Xəbərlər
MN: Fərrux kəndi və ətraf yüksəkliklərdəki mövqelərdə heç bir dəyişiklik baş verməyib
Azərbaycan ordusunun Fərrux ərəzisindən çıxması barədə Rusiya Müdafiə nazirliyinin yaydığı məlumatdan bir qədər sonra Azərbaycan Müdafiə Nazirliyi bu məlumatı təkzib edib. Nazirliyin martın 27-də yaydığı məlumatda deyilir ki, Azərbaycan Ordusunun Fərrux kəndi və ətraf yüksəskliklərdəki mövqelərində heç bir dəyişiklik baş verməyib.
"Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir".
Nazirlik həmçinin Rusiya tərəfinin açıqlamasında atəşkəsin guya Azərbaycan tərəfindən pozulması barədə verilmiş məlumatın da həqiqətə uyğun olmadığını və Azərbaycan hərbçiləri arasında yaralanma halı qeydə alınmadğını bildirir.
"Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir"
Müdafiə Nazirliyi Rusiyanın Müdafiə Nazirliyinə xatırlafır ki, fevral ayında Azərbaycanla və Rusiya prezidentləri arasında Mütəfiqlik Bəyannaməsini yara salır.
"Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.”.
Nazirliyin açıqlamasında daha sonra bəyannamənin 18-ci bəndini də bir daha xatırladılır. Qeyd olunur ki, Rusiya Müdafiə Nazirliyinin bu açıqlamaları Rusiya prezidenti tərəfindən imzalanmış bəyannaməyə hörmətsizlikdir.
"...18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər. Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir"
Müdafiə Nazirliyi bir daha Rusiya Müdafiə nazirliyinə xatırladır ki, Azərbaycanın Xocalı rayonunda "Furux" adlı kənd yoxdur.
"Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir" Azərbaycan Müdafiə Nazirliyinin açıqlamasında vurğulanır.
***
Azərbaycan Fərruxdan öz bölmələrini çıxarıb-Rusiya Müdafiə Nazirliyi
"Danışıqların nəticələrinə əsasən, Azərbaycan tərəfi FURUX (Fərrux -AR.) yaşayış ərazisindən öz bölmələrinin çıxarılmasını həyata keçirib".
Martın 27-də Rusiya Müdafiə Nazirliyinin yaydığı məlumatda belə deyilir.
Nazirliyin məlumatında bir də atəşkəsin iki dəfə Azərbaycan silahlı qüvvələri tərəfindən pozulduğu vurğulanır. Həmçinin qeyd olunur ki, atışma nəticəsində hər iki tərəfdən iki nəfər yaralanıb.
Azərbaycan Müdafiə Nazirliyinin hələkə bu açıqlamaya münasibəti bəlli deyil.
***
"Azərbaycan Respublikası Müdafiə Nazirliyi Rusiya Federasiyası Müdafiə Nazirliyinin 2022-ci il 26 mart tarixli həqiqəti əks etdirməyən və birtərəfli açıqlaması ilə bağlı təəssüfünü bildirir".
Azərbaycanın müdafiə naziriyi Rusiya müdafiə nazirliyinin martın 26-da yaydığı məlumata verdiyi reaksiyada belə deyilir.
Məlumatda martın 25-də iki ölkənin müdafiə nazirləri telefon danışığı zamanı Rusiya sülhməramlı kontingentinin müvəqqəti yerləşdiyi Azərbaycan əraziləri boyunca yaranmış vəziyyət müzakirə edilib. Söhbət zamanı Azərbaycan tərəfi bəyan edib ki, məntəqələrdə mövqelərin və dislokasiya yerlərinin dəqiqləşdirilməsi aparılır.
"Lakin buna baxmayaraq martın 26-sı səhər saatlarında qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib".
Müdafiə Nazirliyi bildirir ki, Azərbaycan 2020-ci il 10 noyabr tarixli üçtərəfli bəyanata sadiqdir və onun heç bir müddəasını pozmayıb.
"Təəssüflə qeyd edirik ki, həmin bəyanatın 4-cü bəndinə uyğun olaraq, Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən tam olaraq çıxarılması indiyə qədər icra edilməmişdir. Buna görə bəyanatın müddəalarını pozan Azərbaycan deyil, məhz Ermənistandır".
Nazirliyin açıqlamasında bildirir ki, Rusiya Federasiyası Müdafiə Nazirliyinin bu açıqlaması ikitərəfli əlaqələrin mahiyyətinə və 2022-ci il 22 fevral tarixində iki ölkə arasında imzalanmış müttəfiqlik qarşılıqlı fəaliyyəti haqqında Bəyannaməyə ziddir.
Azərbaycan ərazisində “Dağlıq Qarabağ” adlı inzibati ərazi vahidi yoxdur. Açıqlamada qeyd edilən kəndin adı Furux deyil, Fərruxdur".
Nazirlik bildirir ki, "yuxarıda qeyd edilənlərlə əlaqədar Azərbaycan Respublikası Müdafiə Nazirliyi Rusiya Federasiyası Müdafiə Nazirliyini üçtərəfli bəyanatın müddəalarına uyğun olaraq Ermənistan ordusunun qalıqlarının və qeyri-qanuni erməni silahlı dəstələrinin Azərbaycanın beynəlxalq birlik tərəfindən tanınmış ərazilərindən tam olaraq çıxarılmasını təmin etməyi, Azərbaycan silahlı qüvvələrinin ölkəmizin suveren əraziləri daxilində hərəkətini təhrif edilmiş formada qələmə verməməyi, “Dağlıq Qarabağ” ifadəsi işlətməməyi və Azərbaycan ərazilərinin adını düzgün olaraq göstərməyi xahiş edir"-deyə Azərbaycan Müdafiə Nazirliyinin bəyanatında deyilir.
***
Rusiya müdafiə nazirliyinin məlumatından sonra Rusiyanın xarici işlər nazirliyi də tərəfləri təmkinli olmağa çağırıb.
"Biz tərəfləri təmkin nümayiş etdirməyə və mövcud üçtərəfli sazişlərə ən yüksək səviyyədə ciddi əməl olunmasını təmin etməyə çağırırıq"
****
"Martın 24-dən 25-dək Azərbaycan Respublikasının silahlı qüvvələri Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub. Dağlıq Qarabağ ərazisində müşahidə məntəqəsi qurub. “Bayraktar-TB 2” tipli pilotsuz uçuş aparatı Furux (Fərux-A.) yaşayış məntəqəsi ərazisində Dağlıq Qarabağ silahlı birləşmələrinin bölmələrinə 4 zərbə endirib".
Belə bir məlumat martın 26-da Rusiya Müdafiə Nazirliyinin Qarabağdakı Rusiya sülhməramlı kontingentinin fəaliyyəti haqqında dərc etdiyi bülletenində yer alıb.
Məlumatda deyilir ki, "hazırda Rusiya sülhməramlı kontingentinin komandanlığı vəziyyətin həlli və qoşunların ilkin mövqelərinə qaytarılması üçün tədbirlər görür. Qoşunların çıxarılması üçün Azərbaycan tərəfinə müraciət göndərilib".
Xatırlatma
Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. Amma 2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağda Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.
Bütün xəbərləri izləyin
Azərbaycan və Çin arasında siyasi məsləhətləşmələr olub
Azərbaycan və Çin arasında siyasi məsləhətləşmələr keçirilib. Bu barədə Azərbaycan Xarici İşlər Nazirliyi (XİN) məlumat yayıb.
Məlumatda bildirilir ki, martın 26-da Azərbaycan xarici işlər nazirinin müavini Elnur Məmmədov Çin Xalq Respublikasına səfər edib. Əlavə edilir ki, martın 28-də Pekin şəhərində iki ölkənin xarici işlər nazirlikləri arasında siyasi məsləhətləşmələrin növbəti raundu keçirilib. Nümayəndə heyətlərinə Azərbaycandan E.Məmmədov, Çin tərəfindən isə xarici işlər nazirinin müavini Lyu Bin başçılıq ediblər.
"Məsləhətləşmələr zamanı siyasi, iqtisadi, ticarət, energetika, yaşıl keçid, rəqəmsal inkişaf, nəqliyyat-logistika, təhsil, mədəniyyət, turizm və digər sahələrdə əməkdaşlığa dair ətraflı fikir mübadiləsi aparılıb", - məlumatda vurğulanıb.
Xatırlatma
Ötən il iyulun 3-də "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə" imzalanıb. Həmin vaxt prezident İlham Əliyev Çinə səfər etmişdi.
Eyni zamanda, Azərbaycan rəsmiləri Çinin "Bir kəmər, bir yol" layihəsini dəstəklədiklərini açıqlayıblar. Çin hökumətinin 2013-cü ildə qəbul etdiyi həmin layihə 70-ə yaxın ölkəyə və beynəlxalq təşkilata sərmayə yatırmaq məqsədi daşıyan infrastruktur inkişaf strategiyasıdır.
Azərbaycan müxalifəti hökumətin Çin və Rusiya kimi ölkələrə yaxınlaşmasını tənqid edir, Qərbə inteqrasiyanı vacib sayırlar.
Ərdoğan və Putin arasında telefon danışığı olub
Türkiyə prezidenti Rəcəb Tayyib Ərdoğan və Rusiya prezidenti Vladimir Putin arasında telefon danışığı baş tutub.
Türkiyə Prezident Ofisinin yaydığı məlumata görə, tərəflər Türkiyə - Rusiya münasibətlərini, regional və qlobal məsələləri müzakirə ediblər.
"Prezident Ərdoğan telefon danışığı zamanı... Türkiyənin Rusiya və Ukrayna arasında müharibəyə son qoymaq üçün başladılan prosesi yaxından izlədiyini, ləyaqətli və davamlı sülhün təmin olunması üçün Türkiyənin hər cür dəstəyi göstərməyə, o cümlədən sülh danışıqlarına ev sahibliyi etməyə hazır olduğunu bildirib", - prezident Ərdoğanın ofisinin yaydığı məlumatda deyilir.
O, həmçinin Qara dənizdə ticarət gəmiçiliyinin təhlükəsizliyi üçün atılacaq "xoşniyyətli" addımların sülh prosesinə töhfə verəcəyinə inandığını deyib.
Türkiyə prezidenti, eyni zamanda, əlavə edib ki, rəsmi Ankara Suriyada Rusiya ilə əməkdaşlığa dəyər verir və hər iki ölkə Suriyada məzhəb zorakılığını qızışdıran hərəkətlərə son qoymaq, sanksiyaların ləğvinə və davamlı sabitliyə nail olmaq üçün birlikdə işləməlidir.
Rusiya vətəndaşlığı alan xaricilərin sayı son 5 ildə ən aşağı həddə düşüb
Getdikcə daha az əcnəbi Rusiya vətəndaşlığı alır və ya bu ölkədə yaşamaq icazəsi üçün müraciət edir. Rusiyanın "Kommersant" nəşri ölkənin Daxili İşlər Nazirliyinin (DİN) statistikasına istinad edərək yazıb ki, keçən il 209 min əcnəbi Rusiya vətəndaşlığını alıb ki, bu da son beş ildə ən aşağı rəqəmdir. 2023-cü ildə bu göstərici 378 min, 2022-ci ildə isə 691 min olub.
"Kommersant"a müsahibə verən ekspertlər hesab edir ki, bu azalma Rusiyanın Ukraynada apardığı müharibə, "Crocus City" konsert zalında baş vermiş terror aktı və Rusiyaya qayıtmaq istəyən rusların repatriasiyası üzrə "məqsədli işin" aparılmaması ilə bağlıdır.
Bununla belə, ötən il Rusiyadan qovulan əcnəbilərin sayı əvvəlki illərlə müqayisədə artıb. 2024-cü ildə Rusiyadan 190 min nəfər deportasiya edilib. DİN bunu miqrasiya sahəsində nəzarətin gücləndirilməsi ilə izah edir.
Prezident: 'Azad edilmiş ərazilərdə 40 mindən çox insan yaşayır'
"Azad edilmiş ərazilərdə indi 40 mindən çox insan yaşayır və çalışır". Bunu prezident İlham Əliyev martın 27-də Ağdam rayonunun Sarıcalı kəndinin birinci mərhələsinin açılışında yeni mənzillərə köçən sakinlərlə görüşündə deyib.
Onun deməsinə görə, ilin sonuna qədər də təqribən 30 min, 40 min insan qayıtmalıdır: "İndi Ağdam rayonunun ilk sakinləri sizsiniz. Amma yaxın aylarda qonşularınız da gələcək, Xıdırlıya, - yəqin ki, görmüsünüz, böyük inşaat işləri gedir, - Kəngərliyə, ilin sonuna qədər Ağdam şəhərinə".
Baş nazir Əli Əsədovun deməsinə görə, ümumilikdə 2021-2024-cü illərdə işğaldan azad olunmuş ərazilərin yenidən qurulması və bərpası üçün dövlət büdcəsindən 17.6 milyard manat, o cümlədən 2024-cü ildə 5.3 milyard manat ayrılıb. 2025-ci ildə 4 milyard manat məbləğində vəsaitin ayrılması nəzərdə tutulub.
Xatırlatma
Ötən əsrin 90-cı illərinin əvvəllərində Qarabağ münaqişəsi Azərbaycan və Ermənistan arasında toqquşmalar doğurmuş, Azərbaycanın Qarabağ bölgəsi və ətrafındakı 7 rayon işğal edilmişdi.
2020-ci il 44 günlük müharibə və 2023-cü ilin sentyabrında Qarabağdakı əməliyyatlardan sonra Azərbaycan ərazi bütövlüyünü bərpa edib.
Onda Qarabağdan Ermənistana erməni əhalinin köçü baş verdi.
Son illər iki ölkə arasında müxtəlif formatlarda danışıqlar aparılsa da, hələlik, sülh sazişi imzalanmayıb. Bununla belə, tərəflər bu yaxınlarda saziş üzrə bütün maddələrin razılaşdırıldığını açıqlayıblar.
Zelenski və Makron Rusiyanı qeyd-şərtsiz atəşkəsə çağırıb
Martın 26-da Fransa prezidenti Emmanuel Makron və onun ukraynalı həmkarı Volodimir Zelenski Parisdə birgə mətbuat konfransında bildirib ki, Rusiya ABŞ-nin vasitəçiliyi ilə əldə olunan atəşkəsi qeyd-şərtsiz qəbul etməlidir.
Eyni gündə Yamaykada keçirdiyi mətbuat konfransında ABŞ dövlət katibi Marko Rubio isə deyib ki, Vaşinqton Moskvanın atəşkəs şərtlərini nəzərdən keçirəcək: "Biz bunu qiymətləndirəcəyik. Həmin şərtlərdən bəziləri bizimlə bağlı deyil – onlar Avropa İttifaqına aiddir".
Rusiyanı "müharibə istəyi" nümayiş etdirməkdə ittiham edən prezident Makron mətbuat konfransında atəşkəsin əhəmiyyətini vurğulayıb: "Bu, təcavüzkar müharibəyə son qoymaq üçün həlledici mərhələdir".
Fransa dövlət başçısı Rusiyaya qarşı sanksiyalara da toxunaraq əlavə edib ki, bu sanksiyaların qaldırılmasını nəzərdən keçirmək üçün "hələ çox tezdir": "Biz sanksiyaları qaldırmayacağıq, ona görə ki, bu, hələ çox tezdir. Nəticə etibarilə, sanksiyalar yalnız Rusiyanın təcavüz seçimindən asılı olduğu üçün onların ləğvi də yalnız Rusiyanın beynəlxalq hüquqa əməl etmək qərarından asılıdır".
V.Zelenski isə Rusiyanın Qara dənizdə atəşkəslə bağlı irəli sürdüyü şərtlər qarşısında Ukraynanın tərəfdaşlarını "heç olmasa bizim qədər" dözümlü olmağa çağırıb.
"Biz dözümlülüyümüzü göstərmişik. İndi tərəfdaşlarımızın da ən az bizim qədər dözümlü olması çox vacibdir, baxmayaraq ki, onların bunun üçün daha çox imkanları var", – o, jurnalistlərə bildirib.
"Onlar sanksiyalarla bağlı Amerika tərəfinə şərtlər irəli sürürlər. Əgər Amerika möhkəm dayansa... biz öz torpağımızda dayanmışıq və özümüzü müdafiə edirik", – Zelenski əlavə edib.
ABŞ-nin maliyyə naziri Skott Bessent martın 26-da "Fox News"a verdiyi müsahibədə Trampın əgər bu, danışıqlarda ona üstünlük verərsə, Rusiyaya qarşı sanksiyaları sərtləşdirməkdən çəkinməyəcəyini bildirib. Amerikalı rəsmi əlavə edib ki, sanksiyaların sərtləşdirilməsi və ya yüngülləşdirilməsi Rusiya rəhbərliyinin növbəti addımlarından asılı olacaq.
Rusiya məhkəməsi 'Azov' üzvlərinə 23 ilədək həbs cəzası verib
Mariupolun mühasirəsi zamanı əsir götürülmüş 23 ukraynalı Rusiya məhkəməsi tərəfindən 13 ildən 23 ilə qədər həbs cəzasına məhkum edilib. Məhkəmə onları terrorçuluqda təqsirli bilib. Kiyev bu məhkəmə prosesini beynəlxalq hüququn pozulması və "hərbi cinayət" adlandırıb.
Təqsirləndirilənlərin əksəriyyəti 2023-cü ilin iyununda Rostov şəhərində məhkəmə qarşısına çıxarılıb. Təxminən iki ildən sonra məhkəmə hökmü elan edib. İlkin olaraq təqsirləndirilən 24 şəxsdən 11-i əsir mübadiləsi nəticəsində Ukraynaya qayıtdıqdan sonra qiyabi olaraq məhkum edilib, biri isə ötən il həbsdə vəfat edib.
Rusiya mediası və hüquq müdafiəçiləri bildirib ki, təqsirləndirilənlər arasında Ukraynanın elit "Azov" briqadasının 14 hazırkı və keçmiş üzvü, eləcə də aşpaz və yardımçı heyətdə çalışan doqquz qadın və bir kişi olub. Rusiya "Azov" briqadasını terrorçu qrup kimi tanıyır.
Haqqında hökm oxunan bu şəxslər Rusiyanın Ukraynaya qarşı genişmiqyaslı işğal müharibəsinin ilk aylarında Azov dənizi sahilində yerləşən Mariupol şəhərinin mühasirəsi zamanı əsir götürülüb. "Azov" döyüşçüləri aylarla Rusiya qoşunlarına qarşı müqavimət göstərsələr də, 2022-ci ilin mayında təxminən 2 min 500 nəfər təslim olub.
Onların çoxu Mariupoldakı Azovstal polad zavodunda sonadək müqavimət göstərib.
Müttəhimlərdən birinin vəkili bildirib ki, Rusiyada saxlanılan 12 nəfər hökmə qarşı apellyasiya şikayəti verəcək. Lakin Rusiyada bəraət qərarları və uğurlu apellyasiyalar çox nadir haldır.
Almaniya Gürcüstandan rəsmi şəxslərə əlavə qadağalar tətbiq edir
Almaniyanın xarici işlər nazirliyi Gürcüstan rəhbərliyinə münasibətdə əlavə sanksiyaların tətbiq olunduğunu bildirib. Qurum X şəbəkəsində yazıb: "Üç aydır Gürcüstan xalqı Aİ-də gələcək uğrunda ölkə rəhbərliyinə qarşı etiraz edir. Onlar qorxutma, həbslər, zorakılıqla üzləşirlər. Bu gün Almaniya repressiyalara görə məsuliyyət daşıyan rəsmi şəxslərin ölkəyə girişinə əlavə sanksiyalar tətbiq edib".
Sanksiya siyahısına konkret kimin salındığı haqda bilgi verilmir.
Almaniya XİN ötən ilin dekabrında Gürcüstanda etirazçılara və müxalifət təmsilçilərinə qarşı zorakılığa görə məsuliyyət daşıyanlara sanksiyalar açıqlayıb. "Formula" telekanalının məlumatına görə, sanksiya siyahısına DİN, xüsusi təyinatlıların rəhbərləri, parlamentin deputatı Dito Samxaradze salınıb.
Bundan başqa, Almaniyanın Federal Təhsil və Təhqiqatlar Nazirliyi "Gürcüstanda akademik azadlığın məhdudlaşdırılması, Aİ-yə qoşulma prosesinin dayandırılması" səbəbindən Tbilisi ilə əməkdaşlığı dayandırıb.
Zamin Salayevə həbsdə təzyiqlər olduğu deyilir
11 saylı Cəzaçəkmə Müəssisəsində saxlanan müxalif Azərbaycan Xalq Cəbhəsi Partiyası (AXCP) fəalı Zamin Salayevə təzyiqlər göstərildiyi bildirilir.
Bu barədə AzadlıqRadiosuna AXCP-dən məlumat verilib.
Partiyadan bildirildiyinə görə, o bu barədə dostlarına danışıb, lakin detallardan bəhs edilməyib.
AXCP-dən vurğulandığına görə, Z.Salayevə təzyiqlər əvvəllər də olub, amma son vaxtlar daha da artıb.
Hələlik, AXCP-nin bu məlumatına Penitensiar Xidmət və ya başqa rəsmi qurumlardan münasibət almaq mümkün olmayıb. Amma xidmətdən bundan əvvəl həbsdə olan müxalifətçilərə təzyiqlər edilməsi ilə bağlı şikayətləri yalanlayıblar. Onların demələrinə görə, məhkumlarla yalnız qanun çərçivəsində davranılır.
2023-cü il mayın 22-də Qaradağ rayon Məhkəməsinin hökmü ilə Z.Salayev 4 il müddətinə azadlıqdan məhrum edilib. Salayev həmin il fevralın 7-də saxlanmışdı və o, Cinayət Məcəlləsinin 221.3-cü (xuliqanlıq – silah və ya silah qisminə əşya tətbiq etməklə) maddəsi ilə ittiham edilirdi. AXCP fəalı ittihamı qəbul etmir.
Xatırlatma
AXCP-nin fəal üzvlərindən (Salyan şöbəsinin sədri) Z.Salayev bundan əvvəl, 2020-ci ilin aprelində Salyan rayon Məhkəməsində 2 il 3 ay azadlıqdan məhrum edilmişdi. O, həmin vaxt Salyan rayon Polis Şöbəsinin əməkdaşı Həmzə Əzizovun iddiası əsasında Cinayət Məcəlləsinin 147.2 (ağır cinayətdə ittiham etməklə böhtan atma) və 148-ci (təhqir) maddələri ilə məhkum edilib. Salayev həbsindən bir müddət əvvəl sosial şəbəkələrdə adıçəkilən polis əməkdaşı ilə mübahisəsinin videosunu yaymışdı. Həmin videoda cəbhəçi Əzizovu rayonda yaşayan bir qadına qarşı təcavüzə görə ittiham edirdi. Video yayılandan sonra polis əməkdaşı Salyan rayon Məhkəməsində ona qarşı xüsusi ittiham qaydasında iddia qaldıraraq həbsini tələb etmişdi. Videoda haqqında bəhs olunan xanım isə Əzizova bıçaqla xəsarət yetirdiyinə görə 7 il azadlıqdan məhrum edilib. O, polisin zorakı hərəkətlərindən müdafiə olunmaq üçün ona xəsarət yetirdiyini bildirib. Polis əməkdaşı isə onun dediklərinin həqiqətəuyğun olmadığını söyləyib.
Salayev 2022-ci il yanvarın 19-da - Amnistiya Aktı ilə əlaqədar vaxtından bir neçə ay əvvəl azadlığa çıxmışdı.
Əsgərlərin meyiti tapılıb
Gədəbəy rayonu ərazisində yerləşən xidmət yerindən qayıdarkən dumanlı hava şəraitində qar uçqununa düşən Azərbaycan ordusunun hərbi qulluqçuları - əsgər Əli İmanov və əsgər Rüstəm Həmidovun nəşləri aşkar edilib.
Bu barədə Müdafiə Nazirliyi və Fövqəladə Hallar Nazirliyinin yaydığı birgə məlumatda bildirilib.
R.Həmidovun həlak olan vaxt xidmətinin başa çatmasına cəmi 10 gün qaldığı bildirilir.
Rəsmi açıqlama: İki hərbçi qar uçqununa düşüb
Azərbaycan ordusunun iki hərbi qulluqçusunun dumanlı hava şəraitində qar uçqununa düşdüyü bildirilir.
Bu barədə martın 19-da Müdafiə Nazirliyi və Fövqəladə Hallar Nazirliyinin birgə məlumatında bəhs edilir.
"Gədəbəy rayonu ərazisində yerləşən xidmət yerindən qayıdarkən Azərbaycan Ordusunun müddətli həqiqi hərbi xidmət hərbi qulluqçuları - əsgər Ruslan Həmidov və əsgər Əli İmanov dumanlı hava şəraitində qar uçqununa düşüblər", - məlumatda qeyd edilir.
Rəsmi məlumata görə, onların tapılması məqsədilə yüksək dağlıq və çətin relyefli ərazidə hava şəraitinin əlverişsiz olmasına baxmayaraq, zəruri axtarış tədbirlərinə başlanılıb.
Hələlik, rəsmi açıqlamaya sözügedən hərbi qulluqçuların yaxınlarından münasibət almaq mümkün olmayıb.
Bu, Azərbaycan hərbi qulluqçularının qar uçqununa düşməsi ilə bağlı ilk rəsmi açıqlama deyil. Bundan əvvəl sonuncu dəfə belə bir olayın 2023-cü ilin fevralında baş verdiyi bildirilmişdi. Onda bir hərbi qulluqçunun qar uçqununa düşərək həlak olduğu vurğulanmışdı.
Eritreyada saxlanan Azərbaycan vətəndaşları qaytarılıblar
Eritreyada saxlanılan gəmilərin heyətlərində olan Azərbaycan vətəndaşları 4 ay sonra vətənlərinə gətirilib. Bu barədə martın 24-də Azərbaycan Xarici İşlər Nazirliyi (XİN) məlumat yayıb.
Məlumatda bildirilir ki, "Caspian Marine Services B.V." şirkətinin Azərbaycan filialının istismar etdiyi "CMS Pəhləvan", "CMS İgid” və "CMS-3" gəmilərinin heyətlərindəki 18 nəfər ölkə vətəndaşı azadlığa buraxılaraq geri gətirilib.
Rəsmi açıqlamada bu, XİN, Rəqəmsal İnkişaf və Nəqliyyat Nazirliyi, habelə Azərbaycan Xəzər Dəniz Gəmiçiliyinin birgə əlaqələndirmə işlərinin nəticəsi kimi dəyərləndirilib: "Gəmi heyəti Eritreyada olan müddət ərzində ölkəmizin Efiopiyadakı səfirliyi vasitəsilə heyətə konsulluq dəstəyi göstərilib, onların müvafiq qaydada ehtiyaclarının qarşılanması məqsədilə aidiyyəti üzrə tədbirlər həyata keçirilib".
Məsələyə heyət üzvləri və onların yaxınlarından münasibət almaq mümkün olmayıb.
Bu məsələ ilə bağlı Azərbaycan mediasinda ilk xəbər bu il yanvarın əvvəlində yayılmışdı. Onda Azərbaycana məxsus gəmilərin Afrikada yerləşən Eritreyaya aid sularda saxlanıldığı bildirilirdi. Həmin vaxt XİN vurğulamışdı ki, Azərbaycan dövlət bayrağı altında üzən "CMS Pəhləvan", "CMS İgid" və "CMS-3" gəmiləri Süveyş kanalı istiqamətindən Birləşmiş Ərəb Əmirliklərinin Əbu-Dabi şəhərinə səfəri zamanı hava şəraitinin kəskinləşməsi nəticəsində Eritreyanın ərazi sularına məcburi giriş edib: "Keçid zamanı Eritreya Dövlətinin liman qurumları ilə əvvəlcədən əlaqə saxlanılsa da... girişin icazəsiz olduğu vurğulanaraq sözügedən gəmilər saxlanılıb. Adları qeyd olunan gəmilərdə heyət üzvlərindən 18 nəfər Azərbaycan vətəndaşlarıdır".
Eritreya Şərqi Afrikada dövlətdir. 1993-cü ildə Efiopiyadan müstəqilliyini əldə edib.
Əli Kərimlinin mühafizəçisi adam bıçaqlamaqda ittiham olunur
Azərbaycan Xalq Cəbhəsi Partiyası (AXCP) sədri Əli Kərimlinin mühafizəçisi Kənan Basqalın həbs edildiyi bildirilir.
Bu barədə AXCP-dən məlumat veriblər.
Partiyadan bildirildiyinə görə, o, martın 21-də gəzintiyə çıxıb, amma geri qayitmayıb. Martın 22-də isə AXCP-dən onun bıçaqlanma ittihamı ilə saxlandığı ilə bağlı məlumat yayılıb.
Məlumatı Daxili İşlər Nazirliyindən də təsdiqləyiblər.
Yerli saytlarda yer alan iddiaya görə, martın 21-i saat 20:00 radələrində Bakının Suraxanı rayonu Yeni Günəşli qəsəbəsində 36 yaşlı A.R.-nın qarın nahiyəsindən kəsilmiş-deşilmiş xəsarətlərlə xəstəxanaya yerləşdirilməsi barədə polisə məlumat daxil olub.
Əlavə olunduğuna görə, hadisəni törətməkdə şübhəli bilinən 59 yaşlı Kənan Zeynalovu (Basqal) polis əməkdaşları saxlayıblar. Hadisənin tərəflər arasında yaranan şəxsi münasibətlər zəminində baş verdiyi iddia edilib. Hələlik, məsələ ilə bağlı zərər çəkdiyi bildirilən şəxs və ya onun vəkili ilə ayrılıqda danışmaq mümkün olmayıb.
AXCP-dən verilən açıqlamaya görə, K.Basqal barəsində artıq 4 aylıq həbs-qətimkan tədbiri seçilib. Bu məlumatı rəsmi qurumlardan, hələlik, dəqiqləşdirmək mümkün olmayıb.
AXCP isə ittihamı böhtan sayır. "Bundan əvvəl də ölkənin çox sayda ictimai-siyasi fəalı adam bıçaqlamaq ittihamı ilə şərlənib. Bunların arasında AXCP fəalları Aqil Hümbətov (10 il), Zamin Salayev (4 il), Almaniyadan readmissiya olunandan sonra həbs edilmiş Samir Aşurov (6 il), "İşçi Masası" Həmkarlar İttifaqları Konfederasiyası İdarə Heyətinin sədri Afiəddin Məmmədov (8 il), keçmiş diplomat Emin İbrahimov (dövlət ittihamçısı 10 il istəyib) və ictimai fəal Nicat İbrahim (məhkəmə davam edir) də var", - AXCP sədri Əli Kərimli deyib.
Xatırlatma
Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb.
Onlardan biri də AXCP sədrinin başqa bir mühafizəçisi olduğu deyilən Niyaməddin Əhmədovdur. Terroru maliyyələşdirmə və başqa qanunsuz əməldə ittiham olunaraq 13 il azadlıqdan məhrum edilən N.Əhmədov da ittihamları siyasi sayır.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 350-dən çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Tacikistanda Novruz bayramı münasibətilə 900-a yaxın məhbus əfv edilib
Tacikistan Prezidenti Emoməli Rəhmon 900-ə yaxın məhbusu əfv
edib. Bu barədə fərman martın 20-də imzalanıb.
Fərmanda deyilir ki, beynəlxalq Novruz bayramı şərəfinə və humanizm prinsipi əsasında 897 nəfər cəzasının çəkilməmiş hissəsindən azad edilib.
Sonuncu dəfə E.Rəhmon 2020-ci ildə 400-ə yaxın məhbusu əfv etmişdi.
2024-cü ilin yanvarına olan məlumata görə, Tacikistan həbsxanalarında 13,5 mindən çox məhkum olub. Bu il üçün məlumat hələlik, açıqlanmayıb.
Xaricdə olan müxalifət və beynəlxalq qurum təmsilçiləri Tacikistan hakimiyyətini həbsxanaya davamlı olaraq çox sayda insanı, əsasən uzunmüddətli cəza ilə göndərdiyinə görə tənqid edirlər. Onların arasında müxalifətçilər, vətəndaş fəalları, jurnalistlər, vəkillər var. Əfv fərmanının onlardan kimlərə aid edildiyi bəlli deyil.
ABŞ Dövlət Departamenti 2024-cü ilin aprelində
"Tacikistan həbsxanalarında sıxlığı" ciddi problem adlandırıb.
Fevralın 5-də Tacikistan Ali Məhkəməsi 31 yaşlı jurnalist Ruhşona
Hakimovanı "dövlətə xəyanətdə" təqsirli bilib. O, südəmər körpəsinin
olmasına baxmayaraq, 8 il müddətinə azadlıqdan məhrum edilib. Məhkəmə prosesi paytaxtdakı istintaq təcridxanasının binasında bağlı qapılar arxasında keçirilib.
Jurnalistləri Müdafiə Komitəsi 2024-cü il üçün hesabatında bildirib ki, Tacikistanda media son üç onillikdə "ən pis durumdadır", çünki Rəhmon özünü "fərqli fikirlərə dözməyən mütləq hakimiyyət" kimi aparır.
Tramp Təhsil Departamentinin ləğvi barədə fərman imzalayıb
ABŞ prezidenti Donald Tramp martın 20-də Ağ Evdə Tələbə və müəllimlərin əhatəsində keçirilən mərasimdə Federal Təhsil Departamentinin (DoE) faktiki ləğvi ilə bağlı fərman imzalayıb.
“Reuters” yazır ki, bu qərar Trampın seçkiqabağı təşviqat vədlərinin bir hissəsi idi. O, düz iki ay əvvəl – yanvarın 20-də prezident vəzifəsinin icrasına başlayıb.
Fərmanla təhsil sahəsinin idarəçiliyi demək olar, tamamilə ştatlara və yerli şuralara verilir. Departamentin tamamilə bağlanması üçün konqresin
müvafiq aktı tələb olunacaq. “Reuters” Trampın bundan ötrü konqresmenlərdən yetərli səs ala bilməyəcəyini qeyd edir.
"Biz təhsili sadəcə, ştatlara qaytaracağıq, bu, məhz onlarda olmalıdır", – Tramp vurğulayıb. O, qərarı düzgün adlandırıb, onun mümkün qədər tez icrasının vacib olduğunu bildirib.
Ağ Ev, departamentin ləğvinin tələbə test nəticələrini yaxşılaşdıracağını, pula qənaət edəcəyini bildirir. Ancaq Demokratlar, digər tənqidçilər deyirlər ki, bu addım ən həssas tələbə kateqoriyalarını, o cümlədən aztəminatlı ailələrdən və ya sağlamlıq imkanları məhdud olanları çətin vəziyyətə salacaq.
Təhsil Departamenti ötən həftə işçilərinin təxminən yarısının işdən çıxarılması ilə bağlı bəyanat vermişdi.
BOK-un ilk qadın prezidenti seçildi
Üzgüçülük üzrə ikiqat Olimpiya çempionu və Beynəlxalq Olimpiya Komitəsi (BOK) İcraiyyə Şurasının üzvü Kirsti Koventri ali idman qurumunun yeni prezidenti seçilib. O, təşkilatın tarixində 10-cu prezident olacaq. O, hazırda Zimbabvenin idman naziri vəzifəsində çalışır.
41 yaşlı Koventri BOK-a rəhbərlik edən ilk qadın və ilk afrikalıdır.
Koventri rəsmi olaraq iyunun 23-də - Tomas Baxın səlahiyyət müddəti başa çatdıqdan sonra vəzifəsinin icrasına başlayacaq. BOK prezidenti 8 il müddətinə seçilir və daha bir yarım müddətə yenidən seçilmək hüququna malikdir.
Baxın dövründə - 2022-ci ildə Rusiya Ukraynanı işğal etdiyi üçün olimpiya idman növləri üzrə beynəlxalq yarışlardan kənarlaşdırılıb. 2023-cü ildə BOK Rusiya Olimpiya Komitəsinin fəaliyyətini dayandırıb.
Seçkiqabağı kampaniya zamanı Koventri rusiyalıların qarşıdan gələn Olimpiadada iştirakı mövzusuna toxunmayıb. O, Rusiyanın xaric edilməsini və rusiyalı idmançıların neytral statusda yarışmalarını dəstəkləyirdi.
Mövzunu şərh edən Koventri idman karyerası dövründə Zimbabvenin beynəlxalq sanksiyalar altında olduğunu xatırladıb.
"Beynəlxalq ictimaiyyət asanlıqla bizim Oyunlarda iştirak etməyimizə mane ola bilərdi. Belə olsaydı, bugünkü həyatım necə olardı? Siyasi liderlərin və hökumətlərin hərəkətlərinə görə cavab verməli olmadığım üçün minnətdaram", - o deyib.
'ToplumTV işi' üzrə məhkəmə başlayır
'ToplumTV işi' üzrə məhkəmə başlayır. Bu barədə AzadlıqRadiosuna vəkil Zibeydə Sadıqova məlumat verib. Onun bildirməsinə görə, cinayət işi materialları Bakı Ağır Cinayətlər Məhkəməsinə təqdim olunub, iş hakim Azər Tağıyevin icraatına verilib.
Məhkəmənin hazırlıq iclası aprelin 2-nə təyin olunub.
"ToplumTV işi" ilə bağlı həbslər ötən ilin martından başlayıb. Həmin vaxt bu işlə əlaqədar həbs edilənlər III Respublika Platformasının spikeri Akif Qurbanov, qurumun üzvü Ruslan İzzətli, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynal, habelə ToplumTV-nin təsisçisi Ələsgər Məmmədli və redaktoru Müşfiq Cabbar idi.
Bu ilin yanvarında əlavə olaraq jurnalist Fərid İsmayılov da həbs edilib.
Fevralda isə həmin işlə bağlı jurnalist Şahnaz Bəylərqızı da həbs edilsə də, o elə həmin ayın sonunda ev dustaqlığına buraxılıb.
"ToplumTV işi" üzrə həbs olunanlar əvvəlcə Cinayət Məcəlləsinin (CM) 206.3.2-ci (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddələri ilə təqsirləndirilirdi. Daha sonra onlara qarşı 162-1.1 (Əmək müqaviləsi hüquqi qüvvəyə minmədən işçilərin hər hansı işlərin yerinə yetirilməsinə cəlb edilməsi), 192.3.2 (xüsusilə küllü miqdarda gəlir əldə etməklə qanunsuz sahibkarlıq), 193-1.3.1 (Cinayət yolu ilə əldə edilmiş əmlakı leqallaşdırma), 193-1.3.2 (...xeyli miqdarda törədildikdə), 206.4 (mütəşəkkil dəstə tərəfindən qaçaqmalçılıq) və 213.2.1 (Vergiləri,... ödəməkdən yayınma - mütəşəkkil dəstə tərəfindən törədildikdə) maddələri ilə yeni ittihamlar irəli sürülüb.
Onların heç biri ittihamı qəbul etmir.
Xatırlatma
Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 350 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
İsrail Qəzzada yenidən quru əməliyyatına başlayıb
İsrail ordusu (SAXAL) Qəzza sektorunda yeni quru əməliyyatına başladığını elan edib. Ordu əməliyyatın məqsədini təhlükəsizlik zonasının genişləndirilməsi, Qəzza sektorunun şimal və cənub hissələri arasında qismən bufer zonanın yaradılması ilə izah edib.
SAXAL-ın Qəzzanı iki yerə ayıran Netsarim dəhlizini nəzarətə götürdüyü bildirilir.
ABŞ və Aİ-nin terrorçu saydığı HƏMAS qruplaşması İsrail ordusunun əməliyyatlarını atəşkəs sazişinin "yeni və təhlükəli pozuntusu" adlandırıb. Qruplaşma bəyanatında sazişə sadiqliyini təsdiqləyib, vasitəçiləri öhdəliklərini yerinə yetirməyə çağırıb.
Qəzzada yanvardan bəri atəşkəs rejimi qüvvədədir. Amma İsrail martın 18-də Qəzzaya zərbələri bərpa edib, girovların hamısının azad olunmasını tələb edib.
HƏMAS bildirir ki, yalnız İsrail qüvvələrini tam çıxararsa və əməliyyatlar dayandırılarsa, buna razılaşar.
Qəzzada HƏMAS-ın nəzarətində olan Səhiyyə Nazirliyi martın 18-də aviazərbələr nəticəsində 400-dən çox insanın öldürüldüyünü bildirib. Hələlik, bu rəqəmləri müstəqil mənbələr təsdiqləməyib.
Atəşkəs rejimi iki ay qüvvədə qalıb. Razılaşma çərçivəsində HƏMAS azı 30 israilli girovu, İsrail isə həbsxanalarından 2 minədək fələstinli məhbusu azad edib.
Atəşkəsin birinci fazası iki həftə öncə başa çatıb. İkinci mərhələ, girovların buraxılması, müharibənin dayandırılması üzrə danışıqlar dalana dirənib.
Azərbaycanda Novruz bayramı qeyd edilir
Bu gün, martın 20-si (21-i) Azərbaycanda Novruz bayramı qeyd edilir.
Novruz yazın gəlişinin simvolu olan qədim xalq bayramıdır, mənası "yeni gün"dür.
Bu bayram Azərbaycan daxil dünyanın bir çox ölkələrində keçirilir.
Bakı Dövlət Universitetinin (BDU) Fizika fakültəsinin Astrofizika kafedrasından verilən məlumata görə, bu il yaz fəslinin Azərbaycana daxil olması martın 20-si Bakı vaxtı ilə saat 13:01:25-ə təsadüf edəcək.
Novruz Şimal yarımkürəsində astronomik yazın başlandığı, gecə-gündüz bərabərliyi günündə (martın 20-si, 21-i və ya 22-də) keçirilir.
BMT-nin Təhsil, Elm və Mədəniyyət Təşkilatı (UNESCO) 2009-cu il sentyabrın 30-da Novruzu "qeyri-maddi mədəni irs" siyahısına daxil edilib. 2010-cu ildə isə BMT martın 21-ni Beynəlxalq Novruz Günü elan edib.
Novruz bayramı SSRİ dönəminin böyük hissəsində Azərbaycanda qadağan edilib. Yalnız 1967-ci ildə Azərbaycan SSRİ-də təmtəraqla qeyd edilib.
Rusiya və Ukrayna əsir mübadiləsi gerçəkləşdirib
Rusiya və Ukrayna arasında hərbi əsirlərin mübadiləsi keçirilib, hər iki tərəfdən 175 hərbi əsir azad olunub. Bu barədə xəbər agentlikləri Rusiyanın Müdafiə Nazirliyinə istinadla yazır.
Bəyanatda deyilir ki, Ukraynaya “xoş niyyət əlaməti olaraq” Ukrayna Hərbi Qüvvələrinin 22 ağır yaralı hərbçisi də təhvil verilib. Onlar təcili tibbi yardıma ehtiyacı olanlardır. Kreml bundan öncə 23 yaralını təhvil verəcəyini bildirmişdi.
Əsir mübadiləsinin anonsu ABŞ və Rusiya prezidentləri Donald Trampla Vladimir Putin arasında dünənki telefon söhbətindən sonra verilmişdi. Əsirlərin Birləşmiş Ərəb Əmirliklərinin vasitəçiliyi ilə dəyişdirildiyi bildirilir.
Ukrayna prezidenti Volodimir Zelenski də əsir mübadiləsinin gerçəkləşdiyini təsdiqləyib.
'Neft Daşları'nda kran dənizə düşüb, ölən var
Martın 18-də "Neft Daşları"nda kran tarazlığını itirərək dənizə düşüb.
Azərbaycan Dövlət Neft Şirkətinin (SOCAR) "Azneft" İstehsalat Birliyindən (İB) bu barədə məlumatları ölkənin yerli saytlarına təsdiqləyiblər.
Məlumata görə, saat 16:25 radələrində "Azneft" İB-nin "Neft Daşları" Neft və qazçıxarma idarəsinin 4 saylı Neft və qazçıxarma sahəsində təmir işləri zamanı "Libher Gravleer" tırtıllı kranı tarazlığını itirərək dənizə düşüb.
Hadisə nəticəsində kranın maşinistinin həlak olduğu bildirilir.
Rəsmi məlumata həlak olan maşinistin yaxınlarından münasibət almaq mümkün olmayıb.
Xatırlatma
Son 10 ildə Xəzərdə neftçilər bir sıra ağır faciələrlə üzləşiblər. 2016-cı il dekabrın 15-də qasırğanın Nərimanov adına Neft Qaz Çıxarma İdarəsinin estakadasını uçurması nəticəsində 10 neftçinin dənizə düşdüyü açıqlanmışdı. Onlardan birinin həmin gün, bəzilərinin isə sonrakı günlər cəsədi tapılıb ailəsinə verilib.
Həmin vaxt bir çox sosial şəbəkə istifadəçiləri SOCAR rəhbərliyini önləyici təhlükəsizlik tədbirləri görməməkdə qınamışdı.
2015-ci il dekabrın 4-də isə "Günəşli" yatağında yanğın baş vermişdi. Həmin vaxt 64 neftçidən yalnız 34-ü xilas edilib. Onda da hava şəraitinin əlverişsiz olduğu bildirilirdi.
Ələsgər Məmmədli ev dustaqlığına buraxılmayıb
Bu gün, martın 18-də Xətai rayon Məhkəməsində hakim Sülhanə Hacıyevanın sədrliyi ilə həbsdə olan media eksperti, "Toplum" İnternet Televiziyasının təsisçisi Ələsgər Məmmədlinin ev dustaqlığına buraxılması ilə bağlı müdafiə tərəfinin vəsatətinə baxılıb. Vəsatətə təmin edilməyib.
Yaxınlarının verdiyi məlumata görə, Ə.Məmmədli məhkəmə iclasında geniş çıxış edib. Media ekspertinin deməsinə görə, bundan öncəki bütün məhkəmə iclaslarında istintaq tərəfi iddia edib ki, əgər o, azadlıqda olsa, istintaqın gedişinə əngəl törədə, yaxud sübutları yox edə bilər. Ə.Məmmədli vurğulayıb ki, artıq istintaq başa çatıb və işlə tanışlıq mərhələsi də yekunlaşıb.
Media ekspertinin sözlərinə görə, istintaqın materialları ilə tanış olanda aydın olub ki, onun həbsinə əsas olacaq heç bir fakt və sübut yoxdur.
Yaxınlarının əlavə etməsinə görə, o habelə səhhətindən danışıb və əməliyyat olmasının vacibliyindən bəhs edib.
Lakin hakim S.Hacıyeva Ə.Məmmədlinin həbsi ilə bağlı qərarı qüvvədə saxlayıb.
19 fevral
Ələsgər Məmmədli istintaq materialları ilə tanış olub, həbsini 'qanunsuz' sayır
Həbsdə olan media eksperti Ələsgər Məmmədli təsisçisi olduğu "Toplum" İnternet Televiziyası ilə bağlı açılmış cinayət işinin istintaq materialları ilə tanış olub və "məhkəmədə azacıq ədalət olacağı təqdirdə bütün ittihamları puç edəcəyinə inanır".
Bunu fevralın 18-də Ə.Məmmədli ilə telefonda danışan qardaşı Nəsimi Məmmədli bildirib: "Ələsgər bəy bildirdi ki, 11 aydan çoxdur davam edən istintaq yekunlaşıb. Həbsinin qanunsuz olmasına etiraz əlaməti olaraq bu müddət ərzində heç bir ifadə verməyib".
Qardaşının sözlərinə görə, hər biri 300 vərəqdən ibarət olmaqla 23 cild qovluq, əlavə qeydlər və ifadələrlə birlikdə ümumilikdə 10 min səhifədən çox istintaq materialları ilə tanış olmaq üçün beş gün sərf edib.
"Deməsinə görə, 50 nəfərdən çox şəxs istintaqa çağrılıb və dindirilib. Bütün ifadələrlə tanışdır. İstintaq materiallarının özü ilə bağlı hissələrindən və prosessual pozuntulardan ibarət 21 qeyd götürüb. Hər biri ilə bağlı əminliklə bildirdi ki, onun həbsdə saxlanması tamamilə qanunsuzdur", - N.Məmmədli bildirib.
Bu fikirlərə istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.
+++
Ə.Məmmədli ötən il martın 8-də həbs olunub. Xətai rayon Məhkəməsi onun barəsində 4 aylıq həbs-qətimkan tədbiri seçib. Daha sonra qətimkan tədbirinin müddəti uzadılıb.
Ə.Məmmədli Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ittiham olunur. O, özünü təqsirli bilmir və həbsini peşə fəaliyyəti ilə əlaqələndirir.
Xatırlatma
Ümumilikdə 2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Amma onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər. Sonradan onlardan bəzilərinin ittihamı hətta ağırlaşdırılıb.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.
Rüfət Səfərovun həbs müddəti uzadılıb
Bu gün, martın 18-də hüquq müdafiəçisi Rüfət Səfərov barəsində seçilmiş həbs-qətimkan tədbirinin uzadılması ilə bağlı istintaq orqanından verilən təqdimata baxılıb.
Binəqədi rayon Məhkəməsinin qərarına əsasən, R.Səfərovun həbs müddəti mayın 3-dək uzadılıb.
7 yanvar
Rüfət Səfərovun anası onun ölkədən çıxışına qadağanın götürüldüyünü deyir
Həbsdə olan hüquq müdafiəçisi Rüfət Səfərovun anası Tahirə Tahirqızı ölkədən çıxışına məhdudiyyətin götürüldüyünü bildirir. Onun sözlərinə görə, bu gün, yanvarın 7-də o, ağır xəstə olan həyat yoldaşı Eldar Sabiroğlu ilə birlikdə Türkiyəyə yola düşüb.
Onların artıq Türkiyədə olduğu bildirilir.
Məsələ ilə bağlı istintaqı aparan Daxili İşlər Nazirliyi ilə danışmaq mümkün olmayıb.
6 dekabr
Rüfət Səfərovun anası ifadəyə çağrılıb
Həbsdə olan hüquq müdafiəçisi Rüfət Səfərovun anası Tahirə Tahirqızı oğluna qarşı qaldırılan cinayət işi üzrə istintaqa çağırıldığını bildirib. Yanvarın 6-da o, şahid qismində ifadə vermək üçün Bakı şəhər Baş Polis İdarəsinə çağrılıb.
T.Tahirqızının sözlərinə görə, o, qanunvericiliyə uyğun olaraq ifadə verməkdən imtina edib və oğlunun şərləndiyini deyib: "Müstəntiqə ölkədən çıxmağıma qadağa qoyulması ilə bağlı sual verdim, amma heç bir cavab ala bilmədim".
Hüquq müdafiəçisinin anası vurğulayıb ki, həyat yoldaşı Parkinson xəstəliyindən əziyyət çəkir və hər yarım ildən bir Türkiyədə müayinədən keçir: "Yanvarın 7-də də müayinəyə getməli idik, amma ölkədən çıxışına qadağa qoyuldu. Amma ümid edirəm ki, oğlumun həbsinin sifarişçiləri humanizm göstərəcəklər və onun atasının xaricə getməsinə imkan verəcəklər".
T.Tahirqızının açıqlamasına istintaqdan münasibət almaq mümkün olmayıb.
Rüfət Səfərovun anasının ölkədən çıxışına 'stop' qoyulduğu deyilir
Həbsdə olan hüquq müdafiəçisi Rüfət Səfərovun anası Tahirə Tahirqızının ölkədən çıxışına məhdudiyyət qoyulduğu bildirilir. Bu barədə Səfərovun ailəsindən məlumat veriblər.
"Tahirə xanımın ölkədən çıxışına Daxili İşlər Nazirliyi qadağa qoyub. Tahirə xanım həyat yoldaşı Eldar Səfərovun Türkiyədə həkim müayinəsindən keçirilməsi üçün İstanbula getməli idi. Amma yanvarın 4-də onun çıxışına məhdudiyyət qoyulduğunu öyrənib. Rüfətin atası Eldar Səfərovun vəziyyəti kəskin şəkildə pisləşməsinə baxmayaraq, onu Türkiyəyə aparmaq, hələlik, mümkün olmayıb", - Səfərovlar ailəsindən deyiblər.
R.Səfərovun özü də saxlandığı təcridxanasından Daxili İşlər Nazirliyinə müraciət edib. O, anasının xəstə atası E.Səfərovla birlikdə ölkədən xaricə çıxmasına icazə verilmədiyini vurğulayaraq "nə etməyə çalışırsınız" deyə sual edib.
Hələlik, bütün bu deyilənlərə Daxili İşlər Nazirliyinin özündən münasibət almaq mümkün olmayıb.
"Müdafiə Xətti" hüquq-müdafiə təşkilatının icraçı direktoru, hüquq müdafiəçisi R.Səfərov ötən il, dekabrın 3-də axşam saatlarında saxlanıb. Ona qarşı Cinayət Məcəlləsinin 221.1 (xuliqanlıq), 178.3.2 (dələduzluq-külli miqdarda ziyan vurmaqla törədildikdə) və 127.2.3-cü (qəsdən sağlamlığa az ağır zərər vurma) maddəsi ilə ittiham irəli sürüldüyü açıqlanıb. Dekabrın 4-də Binəqədi rayon Məhkəməsi R.Səfərov barəsində 4 ay müddətinə həbs-qətimkan tədbiri seçib. O, ittihamları qurama sayır.
Xatırlatma
Zərdab rayon Prokurorluğunun keçmiş müstəntiqi R.Səfərov 2015-ci ilin sonunda Azərbaycan hakimiyyətini insan haqlarının pozulmasında və ölkədə qanunsuzluqlarda ittiham etdikdən sonra istefaya çıxıb. O bundan sonra rüşvət almaq ittihamı ilə həbs edilib. 2016-cı ilin sentyabrında Lənkəran Ağır Cinayətlər Məhkəməsinin qərarı ilə 9 il müddətinə azadlıqdan məhrum edilib.
Keçmiş müstəntiq ona qarşı irəli sürülən ittihamları rədd edib. 2019-cu ildə əfv sərəncamı ilə azadlığa çıxıb. Daha sonra o, hüquq müdafiəsi fəaliyyətinə başlayıb.
4 NATO ölkəsi minalarla bağlı qadağadan imtina edir
Polşa, Estoniya, Latviya və Litva piyadalar əleyhinə minaların qadağan olunması haqqında Ottava Konvensiyasından geri çəkilməyə hazırlaşır.
Müvafiq qərarla bağlı bu ölkələrin müdafiə nazirləri birgə bəyanat yayıb.
Bəyanatda bildirilib ki, bu Konvensiyanın ratifikasiyasından bəri regionda təhlükəsizlik vəziyyəti əsaslı şəkildə pisləşib.
Müdafiə nazirləri vurğulayıb ki, Rusiya və Belarusla həmsərhəd olan NATO dövlətləri üçün hərbi təhdidlər xeyli artıb: "Bu mülahizələri nəzərə alaraq, biz – Estoniya, Latviya, Litva və Polşanın müdafiə nazirləri yekdilliklə Ottava Konvensiyasından çıxmağı tövsiyə edirik. Bu qərarla biz açıq mesaj veririk: ölkələrimiz ərazimizi və azadlığımızı müdafiə etmək üçün hər cür tədbirə hazırdır".
Piyadalar əleyhinə yerüstü minaların istehsalına, daşınmasına və istifadəsinə qadağa qoyulması haqqında Ottava Konvensiyası 1997-ci ildə qəbul edilib. Konvensiyaya 160-dan çox ölkə qoşulub. Azərbaycan və Ermənistan da daxil olmaqla 34 ölkə Konvensiyaya qoşulmayıb. Aİ-də daxil olmaqla, müxtəlif beynəlxalq qurumlar hər iki ölkəyə Konvensiyaya qoşulmaqla bağlı çağırışlar edib.
Azərbaycan sərhədlərində məhdudiyyət iyulun 1-nə kimi uzadıldı
Azərbaycanda xüsusi karantin rejimi 2025-ci il iyulun 1-nə kimi uzadılıb.
Baş nazir Əli Əsədov bununla bağlı bu gün, martın 18-də qərar imzalayıb.
Azərbaycanda karantin müddəti aprelin 1-də başa çatırdı.
Baş nazirin qərarında bu belə izah edilib: "Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə…".
Koronavirus pandemiyası ilə bağlı Azərbaycanda 2020-ci ilin martından karantin rejimi elan edilib. Bu arada onun müddəti bir çox dəfə uzadılıb. Yoluxma sayından asılı olaraq zaman-zaman rejim sərtləşdirilsə də, sonra yenə yumşaldılıb.
Ümumdünya Səhiyyə Təşkilatı (ÜST) 2023-cü ilin mayından bu pandemiyanın başa çatdığını elan edib. Azərbaycanın özündə də son illər bu virusa yoluxma kəskin azalıb. Son vaxtlar isə, ümumiyyətlə, bu virusa yoluxma ilə bağlı hər hansı statistika açıqlanmır.
Koronavirusla bağlı 2020-ci ilin yazından Azərbaycanın quru sərhədlərində gediş-gəliş məhdudlaşdırılıb. Bu hal hələ də davam edir. Ölkənin bir sıra müxalifət partiyaları pandemiyanın başa çatdığını vurğulayaraq məhdudiyyətlərin götürülməsini tələb edir.
Dövlət başçısı və bəzi deputatlar isə son dönəmlər açıqlamalarında sərhəddə məhdudiyyətlərin saxlanmasını Nazirlər Kabinetindən fərqli olaraq təhlükəsizlik amili ilə izah edirlər. Amma hakimiyyətin opponentləri vurğulayırlar ki, təhlükəsizliklə bağlı sərhəddə məhdudiyyətin saxlanması hökumətin acizliyi sayıla bilər. Onların fikrincə, əslində məqsəd hakimiyyətdəkilərin iqtisadi və siyasi maraqlarına söykənir.
Xatırlatma
2019-cu ilin sonlarında dünyada yeni koronavirus aşkar edilib. 2020-ci il martın 11-də ÜST koronavirusu pandemiya elan edib. Dünyada sürətlə yayılan bu virusdan 7 milyona yaxın şəxsin vəfat etdiyi açıqlanıb. Azərbaycanda isə, son statistikalara görə, 834 mindən çox insanın bu virusa yoluxduğu, onlardan 10 min 400-nün vəfat etdiyi bildirilir.
Endokrinoloji Mərkəzin vəzifəli şəxsləri ilə bağlı cinayət işi başlanıb
Respublika Endokrinoloji Mərkəzinin vəzifəli şəxsləri ilə bağlı cinayət işi başlanıb.
Bu barədə Baş Prokurorluq və Tibbi Ərazi Bölmələrini İdarəetmə Birliyi (TƏBİB) bu gün, martın 18-də birgə məlumat yayıb.
Məlumatda bildirilir ki, Korrupsiyaya qarşı Mübarizə Baş İdarəsində Endokrinoloji Mərkəzin vəzifəli şəxslərinin "qanunsuz hərəkətləri ilə bağlı" daxil olmuş məlumat əsasında əməliyyat-axtarış tədbirləri keçirilib.
Əlavə edilir ki, Mərkəzin vəzifəli şəxslərinin şəkərli diabet xəstəliyindən əziyyət çəkən insanların qeydiyyata alınması, müxtəlif dərman vasitələri ilə təmin olunması məqsədilə müxtəlif məbləğlərdə pul vəsaiti almalarına və vəzifə səlahiyyətlərindən sui-istifadə etmələrinə əsaslı şübhələr yaranıb: "Toplanmış ilkin sübutlar əsasında Cinayət Məcəlləsinin 308.1 (vəzifə səlahiyyətlərindən sui-istifadə) və 312-1.1-ci (vəzifəli şəxsin qərarına qanunsuz təsir göstərmə (nüfuz alveri)) maddələri ilə cinayət işi başlanıb. Hazırda cinayət əməllərinin törədilməsində təqsirli şəxslərin müəyyən edilərək məsuliyyətə cəlb olunmaları istiqamətində zəruri tədbirlər davam etdirilir".
Hələlik, rəsmi açıqlamaya Mərkəzin rəhbərliyindən, cinayət işinə cəlb edilən vəzifəli şəxslər və onların vəkillərindən münasibət almaq mümkün olmayıb.
Qeyd edilən maddələrlə şəxslərə ümumilikdə 7 ilə qədər həbs cəzası verilə bilər.
SOCAR İsraildə kəşfiyyat işləri aparacaq
İsrail BP, SOCAR və yerli "NewMed Energy" şirkətlərinə İsrail sularında təbii qaz axtarışı aparmaq üçün lisenziyalar verib.
Bununla bağlı İsrailin Enerji və İnfrastruktur Nazirliyi məlumat yayıb. Lisenziya bu gün, martın 17-də İsraildə səfərdə olan Azərbaycanın iqtisadiyyat naziri Mikayıl Cabbarova bu ölkənin enerji və infrastruktur naziri Eli Koen tərəfindən təqdim olunub.
İsrail daxili qaz ehtiyatlarını artırmaq və ixracı genişləndirmək istəyir.
"Təbii qaz bütün dünyada, xüsusən də Yaxın Şərqdə iqtisadi və diplomatik mövqeyimizi gücləndirən strateji sərvətdir. Buna görə də biz təbii qaz hasilatını həm daxili bazar, həm də ixrac üçün genişləndirməyə çalışırıq, xüsusən də bu dövrdə", - Koen bildirib
"Reuters"in xəbərinə görə, 2023-cü ildə bu üçlük dördüncü lisenziya raundunda iki dəniz blokuna birlikdə təklif verib.
"Leviathan" yatağı yaxınlığındakı "Klaster I" adlanan ərazi üçün verilən lisenziyalar çərçivəsində SOCAR kəşfiyyat konsorsiumunun operatoru kimi çıxış edəcək. BP ilk dəfə İsrailin təbii qaz sektorunda fəaliyyət göstərəcək. "NewMed Energy" isə artıq "Chevron" (CVX.N) tərəfindən idarə olunan nəhəng "Leviathan" dəniz yatağının ən böyük payçısıdır.
Hər bir şirkət lisenziyalardakı hüquqların təxminən üçdə birinə sahib olacaq.
"Klaster I" İsrailin iqtisadi sularının şimal hissəsində, Aralıq dənizində yerləşən 1700 kvadrat kilometrlik bir ərazidir. Konsorsium kəşfiyyatın birinci mərhələsində seysmik və geoloji tədqiqatlar aparacaq, ikinci mərhələdə isə tədqiqat nəticələrinə əsasən qazma işləri həyata keçiriləcək.
İsrailin Energetika Nazirliyi əlavə lisenziyaların verilməsinin gözlənildiyini və bu ilin sonlarına doğru beşinci tender raundunun planlaşdırıldığını açıqlayıb.
