövlətə xəyanət ittihamı ilə istintaqa cəlb edilmişdi. Onda əsgər və zabitlərə qarşı işgəncələr nəticəsində 11 nəfərin öldüyü vurğulanıb.
2021-ci ilin dekabrında – "Tərtər işi" üzrə yenidən istintaq başlanandan sonra toplam 452 nəfər zərərçəkmiş qismində tanınıb. Onların arasında həmin olaylar zamanı işgəncələrə məruz qaldıqlarını bildirənlərlə yanaşı, həyatını itirən şəxslərin hüquqi varisi qismində tanınan ailə üzvləri də olub.
Tərtər işgəncələri ittihamı ilə cinayət məsuliyyətinə cəlb olunanlardan bütövlükdə üç qrup üzrə 13 nəfər hakim önünə çıxarılıb. Onlara 4 il 10 aydan 13 ilədək həbs cəzası kəsilib. Ancaq onlar özlərini təqsirli bilmir və yuxarı instansiya məhkəmələrinə şikayət veriblər. Üstəlik, bezi şikayətlərə görə, işgəncələrə görə məsuliyyət daşıyan daha böyük vəzifəli şəxslər məsuliyyətdən kənarda qalıb.
Konstitusiya Məhkəməsinin hakimlərini prezidentin təqdimatı ilə Milli Məclis təyin edir.
Bu ay Konstitusiya Məhkəməsi hakimlərinin vəzifədə olmasının yaş həddi artırılıb. Dəyişikliklə Konstitusiya Məhkəməsi hakiminin vəzifədə olmasının yaş həddi 70-dən 75-ə artırılıb. X.Vəliyevin ötən ay 70 yaşı tamam olmuşdu.
